ഹെെക്കോടതി മാനദണ്ഡങ്ങൾ  പാലിച്ചില്ല; ആന എഴുന്നള്ളിപ്പിൽ പൂർണത്രയീശ  ക്ഷേത്ര ഭരണസമിതിക്കെതിരെ കേസെടുത്തു

കൊച്ചി: ആനകളുടെ എഴുന്നള്ളിപ്പുമായി ബന്ധപ്പെട്ട് ഹെെക്കോടതി പുറത്തിറക്കിയ മാനദണ്ഡങ്ങൾ പാലിക്കാത്ത തൃപ്പൂണിത്തുറ പൂർണത്രയീശ ക്ഷേത്ര ഭരണസമിതിക്കെതിരെ കേസെടുത്തു. ക്ഷേത്രോത്സവത്തിനിടെ ഹെെക്കോടതി മാനദണ്ഡങ്ങൾ പാലിച്ചില്ലെന്ന കണ്ടെത്തലിനെ തുടർന്ന് വനംവകുപ്പാണ് കേസെടുത്തത്. ആനകൾ തമ്മിലുള്ള അകലം മൂന്നു മീറ്റർ ഉണ്ടായിരുന്നില്ലെന്നും ആളുകളും ആനയുമായുള്ള എട്ടുമീറ്റർ അകലം പാലിച്ചില്ലെന്നും വനംവകുപ്പ് പരിശോധനയിൽ കണ്ടെത്തി.

ആനകളുടെ സമീപത്തുകൂടി തീവെട്ടിയുമായി പോയെന്നും ഇക്കാര്യത്തിലും അഞ്ച് മീറ്റർ അകലം പാലിച്ചില്ലെന്നും വനംവകുപ്പ് അറിയിച്ചു. വനം വകുപ്പിന്റെ സോഷ്യൽ ഫോറസ്ട്രി വിഭാഗമാണ് കേസെടുത്തത്. നാട്ടാനകളുടെ പരിപാലന ചുമതല നൽകിയിരിക്കുന്നത് വനംവകുപ്പിന്റെ സോഷ്യൽ ഫോറസ്ട്രി വിഭാഗത്തിനാണ്. എന്നാൽ രാത്രി മഴ പെയ്തതിനാലാണ് ആനകളെ ചേർത്തുനിർത്തേണ്ടിവന്നതെന്നാണ് ക്ഷേത്രഭാരവാഹികളുടെ വിശദീകരണം