വിഭാഗീയത; ആലപ്പുഴ സി പി എമ്മിൽ കടുത്ത നടപടി,​ പി പി ചിത്തരഞ്ജൻ എം എൽ എയെ തരംതാഴ്‌ത്തി,​ എ ഷാനവാസിനെ പുറത്താക്കി ,​ മൂന്ന് ഏരിയാ കമ്മിറ്റികൾ പിരിച്ചുവിട്ടു

ആലപ്പുഴ : വിഭാഗീയത രൂക്ഷമായ ആലപ്പുഴ സി.പി.എമ്മിൽ മുതിർന്ന നേതാക്കൾ ഉൾപ്പെടെയുള്ളവർക്ക് എതിരെ കടുത്ത നടപടിയുമായി പാർട്ടി,​ എം.എൽ.എയും ജില്ലാ സെക്രട്ടേറിയറ്റ് അംഗവുമായ പി.പി. ചിത്തരഞ്ജനെ ജില്ലാകമ്മിറ്റിയിലേക്ക് തരംതാഴ്ത്തി. കേരള ബാങ്ക് ഡയറക്ടർ എം. സത്യപാലനെയും ജില്ലാ സെക്രട്ടറിയേറ്റിൽ നിന്ന് ജില്ലാ കമ്മിറ്റിയിലേക്ക് തരംതാഴ്‌ത്തിയിട്ടുണ്ട്. ലഹരികടത്ത് കേസിൽ പ്രതിയായ എ. ഷാനവാസിനെ പാർട്ടിയിൽ നിന്ന് പുറത്താക്കി. ആലപ്പുഴ സൗത്ത്,​ നോർത്ത്,​ ഹരിപ്പാട് ഏരിയാ കമ്മിറ്റികൾ പിരിച്ചുവിട്ടു. സംസ്ഥാന സെക്രട്ടറി എം.വി. ഗോവിന്ദൻ പങ്കെടുത്ത ജില്ലാ നേതൃയോഗത്തിലാണ് തീരുമാനം

സൗത്ത് ഏരിയാ സെക്രട്ടറിയുടെ ചുമതല സിബി ചന്ദ്രബാബുവിന് നൽകി. ഹരിപ്പാട് ഏരിയാ സെക്രട്ടറിയുടെ ചുമതല കെ.എച്ച്. ബാബുരാജിനാണ്. നോർത്ത്,​ സൗത്ത് ഏരിയാ കമ്മിറ്റികൾ ഒന്നാക്കും. ജില്ലാ സെക്രട്ടേറിയറ്റിലെ രണ്ട് ഒഴിവുകൾ നികത്തേണ്ടെന്നും തീരുമാനമെടുത്തട്ടുണ്ട്,​ വിശദീകരണ നോട്ടീസ് ലഭിച്ച 25 നേതാക്കളെ കീഴ് ഘടകങ്ങളിലേക്ക് തരംതാഴ്ത്തി.

വിഭാഗീയ പ്രവർത്തനങ്ങളെക്കുറിച്ച് അന്വേഷിക്കാൻ പാർട്ടി അന്വേഷണ കമ്മിഷനെ നിയോഗിച്ചിരുന്നു,​ ടി,​പി,​ രാമകൃഷ്ണൻ,​ പി.കെ. ബിജു എന്നിവർ അംഗങ്ങളായ കമ്മിഷൻ സമ്മേളനകാലത്ത് ജില്ലയിൽ കടുത്ത വിഭാഗീയത ഉണ്ടായി എന്ന് റിപ്പോർട്ട് നൽകിയിരുന്നു. ജില്ലാ സെക്രട്ടേറിയറ്റ് അംഗങ്ങളടക്കം 40 പേർ വിഭാഗീയ പ്രവ‌ർത്തനങ്ങളുടെ ഭാഗമായി എന്നും റിപ്പോർട്ടിൽ ചൂണ്ടിക്കാട്ടി. ഇതിന്റെ അടിസ്ഥാനത്തിലാണ് കടുത്ത നടപടികളിലേക്ക് സി.പി.എം നീങ്ങിയത്.