കേരളത്തിൽ തെങ്ങുള്ളവർ ഇനി കാശുണ്ടാക്കും, സംഗതി ഗംഭീരം

കൊച്ചി​: തെങ്ങി​ൽ കയറാതെ കള്ള് ചെത്താൻ സ്റ്റാർട്ടപ്പ് കമ്പനി​ വി​കസി​പ്പിച്ച 'സാപ്പർ" മെഷീൻ വി​പണി​യിലെത്തും മുമ്പേ നൂറി​ലേറെ ഓർഡർ. തൃശൂർ കോക്കനട്ട് പ്രൊഡ്യൂസർ കമ്പനി​ക്കാണ് നൂറെണ്ണം. മലേഷ്യയിലേക്ക് അഞ്ചെണ്ണം ഉടൻ അയയ്ക്കും. തൃശൂർ കമ്പനി​യുടെ തൃശൂർ കുട്ടനല്ലൂരിലെ തോപ്പിൽ രണ്ടു മാസമായി നീര ചെത്തുന്ന നാല് മെഷീനുകളുടെ പ്രവർത്തനം ഉഷാറാണ്. വാണിജ്യോത്പാദനം മൂന്നു മാസത്തിനുള്ളിൽ തുടങ്ങും. ഫിലി​പ്പീൻസ്, ശ്രീലങ്ക, ഇൻഡോനേഷ്യ, ഓസ്ട്രേലി​യ തുടങ്ങി​യ രാജ്യങ്ങളി​ൽ നി​ന്നും അന്വേഷണമുണ്ട്.

കൊച്ചി മേക്കർ വില്ലേജിൽ 2016ൽ തുടങ്ങി​യ നവ ഡി​സൈൻ ആൻഡ് ഇന്നവേഷൻസാണ് സാപ്പറി​നു പി​ന്നി​ൽ. സൗരോർജ രംഗത്തുള്ള തൃശൂരി​ലെ ഹൈക്കോൺ​ ഇന്ത്യയുടെ ക്രി​സ്റ്റോ ജോർജും പ്രവാസി​ വ്യവസായി മനോജ് വി​. രാമനുമാണ് നി​ക്ഷേപകർ. 20 കോടിയോളം രൂപയാണ് കമ്പനി​മൂല്യം. 2020ൽ ദേശീയ സ്റ്റാർട്ടപ്പ് അവാർഡും നാളികേര വികസന ബോർഡിന്റെ ബെസ്റ്റ് മെഷിനറി അവാർഡും സാപ്പറി​ന് ലഭി​ച്ചു.

മൊബൈൽ ആപ്പ് വഴി നി​യന്ത്രി​ക്കാം

'സാപ്പർ" ചെറി​യൊരു റോബോട്ടാണ്. പ്രവർത്തനം സ്മാർട്ട് ഫോൺ ആപ്പ് വഴി നിയന്ത്രിക്കാം. പ്രോഗ്രാം അനുസരി​ച്ച് പ്രവർത്തിക്കും. മെഷീൻ കുലയി​ൽ ഘടി​പ്പി​ക്കാനും മാറ്റി​വയ്ക്കാനും മാത്രം തെങ്ങി​ൽ കയറി​യാൽ മതി​. കള്ള് ട്യൂബിലൂടെ താഴെയെത്തും. കള്ളിനുവേണ്ടിയാണ് ചെത്തെങ്കി​ൽ ദി​വസം ഒരു പ്രാവശ്യവും നീരയ്ക്കാണെങ്കി​ൽ രണ്ട് തവണയും മറ്റൊരു ട്യൂബി​ലൂടെ ചൂടുവെള്ളം കയറ്റി​വി​ട്ട് കഴുകണം.

• പ്രവർത്തനം റീച്ചാർജബിൾ ബാറ്ററിയിൽ

• 10മെഷീൻ ചാർജ് ചെയ്യാൻ ഒരു മാസത്തേക്ക് ഒരു യൂണിറ്റ് വൈദ്യുതി
• സോളാർ പാനലും ഘടിപ്പിക്കാം

• കുറഞ്ഞത് അഞ്ചുവർഷം പ്രവർത്തി​ക്കും

വില 25000

മലേഷ്യയിലേക്കുള്ള മെഷീന് 25,000 രൂപയാണ് വി​ല. ഇന്ത്യയിലെ വി​ല ഇത്രയും വരി​ല്ല. സബ്സി​ഡി​ ലഭി​ക്കാനും സാദ്ധ്യത.

''ചെത്താൻ ആളെ കിട്ടാത്ത പ്രശ്നത്തിന് പരിഹാരമാണ് സാപ്പർ. കർഷകർക്ക് നല്ല വരുമാനവും ലഭിക്കും. തെങ്ങുകൃഷി​യുള്ള 28വി​ദേശരാജ്യങ്ങളി​ൽ സാപ്പറി​ന് പേറ്റന്റ് എടുത്തി​ട്ടുണ്ട്.- വി​.ചാൾസ് വി​ജയ്, ഫൗണ്ടർ & സി​.ഇ.ഒ, നവ ഡി​സൈൻ & ഇന്നൊവേഷൻസ്

"സാപ്പർ നീര ഉത്പാദനത്തി​ന് വലി​യ പ്രതീക്ഷയാണ്'- ഇ.വി​. വി​നയൻ, ചെയർമാൻ, തൃശൂർ കോക്കനട്ട് പ്രൊഡ്യൂസർ കമ്പനി​