ചേറ്റുകുഴിയിൽ 3 കടകളിൽ മോഷണം: 10,000 രൂപ നഷ്ടമായി

കട്ടപ്പന : വണ്ടൻമേട് ചേറ്റുകുഴിയിൽ 3 കടകളിൽ മോഷണവും 2 സ്ഥാപനങ്ങളിൽ മോഷണ ശ്രമവും നടന്നു. വ്യാഴാഴ്ച പുലർച്ചെ 2ന് കടകളുടെ പൂട്ട് തകർത്താണ് മോഷണം നടത്തിയത്. മേഖലയിലെ വൈദ്യുതിബന്ധം വിച്‌ഛേദിച്ചശേഷമായിരുന്നു കവർച്ച. ഇതിന്റെ സിസി ടിവി ദൃശ്യങ്ങളും പുറത്തുവന്നിട്ടുണ്ട്. ടൗണിൽ സഹകരണ ആശുപത്രിക്കുസമീപം പ്രവർത്തിക്കുന്ന എ.എം.ആർ ഫ്രഷ് മാർട്ടിൽ നിന്ന് 5300 രൂപയും എ വൺ ലേഡീസ് സെന്ററിൽ നിന്ന് 3000 രൂപയും മാനച്ചേരിയിൽ ഹയറിങ് സെന്ററിൽ നിന്ന് 1100 രൂപയും നഷ്ടമായി. ആക്സിസ് മെഡിക്കൽ ലാബിലും എസ്എസ് ബാറ്ററീസ് എന്ന സ്ഥാപനത്തിലുമാണ് മോഷണശ്രമം നടന്നത്. ഇവിടങ്ങളിൽ നിന്ന് പണം നഷ്ടമായിട്ടില്ല. മൂന്നംഗ സംഘമാണ് മോഷണം നടത്തിയതെന്ന് സംശയിക്കുന്നു. വണ്ടൻമേട്, കമ്പംമെട്ട് പൊലീസ് സ്ഥലത്തെത്തി പരിശോധന നടത്തി.