സ്കൂൾ പരിസരത്ത് വിദ്യാർത്ഥിനികളെ ശല്യം ചെയ്ത രണ്ട് യുവാക്കൾ അറസ്റ്റിൽ

കല്ലമ്പലം: നാവായിക്കുളം സ്കൂൾ പരിസരത്ത് പ്രായപൂർത്തിയാകാത്ത പെൺകുട്ടികളെ സ്ഥിരമായി ശല്യം ചെയ്തിരുന്ന സംഘത്തിലെ രണ്ടുപേർ പോക്സോ കേസിൽ അറസ്റ്റിൽ.നാവായിക്കുളം നൈനാംകോണം പണയിൽ വീട്ടിൽ അജിത്ത് എന്ന് വിളിക്കുന്ന കിച്ചു (18),നൈനാംകോണം സുൽത്താന മൻസിലിൽ സുധീർ എന്നിവരാണ്‌ അറസ്റ്റിലായത്.

പ്രായപൂർത്തിയാകാത്ത പെൺകുട്ടികളെയും,വിദ്യാർത്ഥിനികളെയും പിന്തുടർന്ന് ശല്യപ്പെടുത്തുന്നതാണ് ഇവരുടെ പതിവ്. കഴിഞ്ഞ ദിവസം വൈകിട്ട് 5ഓടെ എതുക്കാട് നിന്നാണ് കല്ലമ്പലം പൊലീസ് ഇവരെ പിടികൂടിയത്.

സ്കൂൾ പരിസരങ്ങളിൽ പൊലീസ് പട്രോളിംഗ് രാവിലെയും വൈകിട്ടും ശക്തിപ്പെടുത്തുമെന്നും പൂവാലന്മാർക്കെതിരെയും, വിദ്യാർത്ഥിനികളെ ശല്യപ്പെടുത്തുന്ന സാമൂഹ്യവിരുദ്ധർക്കെതിരെയും പോക്സോ നിയമപ്രകാരം കേസെടുക്കുമെന്നും പിടിയിലാകുന്നവർക്കെതിരെ റിമാൻഡ് ചെയ്യുന്നതുൾപ്പെടെ ശക്തമായ നടപടികൾ സ്വീകരിക്കുമെന്നും ഇത്തരക്കാരുടെ വാഹനങ്ങൾ പിടിച്ചെടുത്ത് കോടതിയിൽ ഹാജരാക്കുമെന്നും കല്ലമ്പലം എസ്.ഐ എം.സാഹിൽ അറിയിച്ചു.