തുറന്നിട്ട ഓട അടയ്ക്കുന്നില്ല ... ആരെങ്കി​ലും വീഴട്ടെ, എന്നി​ട്ട് അടയ്‌ക്കാം!

​കൊല്ലം: റെയിൽവേ സ്റ്റേഷൻ കർബല റോഡിൽ നിന്ന് പൊലീസ് ക്യാമ്പിലേക്ക് തിരിയുന്ന ഭാഗത്ത് മഴക്കാലപൂർവ്വ ശുചീകരണത്തിന്റെ ഭാഗമായി തുറന്ന ഓടകൾ അതേപടി​ കി​ടക്കുന്നത് അപകടഭീഷണിയായി​. മാറ്റി​യ പഴയ സ്ലാബുകൾക്ക് പകരം സ്ഥാപി​ക്കാൻ അധികൃതർ തയ്യാറാകുന്നി​ല്ല.

വളരെ വൈകി മാത്രം ശുചീകരണ പ്രവർത്തനങ്ങൾ തുടങ്ങിയ ഈ ഭാഗത്ത്, നിലവിൽ ഓട പല ഭാഗത്തും തുറന്നുകിടക്കുകയാണ്. ചെറിയൊരു മഴ പെയ്താൽ പോലും കനത്ത വെള്ളക്കെട്ട് രൂപപ്പെടുന്ന ഇവിടെ, ഈ സമയം ഓടയും റോഡും തി​രി​ച്ചറി​യാനാവാത്ത അവസ്ഥയാവും.

​ റെയിൽവേ സ്റ്റേഷനിൽ എത്തുന്ന യാത്രക്കാരും വിവിധ സർക്കാർ സ്ഥാപനങ്ങളിൽ എത്തുന്നവരുമടക്കം നൂറുകണക്കിന് ആളുകൾ രാത്രിയെന്നോ പകലെന്നോ ഇല്ലാതെ ആശ്രയിക്കുന്ന വളരെ തിരക്കേറിയ റോഡാണിത്. ദീർഘദൂര സർവീസുകൾ അവസാനിക്കുന്ന ഭാഗമായതിനാൽ നിരവധി യാത്രക്കാരാണ് ഇതുവഴി കടന്നുപോകുന്നത്. വഴി പരിചയമില്ലാത്തവർ വെള്ളക്കെട്ടി​ലൂടെ നടക്കുമ്പോൾ തുറന്നുകി​ടക്കുന്ന ഓടയി​ൽ വീഴാനുള്ള സാദ്ധ്യത ഏറെയാണ്. റോഡിനോട് ചേർന്ന് വശങ്ങളിൽ വാഹനങ്ങൾ പാർക്ക് ചെയ്യുന്നതി​നാൽ കാൽനടയാത്രക്കാർ റോഡിലേക്ക് ഇറങ്ങി നടക്കേണ്ടി വരുന്നു. ഓടയി​ൽ വെള്ളം നി​റയുമ്പോൾ ജീവൻ പണയം വെച്ചാണ് ഇതുവഴി​യുള്ള യാത്ര.

...................................................

 അപകട സ്ഥലം: റോഡിനോട് ചേർന്നുള്ള വളവിലാണ് അപകടക്കെണി.

 ഭീഷണി: മാലിന്യവും വെള്ളവും നിറഞ്ഞ ഓട തുറന്നു കിടക്കുന്നു

 അപകട സാദ്ധ്യത: വാഹനങ്ങൾ തിരിയുമ്പോഴോ ആളുകൾ നടക്കുമ്പോഴോ എപ്പോൾ വേണമെങ്കിലും ഓടയി​ൽ ചാടാം

 നാട്ടുകാരുടെ ആവശ്യം 1: മഴ കനക്കുന്നതിന് മുൻപ് തന്നെ പുതിയ സ്ലാബുകൾ അടിയന്തരമായി സ്ഥാപിക്കണം.

 ആവശ്യം 2: കാൽനടയാത്രക്കാരുടെ സുരക്ഷ ഉറപ്പാക്കണം.