സി.പി.എം മാടായി ഏരിയാ സെക്രട്ടറി  വി. വിനോദ് അന്തരിച്ചു

പഴയങ്ങാടി: സി.പി.എം മാടായി ഏരിയ സെക്രട്ടറി വി. വിനോദ് (56) അന്തരിച്ചു. അർബുദ രോഗം ബാധിച്ച് ചികിത്സയിലായിരുന്നു. ഇന്നലെ രാവിലെ 5ന് ചെറുകുന്ന് മിഷൻ ഹോസ്പിറ്റലിലായിരുന്നു അന്ത്യം. രോഗാവസ്ഥയിലും പൊതുരംഗത്ത് സജീവമായിരുന്നു.

മാടായി ലോക്കലിൽ സി.പി.എം സംഘടനാ പ്രവർത്തനം സജീവമാക്കുന്നതിൽ നിർണായക പങ്കുവഹിച്ചു. ബാലസംഘം കണ്ണൂർ ജില്ലാ പ്രസിഡന്റ്, എസ്.എഫ്.ഐ ജില്ലാ പ്രസിഡന്റ്, ജില്ലാ സെക്രട്ടറി, സംസ്ഥാന സെക്രട്ടേറിയറ്റ് അംഗം, ഡി.വൈ.എഫ്.ഐ ജില്ലാ എക്സിക്യൂട്ടീവ് അംഗം, ബാലസംഘം ജില്ലാ രക്ഷാധികാരി, മാടായി പഞ്ചായത്ത് അംഗം തുടങ്ങിയ നിലകളിൽ പ്രവർത്തിച്ചു. സി.പി.എം. മാടായി ലോക്കൽ സെക്രട്ടറിയായും കുറച്ചുകാലം കുഞ്ഞിമംഗലം നോർത്ത് ലോക്കൽ സെക്രട്ടറിയായും ചുമതല നിർവ്വഹിച്ചു. 2023 ഡിസംബർ മുതൽ മാടായി ഏരിയ സെക്രട്ടറി സ്ഥാനം വഹിക്കുന്നു.
പരേതരായ ചമ്മഞ്ചേരി കുഞ്ഞിനാരായണൻ നമ്പ്യാർ, വി. ലക്ഷ്മിക്കുട്ടിയമ്മ ദമ്പതികളുടെ മകനാണ്. ഭാര്യ: പി. ദീപ. മക്കൾ: ഡി.വി നീരജ്, ഡി.വി നിവേദ് (ഇരുവരും വിദ്യാർത്ഥികൾ). സഹോദരങ്ങൾ: സരള, മുരളി, ശശിധരൻ, അഡ്വ. സുരേഷ് നമ്പ്യാർ.