ആദ്യ മത്സരത്തിലെ ഹീറോ, അവസാന കളിയിൽ നാല് റൺസിന് പുറത്ത്; സഞ്ജുവിന് പിഴച്ചതെവിടെ? വീഴ്‌ച ചൂണ്ടിക്കാട്ടി മുൻ താരം

ഹാമിൽട്ടൺ: ന്യൂസിലൻഡിനെതിരായ ട്വന്റി20 പരമ്പരയിൽ ഇന്ത്യ 3-2ന് വിജയിച്ചെങ്കിലും സഞ്ജു സാംസണ് പ്രതീക്ഷിച്ച പ്രകടനം പുറത്തെടുക്കാനായില്ലെന്ന് വിമർശനം ശക്തമാവുകയാണ്. അഞ്ച് മത്സരങ്ങളിൽനിന്ന് 107 റൺസ് മാത്രമാണ് സഞ്ജുവിന് നേടാനായത്. ആദ്യ മത്സരത്തിൽ 67 റൺസ് നേടി ഇന്ത്യയുടെ വി‌ജയത്തിൽ നിർണായക പങ്കുവഹിച്ച താരം പിന്നീട് തുടർച്ചയായി നിരാശപ്പെടുത്തുകയായിരുന്നു. പരമ്പരയിലെ അവസാന രണ്ട് മത്സരങ്ങളിലും ഒറ്റയക്ക സ്‌കോറിനാണ് സഞ്ജു പുറത്തായത്. പരമ്പരയിലെ അവസാന മത്സരത്തിൽ ടീമിനെ തോൽവിയിലേക്ക് നയിച്ചതിൽ സഞ്ജുവിന്റെ മോശം പ്രകടനവും കാരണമായെന്നാണ് വിമർശനം.

അഞ്ചാം ട്വന്റി20 മത്സരത്തിൽ വെറും നാല് റൺസെടുത്ത് പുറത്തായ സഞ്ജുവിന്റെ ബാറ്റിംഗ് ശൈലിയെ ചോദ്യം ചെയ്‌ത് രംഗത്തെത്തിയിരിക്കുകയാണ് ഇന്ത്യൻ ക്രിക്കറ്റിലെ മുൻ താരം ഹനുമ വിഹാരി. പത്ത് പന്തുകൾ നേരിട്ട സഞ്ജുവിനെ ന്യൂസിലൻഡ് പേസർ ആദം മിൽനെയാണ് പുറത്താക്കിയത്. സഞ്ജു ക്രീസിൽനിന്ന് ഏറെ പിന്നിലേക്ക് മാറിനിന്ന് പന്ത് സ്വിങ് ചെയ്യാൻ അനുവദിച്ചെന്നും പന്തിന്റെ ദിശയ്‌ക്ക് കുറുകെ ഷോട്ട് കളിക്കാൻ ശ്രമിക്കരുതായിരുന്നെന്നും വിഹാരി അഭിപ്രായപ്പെട്ടു.

'സഞ്ജു ക്രീസിൽ പിന്നിലേക്ക് മാറിനിന്ന് പന്ത് സ്വിങ് ചെയ്യാൻ അനുവദിച്ചു. പന്തിന്റെ ദിശയ്‌ക്ക് കുറുകെ ഷോട്ട് കളിക്കാൻ അദ്ദേഹം ശ്രമിക്കരുതായിരുന്നു. ഈ പരമ്പരയിൽ സഞ്ജുവിന്റെ പ്രകടനം സ്ഥിരതയില്ലാത്തതായിരുന്നു. വീണ്ടും ചില മത്സരങ്ങളിൽ പരാജയപ്പെട്ടു'- വിഹാരി തന്റെ യൂട്യൂബ് ചാനലിൽ പറ‌ഞ്ഞു.

പരമ്പരയിലുടനീളം ഇന്ത്യയുടെ ഒന്നാം നമ്പർ ഓപ്പണറായി സഞ്ജുവിനെ നിലനിർത്തിയിരുന്നു. ഇഷാൻ കിഷൻ ഒരു മത്സരത്തിൽ പുറത്തിരുന്നപ്പോൾ സഞ്ജുവിനെ മൂന്നാം നമ്പറിലേക്ക് മാറ്റിയെങ്കിലും ഇഷാൻ തിരിച്ചെത്തിയതോടെ സഞ്ജു വീണ്ടും ഓപ്പണിംഗ് സ്ഥാനത്തേക്ക് മടങ്ങിയെത്തി. വൈഭവ് സൂര്യവംശി മികച്ച പ്രകടനം കാഴ്‌ചവച്ചിട്ടും സഞ്ജുവിന്റെ തകർപ്പൻ ബാറ്റിംഗിനും മത്സരങ്ങൾ ഒറ്റയ്‌ക്ക് ജയിപ്പിക്കാനുള്ള കഴിവിനുമാണ് ടീം മാനേജ്‌മെന്റ് മുൻഗണന നൽകുന്നതെന്നാണ് ആരാധകരുടെ വിലയിരുത്തൽ.

അതേസമയം, പരമ്പരയിൽ കിടിലൻ സെഞ്ച്വറി നേടിയ അഭിഷേക് ശർമ്മയ്‌ക്കും അഞ്ചാം ട്വന്റി20യിൽ തിളങ്ങാനായില്ല. ആദം മിൽനെയുടെ പന്തിൽ ഒരു റൺസ് മാത്രമെടുത്താണ് അഭിഷേക് പുറത്തായത്. തിടുക്കത്തിൽ കളിക്കാൻ ശ്രമിച്ചതാണ് അഭിഷേകിന്റെ പരാജയത്തിന് കാരണമെന്നാണ് വിഹാരിയുടെ വിമർശനം.

അഭിഷേകിനും സഞ്ജുവിനും മികച്ച തുടക്കം ലഭിക്കാതിരുന്നതോടെ ക്യാപ്‌റ്റൻ ശ്രേയസ് അയ്യരും ഇഷാൻ കിഷനുമാണ് ഇന്ത്യയുടെ ഇന്നിംഗ്‌സിന് വേഗം പകർന്നത്. ശ്രേയസ് 23 പന്തിൽ 50 റൺസും ഇഷാൻ 32 പന്തിൽ 61 റൺസും നേടി. ഇരുവരുടെയും മികവിൽ ഇന്ത്യ 191 റൺസെന്ന മികച്ച സ്‌കോർ പടുത്തുയർത്തിയെങ്കിലും ന്യൂസിലൻഡിന് മറുപടി ബാറ്റിംഗിൽ ഈ ലക്ഷ്യം അനായാസം മറികടക്കാനായി. ഇതോടെ പരമ്പര ഇന്ത്യ സ്വന്തമാക്കിയെങ്കിലും അവസാന മത്സരത്തിലെ തോൽവി ടീമിന് നിരാശയായി.