പിടി തരാതെ ഇൻഫ്ലുവൻസ

കൊച്ചി: ജില്ലയിൽ ഇൻഫ്ലുവൻസ വ്യാപനം തുടരുന്നു. സെപ്തംബർ 14 വരെ 604 ഇൻഫ്ലുവൻസ കേസുകൾ റിപ്പോർട്ട് ചെയ്തു. സംസ്ഥാനത്തും രോഗബാധ തുടരുകയാണ്.

സെപ്തംബർ മാസത്തിൽ സംസ്ഥാനത്തെ ആകെ കേസുകൾ 1,406 ആയി. 13ന് ഇത് 1,362ഉം 12ന് 1,309ഉം ആയിരുന്നു. 14ൽ രണ്ട് ഇൻഫ്ലുവൻസ കേസുകളാണ് രേഖപ്പെടുത്തിയിരിക്കുന്നത്. 13ന് 22 കേസുകളും 12ന് 47 കേസുകളുമായിരുന്നു.

ആഗസ്റ്റിൽ എറണാകുളത്ത് 954 ഇൻഫ്ലുവൻസ കേസുകൾ റിപ്പോർട്ട് ചെയ്തിരുന്നു. സെപ്റ്റംബർ ആദ്യ അഞ്ച് ദിവസങ്ങളിൽ മാത്രം 274 കേസുകളും റിപ്പോർട്ട് ചെയ്തു. ആഗസ്റ്റ് 28 മുതൽ സെപ്തംബർ 3 വരെയുള്ള ഏഴ് ദിവസങ്ങളിൽ 376 കേസുകളാണ് ജില്ലയിൽ റിപ്പോർട്ട് ചെയ്തത്. ആഗസ്റ്റ് 28ന് 65, 29ന് 73, 30ന് 54, 31ന് 11, സെപ്തംബർ ഒന്നിന് 31, രണ്ടിന് 101, മൂന്നിന് 41 എന്നിങ്ങനെയായിരുന്നു പ്രതിദിന കണക്ക്. എട്ടിന് 88, ഒമ്പതിന് 39, പത്തിന് 44, 11ന് 24 കേസുകളും റിപ്പോർട്ട് ചെയ്തു.

2026ലെ ഇതുവരെയുള്ള കണക്കിലും ഇൻഫ്ലുവൻസ ശ്രദ്ധേയമാണ്. 14ലെ ആരോഗ്യവകുപ്പ് റിപ്പോർട്ട് പ്രകാരം സംസ്ഥാനത്ത് ഈ വർഷം ഇതുവരെ 10,176 ഇൻഫ്ലുവൻസ കേസുകളും 108 മരണങ്ങളും റിപ്പോർട്ട് ചെയ്തു. 14ന് മാത്രം സംസ്ഥാനത്ത് ഇൻഫ്ലുവൻസയെ തുടർന്ന് ഒരു മരണം രേഖപ്പെടുത്തിയിട്ടുണ്ട്. മൂന്ന് ദിവസത്തിനിടെ കേസുകളിൽ 97ന്റെ വർദ്ധനയാണ്.

ഒപ്പം മറ്റ് പകർച്ചവ്യാധികളും

ഇൻഫ്ലുവൻസയ്ക്കൊപ്പം മറ്റ് പകർച്ചവ്യാധികളും സംസ്ഥാനത്ത് റിപ്പോർട്ട് ചെയ്യുന്നുണ്ട്. 14ലെ കണക്കിൽ 14 ഡെങ്കിപ്പനി കേസുകളും 11 എലിപ്പനി കേസുകളും സ്ഥിരീകരിച്ചു. ഈ വർഷം ഇതുവരെ ഡെങ്കിപ്പനി സ്ഥിരീകരിച്ചവർ 10,742 ആണ്. ഡെങ്കിപ്പനി മൂലം 40 മരണങ്ങളും റിപ്പോർട്ട് ചെയ്തിട്ടുണ്ട്. എലിപ്പനി കേസുകൾ 2,025ഉം മരണങ്ങൾ 99ഉം ആണ്. വയനാട്ടിൽ എലിപ്പനി സംശയിക്കുന്ന രണ്ട് മരണങ്ങളും രേഖപ്പെടുത്തിയിട്ടുണ്ട്.

രോഗലക്ഷണങ്ങളുള്ളവർ മറ്റുള്ളവരുമായി അടുത്തിടപഴകുന്നത് ഒഴിവാക്കണം

 തിരക്കേറിയ സ്ഥലങ്ങളിൽ മാസ്ക് ധരിക്കണം

 കൈകളുടെ ശുചിത്വം പാലിക്കണം.

കുട്ടികൾ, വയോധികർ, മറ്റ് ആരോഗ്യപ്രശ്നങ്ങളുള്ളവർ എന്നിവർ പ്രത്യേകം ശ്രദ്ധിക്കണം.

ഇൻഫ്ലുവൻസ സ്ഥിരീകരിച്ചത്

കാലയളവ്, കേസുകൾ

 ആഗസ്റ്റ് 954

 ആഗസ്റ്റ് 28-സെപ്തംബർ 3 വരെ - 376

 സെപ്തംബർ 1-5 വരെ - 274

 സെപ്തംബർ 14 വരെ - 604