പേരുമാറ്റ വിവാദത്തിനിടെ പുതിയ ചിത്രത്തിൽ ഭാരത് എന്ന് പേര് ചേർത്ത് ബോളിവുഡ് താരം അക്ഷയ് കുമാർ

രാജ്യത്തിന്റെ പേര് 'ഭാരത്' എന്നാക്കുന്നതുമായി ബന്ധപ്പെട്ട് അനുകൂലിച്ചും പ്രതികൂലിച്ചും നിരവധി വാദപ്രതിവാദങ്ങൾ പുറത്തുവരുന്നുണ്ട്. ഇന്ത്യൻ ക്രിക്കറ്റ് ടീമിന്റെ പേര് ഭാരത് എന്നാക്കണമെന്ന് മുൻ താരം വീരേന്ദർ സേവാഗ് ആവശ്യപ്പെട്ടിരുന്നു. ഇന്ത്യ എന്ന പേര് മാറ്റണമെന്ന് താൻ രണ്ടുവർഷം മുൻപ് ആവശ്യപ്പെട്ടിരുന്നതായി നടി കങ്കണ റണൗട്ടും എക്‌സിലൂടെ പ്രതികരിച്ചിരുന്നു. ഇതിനിടെ തന്റെ പുതിയ ചിത്രത്തിൽ പേര് മാറ്റത്തിലൂടെ ഈ വാദങ്ങളിൽ പങ്കാളിയാകുകയാണ് ബോളിവുഡ് താരം അക്ഷയ് കുമാറും.

'മിഷൻ റാണിഗഞ്ജ്: ദി ഗ്രേറ്റ് ഇന്ത്യൻ റെസ്‌ക്യൂ' എന്ന ചിത്രത്തിന്റെ പേര് 'മിഷൻ റാണിഗഞ്ജ്: ദി ഗ്രേറ്റ് ഭാരത് റെസ്‌ക്യൂ' എന്നാണ് മാറ്റിയത്. ചിത്രത്തിന്റെ ഫസ്‌റ്റ്‌ലുക്ക് പോസ്‌റ്റർ അണിയറ പ്രവർത്തകർ പുറത്തിറക്കി. രാജ്യത്തിന്റെ പേര് വരാനിരിക്കുന്ന പ്രത്യേക പാർലമെന്റ് സമ്മേളനത്തിൽ ഭാരത് എന്നാക്കി മാറ്റാൻ സർക്കാർ നീക്കമുണ്ടാകുമെന്ന വിവിധ കേന്ദ്രങ്ങളിലെ ചർച്ചകൾ ഉയരുമ്പോഴാണ് അക്ഷയ് തന്റെ ചിത്രത്തിന്റെ ടാഗ്‌ലൈനിൽ ഇത് ഉൾപ്പെടുത്തിയിരിക്കുന്നത്.

1989ൽ റാണിഗഞ്ജിൽ 350 അടി താഴ്‌ചയിൽ കൽക്കരിഖനിയിൽ അകപ്പെട്ടവരെ രക്ഷിച്ച എഞ്ചിനീയറായ ജസ്വന്ത് സിംഗ് ഗില്ലിന്റെ ധീരമായ പ്രവൃത്തിയെ ആസ്‌പദമാക്കിയുള്ള ചിത്രത്തിൽ അക്ഷയ്‌ കുമാറിനൊപ്പം പരിണീതി ചോപ്ര, കുമുദ് മിശ്ര, പവൻ മൽഹോത്ര, രവി കിഷൻ തുടങ്ങി വൻ താരനിരതന്നെയുണ്ട്. ചിത്രത്തിന്റെ ടീസർ നാളെ പുറത്തിറങ്ങും. ഒക്ടോബർ ആറിനാണ് റിലീസ്.