കോഹ്‌ലിക്ക് പകരം ക്യാപ്‌റ്റൻ സ്ഥാനത്തേക്ക് മറ്റൊരു താരം; ആർസിബിയിൽ നടന്ന വമ്പൻ നീക്കത്തെക്കുറിച്ച് വെളിപ്പെടുത്തൽ

'ഞാൻ ഇതുവരെ ഇക്കാര്യം തുറന്നുപറഞ്ഞിട്ടില്ല. എന്നാൽ, മൊയീൻ അലി ഒരു അഭിമുഖത്തിൽ ഇതേക്കുറിച്ച് പറഞ്ഞിരുന്നു. അടുത്ത വർഷത്തെ സീസണിൽ നായകസ്ഥാനത്തേക്ക് എന്നെ പരിഗണിക്കുന്നുണ്ടെന്നും തയ്യാറായിരിക്കണമെന്നും പറഞ്ഞിരുന്നു. അന്ന് എന്നെ അക്കാര്യം അറിയിച്ച ആഷിഷ് നെഹ്‌റയെയും ഗാരി കിർസ്റ്റണെയും അടുത്ത സീസണിന് മുൻപ് മാറ്റി. പുതിയ പരിശീലകർ എത്തിയതോടെ ആ സീസണിൽ ഒരു മത്സരത്തിൽപ്പോലും എനിക്ക് കളിക്കാൻ അവസരം ലഭിച്ചില്ല'- പാർഥിവ് പറഞ്ഞു.

ആർസിബിയുടെ മുൻ താരമായ ഇംഗ്ലണ്ട് ഓൾറൗണ്ടർ മൊയീൻ അലിയും നേരത്തെ സമാനമായ വെളിപ്പെടുത്തൽ നടത്തിയിരുന്നു. 2019 ഐപിഎല്ലിൽ കോഹ്‌ലിയെ നായകസ്ഥാനത്തുനിന്ന് മാറ്റി പാർഥിവ് പട്ടേലിനെ ക്യാപ്‌റ്റനാക്കാൻ ഫ്രാഞ്ചൈസി ആലോചിച്ചിരുന്നതായാണ് വെളിപ്പെടുത്തൽ.

'പാർഥിവിനെ ആർസിബിയുടെ നായകനാക്കാൻ ആലോചിച്ചിരുന്നു. ഗാരി കിർസ്റ്റൺ പരിശീലകനായിരുന്ന അവസാന വർഷത്തിലായിരുന്നു അത്. ക്രിക്കറ്റിനെക്കുറിച്ച് മികച്ച ധാരണയുള്ള താരമായിരുന്നു അദ്ദേഹം. അക്കാലത്ത് ഇതേക്കുറിച്ച് ചർച്ചകളുണ്ടായിരുന്നു. എന്നാൽ, പിന്നീട് എന്ത് സംഭവിച്ചെന്നോ എന്തുകൊണ്ട് ആ തീരുമാനം നടപ്പാക്കാതിരുന്നെന്നോ എനിക്കറിയില്ല. എങ്കിലും നായകസ്ഥാനത്തേയ്‌ക്ക് പാർഥിവിനെ ഗൗരവമായി പരിഗണിച്ചിരുന്നെന്നാണ് എന്റെ വിശ്വാസം'- എന്നാണ് മൊയീൻ സ്‌പോർട്‌സ് തക്കിന് നൽകിയ അഭിമുഖത്തിൽ പറഞ്ഞത്.

എന്നാൽ, ഈ നീക്കങ്ങളൊന്നും യാഥാർത്ഥ്യമായില്ല. 2019 സീസണിലും കോഹ്‌ലി ആർസിബിയുടെ നായകനായി തുടർ‌ന്നു. 2021 സീസണിനുശേഷമാണ് ജോലിഭാരം നിയന്ത്രിക്കുന്നതിന്റെ ഭാഗമായി അദ്ദേഹം നായകസ്ഥാനം ഒഴിഞ്ഞത്. പിന്നീട് രജത് പാട്ടിദാറിന്റെ നേതൃത്വത്തിൽ നേടിയ ഐപിഎൽ കിരീടം തുടർന്നുള്ള സീസണിൽ ആർസിബി നിലനിർത്തുകയും ചെയ്‌തു. വർഷങ്ങൾക്കുശേഷം പുറത്തുവരുന്ന പാർഥിവിന്റെ വെളിപ്പെടുത്തൽ കോഹ്‌ലിയുടെ ആർസിബി നായകത്വത്തെ ചുറ്റിപ്പറ്റിയുള്ള പഴയ ചർച്ചകൾക്ക് വീണ്ടും വഴിവച്ചിരിക്കുകയാണ്.