കോഴിക്കോട് എൻ.ജെ.പി.എം സ്കൂളിൽ പ്രവേശനോത്സവം

ഓടനാവട്ടം: പൂയപ്പള്ളി കോഴിക്കോട് എൻ.ജെ.പി.എം സ്കൂളിൽ പുതിയ അദ്ധ്യയനവർഷത്തെ വരവേറ്റുകൊണ്ട് വിപുലമായ രീതിയിൽ പ്രവേശനോത്സവം സംഘടിപ്പിച്ചു. വിദ്യാലയ മുറ്റത്തേക്ക് ആദ്യമായി കടന്നുവന്ന കുരുന്നുകളെ വർണ്ണ ബലൂണുകളും അക്ഷരത്തൊപ്പികളും നൽകിയാണ് അദ്ധ്യാപകരും പി.ടി.എ ഭാരവാഹികളും സ്വീകരിച്ചത്.

കുട്ടികൾ അക്ഷരദീപം തെളിച്ച ചടങ്ങിന്റെ ഉദ്ഘാടനം വാർഡ് മെമ്പർ ആർ.ജി. രെമി നിർവഹിച്ചു. പി.ടി.എ പ്രസിഡന്റ് സജി പുരുഷോത്തമൻ ചടങ്ങിൽ അദ്ധ്യക്ഷത വഹിച്ചു.

പൂയപ്പള്ളി ഗ്രാമപഞ്ചായത്ത് പ്രസിഡന്റ് എൽ. ശശികല, പഞ്ചായത്ത് അംഗം ബിൻസി തങ്കച്ചൻ, സ്കൂൾ മാനേജർ ജെ. ഗിരീഷ്‌കുമാർ, പ്രധാനാദ്ധ്യാപിക സിനി ജോൺ, വി.അരുൺകുമാർ, അശ്വതി അശോകൻ, ശ്രീജ ബോസ്, പി.എസ്. സുപ്രഭ തുടങ്ങിയവർ സംസാരിച്ചു. വിദ്യാലയത്തിലെ വിദ്യാർത്ഥിനിയായ ബി.എസ്.ദുർഗ അവതരിപ്പിച്ച പ്രവേശനോത്സവ ഗാനത്തിന്റെ ദൃശ്യാവിഷ്കാരം ചടങ്ങിൽ ശ്രദ്ധേയമായി.