മിക്ക വീടുകളിലും കാണുന്ന സ്ഥിരം പ്രശ്‌നം,​ പരിഹരിക്കാൻ ഇതാ ഒരു എളുപ്പവഴി

സൂക്ഷ്മതയോടെ ഉപയോഗിക്കുകയും കൃത്യമായി അറ്റകുറ്റപ്പണികൾ നടത്തുകയും ചെയ്തില്ലെങ്കിൽ വീടും വീട്ടുപകരണങ്ങളും എളുപ്പം ചീത്തയാകും. എന്നാൽ അല്പം സമയം ചെലവഴിച്ചാൽ അടുക്കളയിലെ അറ്റകുറ്റപ്പണികൾ എളുപ്പത്തിൽ പൂർത്തിയാക്കാനാവും..

സിങ്കിൽ നിന്ന് പുറത്തേക്കുള്ള പൈപ്പിൽ ഭക്ഷണാവശിഷ്ടങ്ങളും മറ്റും അടിഞ്ഞ് വെള്ളം ഒഴുകുന്നതിന് തടസമുണ്ടാകുന്നത് മിക്ക വീടുകളിലെയും പ്രശ്നമാണ്. ചിലപ്പോൾ ദുർഗന്ധവും ഉണ്ടാകാം. ഇതൊഴിവാക്കാൻ കുറച്ച് വിനാഗിരി ഒരു പാത്രത്തിലൊഴിച്ച് ഫ്രീസറിൽ വയ്ക്കുക. ഐസ് രൂപത്തിലായ ഇത് പൊട്ടിച്ച് സിങ്കിൽ വിതറുക. വിനാഗിരി അലിഞ്ഞ് ഒഴുകിയ ശേഷം കുറച്ച് ചൂടുവെള്ളമൊഴിച്ച് സിങ്ക് കഴുകാം. കുഴലിൽ പറ്റിപ്പിടിച്ചിട്ടുള്ള മാലിന്യങ്ങൾ എല്ലാം മാറിക്കിട്ടും. മൂന്ന് മാസത്തിലൊരിക്കൽ ഇങ്ങനെ ചെയ്യുന്നത് ഗുണം ചെയ്യും.

2. ഇലക്ട്രിക് ഹുഡിന്റെ ഫിൽറ്റർ അഴിച്ചെടുത്ത ശേഷം ഓട്ടോമൊബൈൽ ഷോപ്പിൽ നിന്ന് ലഭിക്കുന്ന ‘ഡീ ഗ്രീസർ’ ചൂടുവെള്ളവുമായി ചേർത്ത് നല്ലതുപോലെ കഴുകുക. കരിയും എണ്ണമയവും പൂർണമായി മാറിക്കിട്ടും. നന്നായി ഉണക്കിയ ശേഷം ഫിൽറ്റർ പിടിപ്പിക്കാം. ആറ് മാസത്തിലൊരിക്കലെങ്കിലും ഇതു ചെയ്യണം.

3. കാബിനറ്റ്, അവ്ൻ, ഫ്രിഡ്ജ് എന്നിവയുടെ കട്ലറി ട്രേ നനഞ്ഞ തുണികൊണ്ട് തുടച്ചാൽ കാലക്രമേണെ തുരുമ്പ് പിടിക്കാൻ സാധ്യതയുണ്ട്. ‘റസ്റ്റ് ക്ലീനർ’ പുരട്ടിയ ശേഷം ഉണങ്ങിയ കോട്ടൺ തുണികൊണ്ട് വൃത്തിയാക്കിയാൽ അഴുക്കും ചെളിയും മാറിക്കിട്ടും. തുരുമ്പിക്കുകയുമില്ല. രണ്ടുമാസത്തിലൊരിക്കൽ ഇങ്ങനെ വൃത്തിയാക്കാം.

4. ആഴ്ചയിൽ ഒരു കിച്ചൻ കാബിനറ്റ് വീതം വൃത്തിയാക്കുക. ഇതൊരു കഠിന ജോലിയായി അനുഭവപ്പെടില്ല. ഉള്ളിലെ സാധനങ്ങൾ എല്ലാം പുറത്തെടുത്ത് തുടച്ചു വൃത്തിയാക്കിയാൽ പാറ്റയുടെയും പല്ലിയുടെയും ശല്യം കുറയും. എം.ഡി.എഫ്, പ്ലൈവുഡ് എന്നിവ നനഞ്ഞ തുണികൊണ്ട് തുടച്ചാൽ കേടുവരും എന്നകാര്യം ഓർക്കണം.

5. മാസത്തിലൊരിക്കലെങ്കിലും ഗ്യാസ് അടുപ്പിന്റെ ബർണർ ഊരിയെടുത്ത് തുടച്ച് വൃത്തിയാക്കുക. സുഷിരങ്ങളിലെ അഴുക്കും പൊടിയുമെല്ലാം നീക്കം ചെയ്യണം.