കൊച്ചി: ടി.വി പരിപാടികളിൽ ചിരിമഴ പെയ്യിച്ച് ഗൃഹ സദസ്സുകളുടെ പ്രിയപ്പെട്ടവളായി മാറി സിനിമയിലും തിളങ്ങിയ സുബി സുരേഷ് അകാലത്തിൽ വി​ടവാങ്ങി. 41 വയസ്സേ ഉണ്ടായിരുന്നുള്ളൂ. കരൾ സംബന്ധമായ രോഗത്തെ തുടർന്ന് ആലുവ രാജഗിരി ആശുപത്രിയിൽ ചികിത്സയിലായിരുന്നു. മികച്ച അവതാരകയുമായിരുന്നു. സുബി സുരേഷ് ഒഫിഷ്യൽ എന്ന യൂ ട്യൂബ് ചാനലും ഹിറ്റായിരുന്നു.

ടി.വി. അവതാരകനുമായുള്ള വിവാഹം ഈ മാസം നടത്താനിരിക്കേയാണ് മരണം.

കരൾ മാറ്റിവയ്ക്കലിന് നടപടികൾ പുരോഗമി​ക്കവെ രോഗം മൂർച്ഛിച്ച് ജനുവരി 20നാണ് ആശുപത്രിയിൽ പ്രവേശിപ്പിച്ചത്. ഇന്നലെ രാവിലെ 9.25ന് മരണം സംഭവിച്ചു. ശരീരം മരുന്നുകളോട് പ്രതികരിച്ചിരുന്നില്ല. പ്ലാസ്മ തെറാപ്പി ചെയ്തെങ്കിലും ഫലമുണ്ടായില്ല. വൃക്കയും തകരാറി​ലായി​. ഇത് ഡയാലിസിസി​ലൂടെ പരിഹരിച്ചപ്പോഴേക്കും ഹൃദയത്തിന്റെ പ്രവർത്തനം മന്ദീഭവി​ച്ചു. ചൊവ്വാഴ്ച രാത്രി വെന്റിലേറ്ററിലേക്ക് മാറ്രിയെങ്കിലും ജീവൻ രക്ഷി​ക്കാനായി​ല്ല.

രാജഗിരി ആശുപത്രി മോർച്ചറിയിലുള്ള മൃതദേഹം ഇന്ന് രാവിലെ എട്ടു മണിയോടെ വരാപ്പുഴയിലെ വീട്ടിലേക്ക് കൊണ്ടുവരും.

10 മുതൽ 2 വരെ വരാപ്പുഴ പുത്തൻപള്ളി പാരീഷ്ഹാളിൽ പൊതുദർശനത്തിന് വയ്ക്കും. സംസ്കാരം വൈകിട്ട് മൂന്നിന് ചേരാനെല്ലൂർ ശ്മശാനത്തിൽ.

തൃപ്പൂണിത്തുറ സ്വദേശി പരേതനായ സുരേഷി​ന്റെയും അംബി​കയുടെയും മകളാണ്. അവിവാഹിതയായിരുന്നു. ഏക സഹോദരൻ: എബി​ സുരേഷ്. അമ്മയ്ക്കൊപ്പം വരാപ്പുഴ തി​രുമുപ്പത്തെ 'എന്റെ വീട് ' എന്ന വസതിയിലായിരുന്നു താമസം.