ഓഹരി വിപണിയിൽ കുതിപ്പ്

കൊച്ചി: ആഗോള വാർത്തകളുടെ കരുത്തിൽ ഇന്ത്യൻ ഓഹരി വിപണി ഇന്നലെ ശക്തമായി തിരിച്ചുകയറി. ജിയോയുടെ പ്രാഥമിക ഓഹരി വിൽപ്പന(ഐ.പി.ഒ) റെക്കാഡ് നേട്ടത്തോടെ പൂർത്തിയാക്കിയതും ഫെഡറൽ റിസർവ് പലിശയിൽ മാറ്റം വരുത്താതിരുന്നതും വിപണിക്ക് നേട്ടമായി.

സെൻസെക്സ് 905.01 പോയിന്റ് (1.24%) ഉയർന്ന് 74,151.04ൽ ക്ലോസ് ചെയ്തു. നിഫ്റ്റി 237.90 പോയിന്റ് (1.05%) നേട്ടത്തോടെ 22,936.75ലെത്തി. ബാങ്കിംഗ്, ഐ.ടി, ഫാസ്‌റ്റ് മൂവിംഗ് കൺസ്യൂമർ ഉത്പന്നങ്ങൾ തുടങ്ങിയ മേഖലകളിലെ വാങ്ങലാണ് വിപണിക്ക് കരുത്തായത്.

അമേരിക്കൻ ഫെഡറൽ റിസർവ് പലിശനിരക്ക് 3.75–4 ശതമാനത്തിൽ മാറ്റമില്ലാതെ നിലനിർത്തിയത് നിക്ഷേപക മനോഭാവത്തെ പിന്തുണച്ചു. മികച്ച ത്രൈമാസ ഫലങ്ങളും സ്ഥാപന നിക്ഷേപകരുടെ വാങ്ങലും വിപണിക്ക് സഹായകമായി. കഴിഞ്ഞ ഏഴ് വ്യാപാര സെഷനുകളിൽ സെൻസെക്സും നിഫ്റ്റിയും ഏകദേശം രണ്ട് ശതമാനം നഷ്ടം നേരിട്ടിരുന്നു.

നിഫ്റ്റിയിൽ അദാനി പോർട്സ് 6.3 ശതമാനവും അദാനി എന്റർപ്രൈസസ് 5.2 ശതമാനവും ഉയർന്നു. കോട്ടക് മഹീന്ദ്ര ബാങ്ക്, പവർ ഗ്രിഡ് എന്നിവയും മികച്ച നേട്ടമുണ്ടാക്കി. വാഹന ഓഹരികളിൽ സമ്മർദം തുടർന്നു; ട്രെന്റ്, മാരുതി സുസുക്കി, ബജാജ് ഓട്ടോ എന്നിവ നഷ്ടത്തിലായി. മിഡ് ക്യാപ്, സ്മോൾ ക്യാപ് സൂചികകളും ഏകദേശം ഒരു ശതമാനം ഉയർന്നു.

എന്നാൽ പശ്ചിമേഷ്യൻ സംഘർഷവും ഉയർന്ന ക്രൂഡ് ഓയിൽ വിലയും വിപണിക്ക് മുന്നിലുള്ള പ്രധാന വെല്ലുവിളികളാണ്. ബ്രെന്റ് ക്രൂഡ് ബാരലിന് 114 ഡോളറിനു മുകളിലായതിനാൽ പണപ്പെരുപ്പത്തെയും കമ്പനികളുടെ ചെലവുകളെയും കുറിച്ചുള്ള ആശങ്ക തുടരുന്നു.