ഹജ്ജിന് നാളെ 859 തീർത്ഥാടകർ പുറപ്പെടും

മലപ്പുറം: ഹജ്ജ് തീർത്ഥാടനത്തിന് സംസ്ഥാന ഹജ്ജ് കമ്മിറ്റി മുഖേന ബുധനാഴ്ച അഞ്ച് വിമാനങ്ങളിലായി 859 പേർ യാത്രയാവും. കോഴിക്കോട് നിന്ന് മൂന്ന്, കണ്ണൂരിൽ നിന്ന് രണ്ട് വീതം വിമാനങ്ങളാണ് പുറപ്പെടുക. കോഴിക്കോട് നിന്ന് പുലർച്ചെ 12.40ന് പുറപ്പെടുന്ന വിമാനത്തിൽ 89 പുരുഷന്മാരും 84 സ്ത്രീകളുമുണ്ടാവും. രാവിലെ 7.40ന് പുറപ്പെടുന്ന വിമാനത്തിൽ 173 സ്ത്രീകളും വൈകിട്ട് 4.05ന് പുറപ്പെടുന്ന വിമാനത്തിൽ 76 പുരുഷന്മാരും 97 സ്ത്രീകളുമാണ് യാത്രയാവുക. രാവിലെ 7.40ന് പുറപ്പെടുന്ന വിമാനത്തോടെ കരിപ്പൂരിൽ നിന്ന് സ്ത്രീകൾക്ക് മാത്രമായുള്ള സർവീസുകൾ പൂർത്തിയാവും.
കണ്ണൂരിൽ നിന്നം ബുധനാഴ്ച രണ്ട് വിമാനങ്ങളാണ് സർവ്വീസ് നടത്തുക. പുലർച്ചെ നാലിന് പുറപ്പെടുന്ന വിമാനത്തിൽ 45 പുരുഷന്മാരും 126 സ്ത്രീകളും വൈകിട്ട് 7.25 ന് പുറപ്പെടുന്ന വിമാനത്തിൽ 31 പുരുഷന്മാരും 138 സ്ത്രീകളുമാണ് യാത്രയാവുക. സംസ്ഥാനത്ത് ഇതുവരെ 17 വിമാനങ്ങളിലായി 2918 തീർത്ഥാടകർ വിശുദ്ധ മക്കയിലെത്തി. ഇതിൽ 760 പേർ പുരുഷന്മാരും 2158 പേർ സ്ത്രീകളുമാണ്. കൊച്ചി എംബാർക്കേഷൻ പോയിന്റ് വഴിയുള്ള യാത്ര 16ന് ആരംഭിക്കും. വൈകിട്ട് 5.55നാണ് ആദ്യ വിമാനം. സൗദി എയർലൈൻസിന്റെ 289 പേർക്ക് സഞ്ചരിക്കാവുന്ന 21 വിമാനങ്ങളാണ് കൊച്ചിയിൽ നിന്നേ ഷെഡ്യൂൾ ചെയ്തിട്ടുള്ളത്.