താമരശ്ശേരി ചുരത്തിൽ ഓടിക്കൊണ്ടിരുന്ന കാർ കത്തിനശിച്ചു

വൈത്തിരി : താമരശ്ശേരി ചുരത്തിൽ ഓടിക്കൊണ്ടിരുന്ന കാർ കത്തിനശിച്ചു. യാത്രക്കാർ അത്ഭുതകരമായി രക്ഷപ്പെട്ടു. ചുരം എട്ടാം വളവിൽ ചൊവ്വാഴ്ച രാവിലെ ആറരയോടെയായിരുന്നു അപകടം. കാറിൽ നിന്ന് പുക ഉയരുന്നത് ശ്രദ്ധയിൽപ്പെട്ടതോടെ റോഡരികിൽ നിർത്തിയിടുകയായിരുന്നു. നിമിഷങ്ങൾക്കകം കത്തിനശിച്ചു. കൽപ്പറ്റയിൽ നിന്ന് ഫയർഫോഴ്സ് എത്തിയാണ് തീ അണച്ചത്. അപകടത്തെ തുടർന്ന് ഒരു മണിക്കൂറിലേറെ ചുരത്തിൽ ഗതാഗതം തടസപ്പെട്ടു. തീപിടിത്തത്തിന്റെ കാരണം വ്യക്തമല്ല. ഷോർട്ട് സർക്യൂട്ട് ആകാമെന്നാണ് പ്രാഥമിക നിഗമനം. വയനാട്ടിലേക്ക് വരികയായിരുന്ന മലപ്പുറം സ്വദേശികൾ സഞ്ചരിച്ച കാറാണ് കത്തിയത്. വാഹനത്തിൽ മൂന്ന് പേരാണ് ഉണ്ടായിരുന്നത്.പൊലീസും മോട്ടോർ വാഹന വകുപ്പ് ഉദ്യോഗസ്ഥരും സ്ഥലം സന്ദർശിച്ച് തുടർനടപടികൾ സ്വീകരിച്ചു.