കൊവിഡിനെ പ്രതിരോധിക്കാൻ ആമ രക്തം കുടിച്ചു, അഞ്ചു മാസം പ്രായമുള്ള കുഞ്ഞ് മരിച്ചു, മാതാപിതാക്കൾ ഗുരുതരാവസ്ഥയിൽ

കൊവിഡിനെ പ്രതിരോധിക്കാൻ ആമ രക്തം കുടിച്ച അഞ്ചു മാസം പ്രായമുള്ള കുഞ്ഞ് മരിച്ചു. ഡൊമിനിക്കൻ റിപ്പബ്ലിക്കിലാണ് സംഭവം. വ്യാജ ഡോക്ടറുടെ നിർദ്ദേശം അനുസരിച്ചാണ് മാതാപിതാക്കൾ കുഞ്ഞിന് ആമ രക്തം നല്‍കിയത്. അവശ നിലയിലായ കുഞ്ഞിന്റെ ഏഴ് വയസുള്ള മൂത്ത സഹോദരിയേയും മാതാപിതാക്കളേയും ആശുപത്രിയിൽ പ്രവേശിപ്പിച്ചു.

ഹെയ്തിയൻ ഡോക്ടറാണ് ഇവർക്ക് ആമ രക്തം നിർദേശിച്ചത്. ആമ രക്തം കുടിച്ച്‌ അബോധാവസ്ഥയിലായ കുഞ്ഞിനെ ഉടൻതന്നെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. കുട്ടിയുടെ മാതാപിതാക്കളുടേയും സഹോദരിയുടെയും നില ഗുരുതരമായി തുടരുകയാണ്. ഡൊമിനിക്കൻ റിപ്പബ്ലിക്കിന്റേയും ഹെയ്ത്തിയുടേയും അതിർത്തിയിലാണ് സംഭവം. 2012ലും ഇവരുടെ കുടുംബത്തിലെ നാലു കുട്ടികൾ വ്യാജ ഡോക്ടറുടെ ചികിത്സയ്ക്കിരയായി മരിച്ചിരുന്നു.