'അവരോട് എനിക്ക് ബഹുമാനമുണ്ട്',​ ആ രഹസ്യത്തിനുള്ള ഉത്തരം ഇത്; പ്രീതി സിന്റ - ബ്രെറ്റ് ലീ പ്രണയകഥയ്ക്ക് ഒടുവിൽ മറുപടി

മുംബയ്: ക്രിക്കറ്റ് ചരിത്രത്തിലെ തന്നെ എക്കാലത്തെയും മികച്ച പേസർമാരിലൊരാളാണ് ബ്രെറ്റ് ലീ. ലോകക്രിക്കറ്റിലെ ഏറ്റവും അപകടകാരിയായ ബൗളർമാർ ആരൊക്കയെന്ന് ചോദിച്ചാൽ ഉറപ്പായും ബ്രെറ്റ് ലീയുടെ പേരും അതിൽ ഉൾപ്പെടും. ബൗളിംഗ് സമയത്ത് മണിക്കൂറിൽ 160 കിലോമീറ്ററിലേറെയാണ് താരത്തിന്റെ വേഗത. ഓസ്ട്രേലിയൻ ടീമെന്ന് കേട്ടാൽ പേടിച്ചിരുന്ന കാലഘട്ടത്തിൽ ടീമിന്റെ വിജയങ്ങളിൽ നിർണായക പങ്കുവഹിച്ചിരുന്ന താരമാണ് അദ്ദേഹം. ഇപ്പോൾ വർഷങ്ങളായി പ്രചരിച്ചിരുന്ന ഒരു വ്യക്തിജീവിത അഭ്യൂഹത്തെക്കുറിച്ച് തുറന്നുപറഞ്ഞുകൊണ്ട് സമൂഹമാദ്ധ്യമങ്ങളിൽ ഇടംനേടുകയാണ് ബ്രെറ്റ് ലീ.

2008ൽ ഐപിഎൽ ആരംഭിച്ച സമയത്തുള്ള ഒരു പ്രണയകഥയ്ക്കാണ് അദ്ദേഹം ഉത്തരം നൽകിയിരിക്കുന്നത്. ബോളിവുഡ് നടി പ്രീതി സിന്റയുമായി താരം പ്രണയത്തിലായിരുന്നുവെന്നാണ് പ്രചരിച്ചിരുന്നത്. വർഷങ്ങളായി ഉത്തരമില്ലാതെ തുടർന്ന വാർത്തകളുടെ രഹസ്യമാണ് ബ്രെറ്റ് ലീ വെളിപ്പെടുത്തിയത്. ഐപിഎൽ ആദ്യ സീസണിൽ കിംഗ്സ് ഇലവൻ പഞ്ചാബിന്റെ ഉടമകളിൽ ഒരാളായിരുന്ന പ്രീതി സിന്റയും അതേ ടീമിനുവേണ്ടി കളിച്ചിരുന്ന ബ്രെറ്റ് ലീയും തമ്മിൽ പ്രണയത്തിലാണെന്ന തരത്തിലുള്ള വാർത്തകളാണ് പ്രചരിച്ചിരുന്നത്.

ഇരുവരും ഒരുമിച്ചുള്ള ചിത്രങ്ങളും ആരാധകർ ഏറ്റെടുത്തിരുന്നു. 2010വരെ പഞ്ചാബ് ടീമിനുവേണ്ടി കളിച്ച താരം 2011ൽ കൊൽക്കത്ത നൈറ്റ് റൈഡേഴ്സിലേക്ക് മാറി. നിരവധി ഐപിഎൽ സീസണുകളിൽ ബ്രെറ്റ് ലീയെയും പ്രീതി സിന്റയെയും ബന്ധപ്പെടുത്തി പ്രണയകഥകൾ പ്രചരിച്ചിരുന്നു. എന്നാൽ ഇതുവരെ അതേക്കുറിച്ച് അദ്ദേഹം പരസ്യമായി പ്രതികരിച്ചിരുന്നില്ല. വർഷങ്ങൾക്ക് ശേഷം ആദ്യമായി അഭ്യൂഹങ്ങൾക്ക് മറുപടി നൽകിയിരിക്കുകയാണ് ബ്രെറ്റ് ലീ.