മലയിൻകീഴ് മേഖലകളിൽ തെരുവ് നായ്ക്കളുടെ ശല്യം

മലയിൻകീഴ്: ഗ്രാമ പ്രദേശങ്ങളിൽ തെരുവ് നായ്ക്കളുടെ ശല്യം വ്യാപകമാകുന്നു. നായ്ക്കളുടെ ആക്രമണത്തിന് നിത്യേന നിരവധിപേർ ഇരയാകുന്നുണ്ട്. മലയിൻകീഴ് ഗ്രാമപഞ്ചായത്തിലെ മലയിൻകീഴ് സഹകരണ ബാങ്ക് പരിസരത്തും വില്ലേജ് ഓഫീസ് പരിസരത്തും ക്ഷേത്ര ജംഗ്ഷനിലും നായ്ക്കളുടെ കൂട്ടം എപ്പോഴുമുണ്ടാകും. ഊരൂട്ടമ്പലം,പാപ്പനംകോട്,മലയിൻകീഴ് -കാട്ടാക്കട എന്നീ റോഡിലും തെരുവ് നായ്ക്കൾ
വ്യാപകമായിട്ടുണ്ട്. വാഹന,കാൽനട യാത്രക്കാരുടെ പിന്നാലെ ഓടിയെത്തി നായ്ക്കൾ ആക്രമിക്കാറുണ്ട്.

വിളവൂർക്കൽ,മാറനല്ലൂർ,വിളപ്പിൽ എന്നീ പഞ്ചായത്ത് പ്രദേശങ്ങളിലും കച്ചവട സ്ഥാപനങ്ങൾക്ക് മുന്നിലും പൊതുമാർക്കറ്റുകളിലും തെരുവ് നായ്ക്കളുടെ കൂട്ടമുണ്ടാകും. രാത്രിയും പകലുമില്ലാതെ തെരുവ് നായ്ക്കൾ വീടുകളിലെത്തി കോഴി,ആട്,പശു,വളർത്തുപൂച്ച എന്നിവയെ കടിച്ച് കൊല്ലാറുണ്ടെന്നാണ്
നാട്ടുകാർ പറയുന്നത്. മലയിൻകീഴ് പുതിയ ആയുർവേദ ആശുപത്രിക്ക് മുന്നിലും കോട്ടമ്പൂരും മണപ്പുറം-കുരുവിൻമുകൾ പ്രദേശത്തും മലയിൻകീഴ് താലൂക്ക് ആശുപത്രിക്ക് മുന്നിലും തെരുവ് നായ്ക്കളുടെ ശല്യം വ്യാപകമായിട്ടുണ്ട്.

ആക്രമിക്കലും പതിവാകുന്നു

മാറനല്ലൂർ,അണപ്പാട്,ആനമൺ,ചീനിവിള,പോങ്ങുംമൂട് തുടങ്ങിയ സ്ഥലങ്ങളിലും തെരുവ് നായ്ക്കളുടെ ശല്യമുണ്ട്.റോഡ് സൈഡിലും കടകൾക്ക് മുന്നിലും താവളമടിച്ചിട്ടുള്ള നായ്ക്കൾ അപ്രതീക്ഷിതമായി ആക്രമിക്കുകയാണ് പതിവ്.വിളപ്പിൽശാല ഗവൺമെന്റ് ആശുപത്രി,പൊതുമാർക്കറ്റ്,ബസ് സ്റ്റാൻഡ്
സ്കൂൾ ഗേറ്റ് എന്നിവിടങ്ങളിലും നായ്ക്കളുണ്ട്. മാലിന്യപൊതിയുമായി തെരുവ് നായ്ക്കൾ റോഡിലേക്ക് ചാടി ഇരുചക്ര വാഹനയാത്രക്കാർ അപകടത്തിലാകുന്നതും പതിവാണ്. മൂങ്ങോട്-അന്തിയൂർക്കണം, ശ്രീകൃഷ്ണപുരം-മഞ്ചാടി,കരുവിലാഞ്ചി-മൂങ്ങോട്,ചെറുകോട്-മിണ്ണംകോട് റോഡ് എന്നിവിടങ്ങളിലും തെരുവ് നായ്ക്കളുടെ ശല്യമുണ്ട്.

പ്രശ്നമായി മാലിന്യനിക്ഷേപം

മാലിന്യ നിക്ഷേപം വ്യാപകമാകുന്നതാണ് തെരുവ് നായ്ക്കൾ താവളമടിക്കാൻ കാരണം. കരിപ്പൂര്,പാലോട്ടുവിള,മലയിൻകീഴ് ഊറ്റുപാറ,മലയിൻകീഴ് ഗവ.ഗേൾസ് ഹയ‌ർ സെക്കൻഡറി സ്കൂൾ ഗേറ്റ്, മലയിൻകീഴ് ക്ഷേത്ര ജംഗ്ഷൻ,ക്ഷേത്ര പരിസരം,പാപ്പനംകോട് റോഡ്, പേയാട്, പള്ളിമുക്ക്, മാർക്കറ്റ് ജംഗ്ഷൻ, പേയാട്-വിളപ്പിൽശാല,പടവൻകോട് റോഡ് എന്നീ സ്ഥലങ്ങളും നായ്ക്കളുടെ താവളമായിട്ടുണ്ട്. തെരുവ് നായ്ക്കളുടെ ശല്യത്തിന് അധികൃതർ നടപടി സ്വീകരിക്കുന്നില്ലെന്ന ആക്ഷേപം ശക്തമായിട്ടുണ്ട്.