ഇരട്ട സ്വർണവുമായി സാബിറുദ്ദീൻ

കൊല്ലം: ജില്ലാ സ്കൂൾ കായികമേളയിൽ തിളക്കമാർന്ന നേട്ടം സ്വന്തമാക്കി അസാം സ്വദേശിയായ സാബിറുദ്ദീൻ. ചവറ മുക്കുതോട് ഗവ. യു.പി.എസിലെ ഏഴാം ക്ലാസ് വിദ്യാർത്ഥിയാണ്. ലോംഗ് ജംപിലും 80 മീറ്റർ ഹർഡിൽസിലുമാണ് സാബിറുദ്ദീൻ സ്വർണമെഡലുകൾ നേടിയത്.
​നാലാം ക്ലാസ് മുതൽ ചവറ സ്കൂളിലെത്തിയ സാബിറുദ്ദീൻ, കഴിഞ്ഞ രണ്ട് വർഷമായി കായികരംഗത്തുണ്ട്. ലോംഗ് ജംപിൽ 4.97 മീറ്റർ ദൂരം താണ്ടിയാണ് ഒന്നാം സ്ഥാനം നേടിയത്. ​യു.പി സ്കൂളായതുകൊണ്ട് സ്വന്തമായി പരിശീലകനില്ല. എങ്കിലും, രണ്ടാഴ്ചയിൽ ഒരിക്കലെത്തുന്ന ബി.ആർ.സി ട്രെയിനർ അൽഫോൻസിയയുടെ നേതൃത്വത്തിലാണ് പരിശീലനം. സ്വന്തമായി ഗ്രൗണ്ടില്ലാത്തതിനാൽ സ്കൂളിന് സമീപമുള്ള പഞ്ചായത്ത് ഗ്രൗണ്ടിലാണ് പരിശീലനം. സ്കൂൾ പ്രഥമാദ്ധ്യാപിക പ്രിൻസിയുടെയും അദ്ധ്യാപകരുടെയും പൂർണ പിന്തുണയും നേട്ടത്തിന് പിന്നിലുണ്ട്.
​മൂന്നാം ക്ലാസ് വരെ അസാമിലായിരുന്നു സാബിറുദ്ദീന്റെ പഠനം. കേരളത്തിൽ ഡ്രൈവറായി ജോലി ചെയ്യുന്ന പിതാവ് കബീറുദ്ദീനൊപ്പം എട്ടുവർഷം മുമ്പാണ് കേരളത്തിലെത്തിയത്. മാതാവ് ജാസ്മിൻ. സഹോദരി മെഹ്ദിയ.