ഉപഭോക്താവിനെ പറ്റിക്കരുത്: ഇ-കൊമേഴ്സ് നിയമങ്ങളിൽ കർശന ഭേദഗതി

ന്യൂഡൽഹി: ഓൺലൈൻ വ്യാപാരങ്ങളിൽ ഉപഭോക്താക്കളുടെ അവകാശങ്ങൾ സംരക്ഷിക്കാൻ ലക്ഷ്യമിട്ട്

ഇ-കൊമേഴ്‌സ് നിയമങ്ങളിൽ കർശന ഭേദഗതിയുമായി

കേന്ദ്രഉപഭോക്തൃകാര്യ മന്ത്രാലയം.

ഇ-കൊമേഴ്‌സ് മേഖലയുമായി ബന്ധപ്പെട്ട പരാതികൾ ഉയരുന്ന സാഹചര്യത്തിലാണിത്. ചട്ടങ്ങൾ 2027 ജനുവരി ഒന്നു മുതൽ പ്രാബല്യത്തിലാകും.

നിർദ്ദേശങ്ങൾ:

വിലക്കുറവ് പ്രഖ്യാപിക്കുമ്പോൾ, കുറഞ്ഞ വിലയും ഒരു മാസം മുൻപ് ആ ഉൽപന്നത്തിന്(സേവനത്തിന്) നൽകിയ കുറഞ്ഞ വിലയും പ്രദർശിപ്പിക്കണം.

ഉപഭോക്താക്കൾ ഉൽപന്നങ്ങളുടെ വിവരങ്ങൾ തിരയുന്നതിന്റെ ഡാറ്റ ദുരുപയോഗപ്പെടുത്താൻ പാടില്ല.
കമ്പനി പണം വാങ്ങി പ്രാധാന്യത്തോടെ നൽകുന്ന സ്പോൺസേർഡ് ഉൽപന്നങ്ങളുടെ പട്ടികയും സാധാരണ പട്ടികയും തിരിച്ചറിയാനാകണം,
ഉപഭോക്താവിന് താത്പര്യമില്ലാത്ത സാധനങ്ങൾ വാങ്ങിപ്പിക്കാനുള്ള തന്ത്രങ്ങൾ പാടില്ല.

സ്ഥാപനങ്ങൾ എല്ലാവർഷവും സ്വയം ഓഡിറ്റ് നടത്തണം. സർട്ടിഫിക്കറ്റ് വ്യക്തമായി പ്രദർശിപ്പിക്കണം.
ഉൽപ്പന്നം വിൽക്കുന്നവരുടെ വിവരങ്ങൾ, ഉൽപന്നങ്ങൾ ഉപയോഗിച്ചിരിക്കേണ്ട കാലാവധി, റിട്ടേൺ, റീഫണ്ട് നിബന്ധനകൾ, വാറന്റി, ഡെലിവറി, പണമിടപാട് വിശദാംശങ്ങൾ തുടങ്ങിയ വിവരങ്ങളും നൽകണം.

ഇറക്കുമതി ചെയ്തവ ഏതു രാജ്യത്തു നിന്നാണെന്ന് വെളിപ്പെടുത്തണം.

ഇ-കൊമേഴ്‌സ് സ്ഥാപനങ്ങൾ ഉപഭോക്തൃവിവരങ്ങൾ മാർക്കറ്റിംഗ് ആവശ്യങ്ങൾക്കായി സമ്മതമില്ലാതെ ഉപയോഗിക്കരുത്.

ലോയൽറ്റി അല്ലെങ്കിൽ അംഗത്വ പ്രോഗ്രാമുകൾക്കായുള്ള നിർദ്ദിഷ്ടവ്യവസ്ഥയ്ക്ക് കീഴിലല്ലാതെ, ഇ-കൊമേഴ്‌സ് പ്ലാറ്റ്‌ഫോമുമായി ബന്ധമില്ലാത്ത സേവനങ്ങൾക്കായി ഒന്നിച്ച് പണം വാങ്ങരുത്.