ചെങ്ങന്നൂർ - മാന്നാർ റൂട്ടിൽ ആശ്രയം സ്വകാര്യ ബസുകൾ തന്നെ കെ.എസ്.ആർ.ടി.സി സർവീസ് നിറുത്തിയിട്ട് വർഷങ്ങൾ

ചെങ്ങന്നൂർ: സംസ്ഥാനത്ത് ഇന്നലെ മുതൽ പ്രിയദർശിനി പദ്ധതിയിലൂടെ കെ.എസ്.ആർ.ടി.സിയിൽ സ്ത്രീകൾക്ക് സൗജന്യ യാത്ര ലഭ്യമാകുമ്പോൾ, ചെങ്ങന്നൂർ - മാന്നാർ റൂട്ടിലെ സ്ത്രീകൾക്ക് അതിന്റെ ഗുണഫലം ലഭിക്കാതെ പോകുകയാണ്. ചെങ്ങന്നൂരിൽ നിന്ന് ബുധനൂർ, ചെറിയനാട്, പാണ്ടനാട് വഴിയുള്ള മാന്നാർ റൂട്ടിലെ ഓർഡിനറി ഉൾപ്പെടെയുള്ള കെ.എസ്.ആർ.ടി.സി സർവീസുകൾ നിലച്ചിട്ട് വർഷങ്ങളായി. ഈ സർവീസുകൾ നിറുത്തലാക്കിയതാണ് സൗജന്യ യാത്രാ പദ്ധതിയുടെ പ്രയോജനം പ്രദേശത്തെ സ്ത്രീകൾക്ക് ലഭിക്കാതിരിക്കാൻ പ്രധാന കാരണം. നിലവിൽ സ്വകാര്യ ബസുകളെ ആശ്രയിച്ചാണ് യാത്ര നടക്കുന്നത്. അതിനാൽ പ്രിയദർശിനി പദ്ധതിയുടെ യഥാർത്ഥ ഗുണം ലഭ്യമാക്കാൻ ചെങ്ങന്നൂർ - മാന്നാർ റൂട്ടിൽ കെ.എസ്.ആർ.ടി.സി സർവീസുകൾ പുനഃസ്ഥാപിക്കണമെന്ന ആവശ്യം ശക്തമാകുകയാണ്. ചെങ്ങന്നൂർ ഡിപ്പോയിൽ നടന്ന ചടങ്ങ് നഗരസഭ അദ്ധ്യക്ഷൻ മനീഷ് കീഴാമഠത്തിൽ ഉദ്ഘാടനം ചെയ്തു. ഡി.ടി.ഒ ബിനു എം.അദ്ധ്യക്ഷത വഹിച്ചു.വാർഡ് കൗൺസിലർമാർ, ഉദ്യോഗസ്ഥർ

തുടങ്ങിയവർ ഉദ്ഘാടന ചടങ്ങിൽ പങ്കെടുത്തു.

...............................................................................................

ഞാൻ സ്ഥിരം കെഎസ് ആർടിസിയിൽ യാത്ര ചെയ്യുന്നയാളാണ്, സർക്കാരിന്റെ നല്ല തീരുമാനമാണ്. എനിക്ക് ദിവസവും 30 രൂപ ലാഭിക്കാം.

ആനന്ദവല്ലി

(തിട്ടമേൽ)​

.........................................

ഒരു ജനപ്രതിനിധി എന്ന നിലയിൽ കെ.എസ്.ആർ.ടി.സി ചെങ്ങന്നൂർ ഡിപ്പോയിൽ നടന്ന സർക്കാരിന്റെ ഉദ്ഘാടന ചടങ്ങിൽ പങ്കെടുത്തെങ്കിലും, ഒരു വനിത എന്ന നിലയിൽ ആദ്യ യാത്രയിൽ പങ്കെടുക്കാതെ യാത്ര ബഹിഷ്‌കരിക്കുകയാണ്.

സിനി ബിജു

(25-ാം വാർഡ്

കൗൺസിലർ)​

................................

ആദ്യ സർവീസ് കോട്ടയത്തേയ്ക്ക്

ചെങ്ങന്നൂർ ഡിപ്പോയിൽ നിന്നും സർവീസ് നടത്തുന്നത്

23 പ്രിയദർശിനി ബസുകൾ