അവഗണനയ്ക്കും ഒരു പരിധിയില്ലേ, കേരളകൗമുദിയോട് അടൂർ പ്രകാശ്

തിരുവനന്തപുരം: താൻ യു.ഡി.എഫ് കൺവീനറായ നാൾ മുതൽ അവഗണന നേരിടുന്നുണ്ടെന്ന് അടൂർ പ്രകാശ് എം.പി കേരളകൗമുദിയോട് പറഞ്ഞു. എന്തു പറഞ്ഞാലും അത് കേട്ടുകൊണ്ടു പോകുമെന്ന തോന്നൽ പലർക്കുമുണ്ടായതുകൊണ്ടാവാം അതെന്നും അദ്ദേഹം ചൂണ്ടിക്കാട്ടി.

? തീരുമാനങ്ങൾ യു.ഡി.എഫിൽ ചർച്ച ചെയ്യാറില്ലേ

മന്ത്രിസഭ അധികാരമേറ്റ ശേഷം ഒരു യു.ഡി.എഫ് യോഗമേ ചേർന്നിട്ടുള്ളു. എല്ലാ മാസവും യു.ഡി.എഫ് യോഗം ചേരണമെന്നും എല്ലാ കാര്യങ്ങളും യു.ഡി.എഫിൽ ചർച്ച ചെയ്ത് തീരുമാനിക്കണമെന്നുമായിരുന്നു അന്നത്ത ധാരണ. അതൊന്നുമുണ്ടായില്ല.

?മുതിർന്ന നേതാവായിട്ടും എന്തു കൊണ്ട് കാര്യങ്ങൾ ആലോചിക്കുന്നില്ല

എന്തുപറഞ്ഞാലും അതു കേട്ടുകൊണ്ടങ്ങു പോകും എന്ന തോന്നൽ ഉണ്ടായിരിക്കാം. എം.കെ.മുനീറിന്റെയും ദേവരാജന്റെയും പദവികൾ സംബന്ധിച്ചാണെങ്കിൽ അവർ അർഹതപ്പെട്ടവരല്ല എന്നല്ല എന്റെ അഭിപ്രായം. പക്ഷേ,​ അത് പത്രങ്ങളിലൂടെ വായിക്കണം എന്നു പറഞ്ഞാൽ യു.ഡി.എഫ് കൺവീനർ സ്ഥാനം വഹിച്ചുകൊണ്ടു പോവുന്നത് ശരിയല്ല. ഇപ്പോഴത്തെ സി.എം പ്രതിപക്ഷ നേതാവായിരുന്നപ്പോഴും അവഗണന ഉണ്ടായിട്ടുണ്ട്. ആ അവഗണന സഹിക്കാൻ പറ്റില്ല. എന്നെ കൺവീനർ സ്ഥാനത്ത് വച്ചത് എ.ഐ.സി.സിയാണ്.

?നിയസഭ തിരഞ്ഞെടുപ്പ് സമയത്തും ഈ സ്ഥിതി ഉണ്ടായിരുന്നോ

തിരഞ്ഞെടുപ്പ് സമയത്ത് ഓടിനടന്ന് ചെയ്യാൻ പറ്റുന്ന കാര്യങ്ങൾ ചെയ്തിട്ടുണ്ട്,​ എല്ലാ മേഖലയിലും. അപ്പോഴും മുന്നണി തീരുമാനിക്കേണ്ട കാര്യങ്ങൾ പത്രത്തിലൂടെ വായിച്ചറിയണമെന്നു വന്നാൽ,​ ഈ സ്ഥാനത്ത് ഇരുന്നിട്ട് കാര്യമില്ലല്ലോ.

?കെ.പി.സി.സി ഭാരവാഹികളായ ചിലരും മന്ത്രിസഭയിലുണ്ടല്ലോ. അവർ എതിർപ്പൊന്നും പ്രകടിപ്പിച്ചില്ലല്ലോ

അവർക്ക് മറ്രെന്തെങ്കിലും ഉദ്ദേശ്യമുണ്ടോ എന്നറിയില്ലല്ലോ. ഫിനാൻസ് മുഖ്യമന്ത്രിയുടെ കൈയിലാണല്ലോ. അവരവരുടെ വകുപ്പുകളിൽ പല കാര്യങ്ങളും ചെയ്യേണ്ടിവരുമ്പോൾ ബുദ്ധിമുട്ടുണ്ടാവുമെന്നതിനാലാവും.

?മന്ത്രി വിഷ്ണുനാഥിന്റെ വകുപ്പിലെ തീരുമാനങ്ങൾ വന്നപ്പോൾ അങ്ങോട്ട് ചോദിച്ചിരുന്നോ

നത്തിംഗ്, ഒന്നും ചോദിച്ചില്ല. അർഹതപ്പെട്ട ആളുകളെയാവും അവർ നിയോഗിച്ചത്. അവരുടെ അർഹതയെക്കുറിച്ച് പൊതുരംഗത്ത് നിൽക്കുന്ന ഒരാളെന്ന നിലയ്ക്ക് മനസിലാക്കാൻ കഴിയും.

?ഇപ്പോഴത്തെ അവസ്ഥയ്ക്ക് എന്താണ് പരിഹാരം.

എ.ഐ.സി.സിക്ക് കത്ത് നൽകും. പരിഹാരം എന്തെന്ന് അവിടെ തീരുമാനിക്കട്ടെ.

?തദ്ദേശ തിരഞ്ഞെടുപ്പ് സമയത്തും വേണ്ടത്ര കൂടിയാലോചന നടന്നില്ലേ

ഒരു ആലോചനയും നടന്നില്ല. തിരുവനന്തപുരം, കോട്ടയം, പത്തനംതിട്ട, പാലക്കാട് ജില്ലകളിൽ ഞാൻ ഓടി നടന്നു കഴിയും വിധം പ്രവർത്തിച്ചു. പാലക്കാട്ടെ പരിപാടി കഴിഞ്ഞപ്പോഴാണ് റെയിൽവേ ഡിവിഷൻ മാറ്റവുമായി ബന്ധപ്പെട്ട് ഡൽഹിക്ക് പോയത്. ഡ്രസുപോലും എടുക്കാതെയാണ് പോയത്.