ഞായർ വരെ മഴയ്ക്ക് സാദ്ധ്യത

തിരുവനന്തപുരം: സംസ്ഥാനത്ത് ഞായറാഴ്ച വരെ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്കും മണിക്കൂറിൽ 30-40 കിലോമീറ്റർവരെ വേഗതയിൽ ശക്തമായ കാറ്റിനും സാദ്ധ്യതയെന്ന് കേന്ദ്ര കാലാവസ്ഥ വകുപ്പ്. തെലങ്കാനയുടെ കിഴക്കൻ മേഖലയ്ക്കും തീരദേശ ആന്ധ്രാപ്രദേശിനും മുകളിൽ തീവ്രന്യൂനമർദ്ദം സ്ഥിതി ചെയ്യുന്നുണ്ട്. ഇത് വടക്കോട്ട് നീങ്ങി ശക്തികൂടിയ ന്യൂനമർദ്ദമായി മാറും. ഇതിനൊപ്പം ലക്ഷദ്വീപിനും സമീപപ്രദേശങ്ങൾക്കു മുകളിലും തെക്കൻ തമിഴ്നാടിന് മുകളിലും ചക്രവാതച്ചുഴിയും രൂപപ്പെട്ടു. ഇത് കേരളമടക്കമുള്ള സംസ്ഥാനങ്ങളിൽ മഴസാദ്ധ്യത കൂട്ടുന്നു.