'തൂൺ ആണെങ്കിലെന്താ മാറിനിന്നൂടേ', പാർക്കിംഗ് തൂണിലിടിച്ച് ഇൻഡിഗോ വിമാനത്തിന്റെ മൂക്ക് തകർന്നു

ശ്രീനഗർ: പാർക്ക് ചെയ്യുന്നതിനിടെ പോസ്റ്റിലിടിച്ച് കയറി ഇൻഡിഗോ വിമാനത്തിന്റെ മൂക്ക് തകർന്നു. ശ്രീനഗർ വിമാനത്താവളത്തിൽ ഇന്നലെ രാവിലെ ഒമ്പതോടെയാണ് അസാധാരണ അപകടം. വിമാനത്തിന്റെ മുൻഭാഗത്തിന് ചെറിയ കേടുപാടുണ്ടായി. യാത്രക്കാരും ജീവനക്കാരും സുരക്ഷിതരാണ്. നവി മുംബയിൽനിന്ന് വന്നതാണ് 6 ഇ 225 വിമാനം. ബേ നമ്പർ 6ൽ പാർക്ക് ചെയ്യുന്നതിനിടെ വി.ഡി.ജി.എസ് തൂണിലേക്ക് (പാർക്കിംഗിന് സഹായിക്കുന്ന സ്ക്രീനുകളും ലേസറുകളുമുള്ള തൂൺ)​ഇടിച്ചുകയറുകയായിരുന്നു.

തൂൺ ഒരു വശത്തേക്ക് ചെരിഞ്ഞു. യാത്രക്കാരെ എയർക്രാഫ്റ്റ് സ്റ്രെയറിലൂടെ പുറത്തിറക്കി. അപകടകാരണം സംബന്ധിച്ച് വ്യക്തതയില്ല. അന്വേഷണം ആരംഭിച്ചു. അറ്റകുറ്റപ്പണികൾക്കായി വിമാനം സർവീസിൽ നിന്ന് മാറ്റി. ആവശ്യമായ അനുമതികൾ ലഭിച്ച ശേഷം സർവീസ് പുനരാരംഭിക്കുമെന്ന് ഇൻഡിഗോ അറിയിച്ചു.