ഹാലൻഡിനെ അനുകരിച്ചതല്ല; അഭിഷേകിന്റെ ‘മെഡിറ്റേഷൻ’ ആഘോഷത്തിന് പിന്നിലെ കാരണം ഇതാണ്

ന്യൂഡൽഹി: അഫ്ഗാനിസ്ഥാനെതിരായ മൂന്നാം ട്വന്റി 20യിൽ റെക്കോർഡ് സെഞ്ച്വറി നേടിയതിന് പിന്നാലെ ഇന്ത്യൻ ഓപ്പണർ അഭിഷേക് ശർമ നടത്തിയ ‘മെഡിറ്റേഷൻ’ ആഘോഷം വലിയ ശ്രദ്ധയാണ് നേടിയത്. മാഞ്ചസ്റ്റർ സിറ്റി താരം എർലിംഗ് ഹാലൻഡിന്റെ പ്രശസ്തമായ ആഘോഷത്തിന്റെ മാതൃകയിലായിരുന്നു അഭിഷേകിന്റെ ആഘോഷമെന്നാണ് ആദ്യം ആരാധകർ ഇതിനെ കരുതിയത്. എന്നാൽ, ഹാലൻഡിനെ അനുകരിക്കുകയായിരുന്നില്ലെന്നാണ് അഭിഷേക് ഇപ്പോൾ വ്യക്തമാക്കിയിരിക്കുന്നത്.

വെറും 30 പന്തിൽ നിന്നും ട്വന്റി 20യിലെ രണ്ടാമത്തെ അതിവേഗ സെഞ്ച്വറിയെന്ന റെക്കോർഡാണ് അഭിഷേക് ഇന്നലെ സ്വന്തമാക്കിയത്. രാജ്യാന്തര മത്സരത്തിൽ ഒരു ഇന്ത്യൻ താരം നേടുന്ന അതിവേഗ സെഞ്ച്വറി എന്ന റെക്കോർഡ് രോഹിത് ശർമയിൽനിന്ന് അഭിഷേക് സ്വന്തമാക്കുകയും ചെയ്തു. 2017ൽ ശ്രീലങ്കയ്ക്കെതിരെ 35 പന്തിൽ സെഞ്ച്വറി നേടിയ രോഹിത്തിന്റെ റെക്കോർഡാണ് അഭിഷേക് മറികടന്നത്. 10 സിക്സുകളും ഒൻപത് ഫോറുകളും ഉൾപ്പെടുന്നതായിരുന്നു അഭിഷേകിന്റെ സെഞ്ച്വറി.

സെഞ്ച്വറി പൂർത്തിയാക്കിയതിന് പിന്നാലെ ഗ്രൗണ്ടിൽ കണ്ണുകളടച്ച് മെഡിറ്റേഷൻ ചെയ്യുന്നത് പോലെ ഇരുന്നായിരുന്നു അഭിഷേകിന്റെ ആഘോഷം. ഈ ദൃശ്യം ഹാലൻഡിന്റെ ഗോൾ ആഘോഷത്തെ ഓർമിപ്പിച്ചതായാണ് സോഷ്യൽ മീഡിയ വിലയിരുത്തിയത്. എന്നാൽ അങ്ങനെയല്ലെന്നും കഴിഞ്ഞ ആറ് മാസം മുതൽ ഒരു വർഷത്തോളമായി താൻ മെഡിറ്റേഷനും ‘മാനിഫെസ്റ്റേഷനും’ പരിശീലിക്കുന്നുണ്ടെന്നും അഭിഷേക് വ്യക്തമാക്കി.

ക്രിക്കറ്റിൽ മത്സരിക്കുമ്പോൾ ഉയർച്ചകളും താഴ്ചകളും ഉണ്ടാകുമെന്നും അത്തരം സമ്മർദ്ദങ്ങൾക്കിടയിൽ മനസിനെ സ്ഥിരതയോടെ നിലനിർത്താൻ മെഡിറ്റേഷൻ തന്നെ ഏറെ സഹായിച്ചിട്ടുണ്ടെന്നുമാണ് അഭിഷേക് പറഞ്ഞത്. മെഡിറ്റേഷൻ തനിക്ക് നൽകിയ ഗുണം മറ്റുള്ളവരിലേക്കും എത്തിക്കണമെന്ന ആഗ്രഹമാണ് ആ ആഘോഷത്തിന് പിന്നിലെന്നും താരം വ്യക്തമാക്കി.