'എല്ലാത്തിനും വിശദമായ മറുപടി ഉടൻ നൽകും'; തെറ്റ് ചെയ്‌തവർ ശിക്ഷിക്കപ്പെടട്ടെയെന്ന് സുധീഷ്

കോഴിക്കോട്: തനിക്കെതിരെ ഉയരുന്ന ലൈംഗികാതിക്രമ കേസിൽ പ്രതികരണവുമായി നടൻ സുധീഷ്. ജൂനിയർ ആർട്ടിസ്റ്റായ നടിയുടെ ആരോപണത്തിൽ വിശദമായ മറുപടി നൽകും. ചില കാര്യങ്ങൾ തുറന്ന പറയാനുണ്ട്. വൈകാതെ തന്നെ മാദ്ധ്യമങ്ങളെ കണ്ട് കാര്യങ്ങൾ അറിയിക്കുമെന്നും സുധീഷ് വിശദീകരിച്ചു.

തെറ്റ് ചെയ്‌തിട്ടുണ്ടെങ്കിൽ ആരായാലും ശിക്ഷിക്കപ്പെടട്ടെയെന്നായിരുന്നു ഹേമ കമ്മിറ്റി റിപ്പോർട്ടിനെ തുടർന്നുള്ള ആരോപണങ്ങളെക്കുറിച്ച് സുധീഷിന്റെ പ്രതികരണം. കോഴിക്കോട് സ്വദേശിയായ ജൂനിയർ ആർട്ടിസ്റ്റ് നൽകിയ പരാതിയിലാണ് ഇടവേള ബാബുവിനും സുധീഷിനും എതിരെ കേസെടുത്തത്. നടക്കാവ് പൊലീസാണ് കേസ് രജിസ്റ്റർ ചെയ്‌തത്. ഒരുമിച്ച് യാത്ര ചെയ്യാം ടൂർ പോകാം എന്നൊക്കം പറഞ്ഞ് സുധീഷ് തന്നെ ഫോണിൽ വിളിച്ചുവെന്നാണ് നടിയുടെ ആരോപണം.