കാണാതായ യുവതിയുടെ മൃതദേഹം പമ്പയാറ്റിൽ കണ്ടെത്തി

മാവേലിക്കര : കഴിഞ്ഞ ഞായറാഴ്ച കാണാതായ യുവതിയുടെ മൃതേഹം പമ്പ ആറ്റിൽ കണ്ടെത്തി. ചെട്ടികുളങ്ങര ഈരേഴ വടക്ക് ദേവീവിലാസത്തിൽ ധന്യ കൃഷ്ണ (29)യുടെ മൃതദേഹമാണ് പമ്പ ആറ്റിൽ പുളിക്കീഴ് ഭാഗത്ത് നിന്നും അഴുകിയ നിലയിൽ വെള്ളി​യാഴ്ച കണ്ടെത്തിയത്.

തിരുവല്ലയിൽ സ്വകാര്യ ആശുപത്രിയിൽ ലാബ് ടെക്നീഷനായ ധന്യ ഏപ്രിൽ 26-ന് വൈകി​ട്ട് ജോലിക്കായി തിരുവല്ലയിലെ സ്വകാര്യ ആശുപത്രിയിലേക്ക് വീട്ടി​ൽ നി​ന്നി​റങ്ങി​യി​രുന്നു. വൈകിട്ട് 6.30ന് ഭർത്താവാണ് സ്വകാര്യ ബസിൽ കയറ്റി വിട്ടത്. എന്നാൽ ഡ്യൂട്ടിക്ക് കയറേണ്ട 11.30നും ആശുപത്രിയിൽ എത്തിയിരുന്നില്ല. ഫോൺ സ്വി​ ച്ച് ഓഫ് ആയിരുന്നു. തുടർന്ന് യുവതിയെ കാണാനില്ലെന്ന് ഭർത്താവ് രഞ്ജു ആർ.പിള്ള മാവേലിക്കര പൊലീസിൽ പരാതി നൽകി.

യുവതി തിരുവല്ലയിൽ ഇറങ്ങിയെന്ന് ഇവർ കയറിയ ബസി​ലെ ജീവനക്കാർ നൽകിയ വിവരത്തിന്റെ അടിസ്ഥാനത്തിൽ പൊലീസ് അന്വേഷണം നടത്തിയെങ്കിലും കണ്ടെത്താനായില്ല. ഈ വിവരം തെറ്റാണെന്ന് മനസിലാക്കിയ അന്വേഷണസംഘം യുവതിയുടെ മൊബൈൽ ഫോൺ കേന്ദ്രീകരിച്ചും സി.സി.ടി വി ദൃശ്യങ്ങൾ കേന്ദ്രീകരിച്ചും അന്വേഷണം നടത്തി​ വരി​കയായി​രുന്നു. 10 വർഷം മുമ്പാണ് ധന്യ കൃഷ്ണയും രഞ്ജു ആർ.പിള്ളയും വിവാഹിതരായത്. ഇവർക്ക് 6 വയസ്സുള്ള ഒരു മകളുണ്ട്. മരണകാരണം വ്യക്തമല്ലെന്നും കുടുംബ പ്രശ്നങ്ങളാകാൻ സാദ്ധ്യതയുണ്ടെന്നും മാവേലിക്കര പൊലീസ് അറിയിച്ചു.