ചരിത്രപരമായ നേട്ടങ്ങളെ വികസിപ്പിക്കാനാകണം

മെച്ചപ്പെട്ട, കൂടുതൽ നീതിപൂർവകമായ, കൂടുതൽ സമൃദ്ധമായ കേരളം സൃഷ്ടിക്കാനുള്ള ഉത്തരവാദിത്വം ഓർമിപ്പിക്കുന്ന ദിനമാണിന്ന്. ജനങ്ങളുടെ ജീവിതനിലവാരവും അവകാശങ്ങളും അവസരങ്ങളും മെച്ചപ്പെടുന്നുണ്ടോ എന്നതായിരിക്കണം ഏത് വികസന കാഴ്ചപ്പാടിന്റെയും അന്തിമമാനദണ്ഡം. എഴുപതാണ്ട് പിന്നിടുമ്പോൾ, കേരളത്തിന്റെ മുന്നിലുള്ള വികസന വെല്ലുവിളി ചെറുതല്ല. യുവജന തൊഴിലില്ലായ്മ, ഉന്നത വിദ്യാഭ്യാസത്തിന്റെ ഗുണനിലവാരം, വ്യവസായ നിക്ഷേപം, പൊതുധനകാര്യ സുസ്ഥിരത, കാലാവസ്ഥാ വ്യതിയാനം, വയോജന സംഖ്യയിലെ വർദ്ധനവ്, പ്രവാസി തൊഴിൽവിപണിയിലെ അനിശ്ചിതത്വം തുടങ്ങിയവയ്ക്ക് ദീർഘകാല പരിഹാരം ആവശ്യമാണ്. പൊതുമേഖലയിലെ നിക്ഷേപം സാമ്പത്തികമായി സുസ്ഥിരമായിരിക്കണം. സാമൂഹിക ക്ഷേമ പദ്ധതികൾ യഥാർത്ഥ ഗുണഭോക്താക്കളിലേക്കെത്തണം. തദ്ദേശ സ്വയംഭരണ സ്ഥാപനങ്ങളുടെ അധികാരവും സാമ്പത്തിക ശേഷിയും സംരക്ഷിക്കപ്പെടണം. വികസനം ഒരു തുടർപ്രക്രിയയാണ്. 1957-ലെ ഭൂപരിഷ്കരണ ചിന്തകളിൽ നിന്ന് 1996-ലെ ജനകീയാസൂത്രണത്തിലേക്കും 2016-ന് ശേഷമുള്ള പൊതുസേവന, അടിസ്ഥാനസൗകര്യ വികസന ഇടപെടലുകളിലേക്കും നീളുന്ന ചരിത്രം കേരളത്തിനുണ്ട്. ഇന്ന് നേരിടുന്ന പ്രധാന ചോദ്യം, ആ ചരിത്രപരമായ നേട്ടങ്ങളെ എങ്ങനെ സംരക്ഷിക്കുകയും പുതിയ കാലത്തിന്റെ ആവശ്യങ്ങൾക്കനുസരിച്ച് വികസിപ്പിക്കുകയും ചെയ്യാമെന്നതാണ്. പുതിയ സർക്കാരിന്റെ ഓരോ നയമാറ്റവും ഈ അടിസ്ഥാനത്തിൽ വിലയിരുത്തപ്പെടണം.

പിണറായി വിജയൻ

പ്രതിപക്ഷനേതാവ്