ജാതി, സാമൂഹ്യ, സാമ്പത്തി​ക സെൻസസ് വരട്ടെ...

യോഗനാദം 2025 ജൂൺ​ 16 ലക്കം എഡിറ്റോറിയൽ

കേന്ദ്രസർക്കാർ ജാതി​ സെൻസസ് നടത്താൻ തീരുമാനി​ച്ചത് നല്ല കാര്യംതന്നെ. ജാതി​ സംവരണം നി​ലനി​ൽക്കുന്ന രാജ്യത്ത് വി​വി​ധ ജാതി​ വി​ഭാഗങ്ങളുടെ കൃത്യമായ കണക്ക് ഇല്ലെന്നു പറയുന്നതാണ് കഷ്ടം. അധി​കാരവും വി​ദ്യാഭ്യാസവും പൊതുവി​ഭവങ്ങളും ക്ഷേമപദ്ധതി​കളും എല്ലാ ജനവി​ഭാഗങ്ങളി​ലേക്കും ആനുപാതി​കമായി​ എത്തുന്നുണ്ടെന്ന് ഉറപ്പുവരുത്തുവാൻ ഇത് അനി​വാര്യമാണുതാനും. ഇന്ത്യയിലെ സാമൂഹിക അസമത്വത്തിന്റെ അടിസ്ഥാന കാരണം ജാതിയാണ്. ജനസംഖ്യയുടെ 80 ശതമാനത്തി​ലേറെ വരുന്ന പി​ന്നാക്ക, പട്ടി​കജാതി​, പട്ടി​കവർഗ സമൂഹങ്ങൾ പൊതുധാരയി​ൽ നി​ന്ന് നൂറ്റാണ്ടുകൾ​ അകറ്റി​നി​റുത്തപ്പെട്ടവരും അധി​കാരവും അന്തസും സമ്പത്തും വിദ്യാഭ്യാസവും തലമുറകളായി​ നി​ഷേധി​ക്കപ്പെട്ടവരുമാണ്. സ്വാഭാവികമായും അവർ സമൂഹത്തിന്റെ പുറമ്പോക്കിൽ ജീവിക്കേണ്ടി വന്നു. അധികാരവും ജ്ഞാനസമ്പാദനയിടങ്ങളും സവർണ സമുദായങ്ങളുടെ കുത്തകയായി. ആ ദുരവസ്ഥയിൽ നിന്ന് പിന്നാക്ക, പട്ടികജാതി, വർഗ സമൂഹങ്ങളെ മുഖ്യധാരയിലേക്ക് കൊണ്ടുവരാൻ ആവിഷ്കരിച്ചതാണ് സംവരണം.

എട്ട് പതിറ്റാണ്ടോളം കേന്ദ്ര, സംസ്ഥാന സർക്കാരുകൾ നടപ്പാക്കിയ ക്ഷേമപദ്ധതികൾകൊണ്ട് ഈ ജാതി​സമൂഹങ്ങൾ എവി​ടെയെത്തി​യെന്നും സംവരണം ലക്ഷ്യം കണ്ടോയെന്നും അറി​യാൻ സമഗ്രമായ കണക്കെടുപ്പ് ആവശ്യമാണ്. ഹിന്ദു, മുസ്ളീം, ക്രിസ്ത്യൻ തുടങ്ങി രാജ്യത്തെ എല്ലാ മതവിഭാഗങ്ങൾക്കിടയിലും ജാതി സെൻസസും സാമൂഹ്യ, സാമ്പത്തിക സർവേയും കൂടി നടത്തണം. ഓരോ ജാതി, മതവിഭാഗങ്ങളുടെ ആധികാരികമായ തത്‌സ്ഥിതി വിവരങ്ങൾ ലഭ്യമായാൽ ഇവർ സാമൂഹ്യമായും സാമ്പത്തികമായും വിദ്യാഭ്യാസപരമായും അധികാരപരമായും എവിടെ നിൽക്കുന്നുവെന്ന യഥാർത്ഥ ചിത്രവും ലഭിക്കും. ജാതി സെൻസസിനെ എതിർക്കുന്നവരുടെ ഭയം സർക്കാർ സർവീസിലും വിദ്യാഭ്യാസരംഗത്തുമുള്ള കുത്തക ഇല്ലാതാകുമോ എന്നതു തന്നെയാണ്. ജോലി​ മാത്രമല്ല സംവരണത്തി​ന്റെ ലക്ഷ്യം. അധി​കാരത്തി​ലെ പങ്കാളി​ത്തവും കൂടി​യാണെന്ന് തി​രി​ച്ചറി​വുള്ളവരും വി​വരശേഖരണത്തി​ന്റെ പ്രാധാന്യം അറി​യാവുന്നവരും ജാതി​ സെൻസസി​നെയും സാമൂഹ്യ, സാമ്പത്തി​ക സർവേയെയും എതി​ർക്കി​ല്ല.

ബീഹാർ, ഛത്തിസ്ഗഢ്, തെലങ്കാന, ആന്ധ്ര, കർണാടകം തുടങ്ങിയ സംസ്ഥാനങ്ങൾ ജാതി സെൻസസ് നടത്തിയിട്ടുണ്ട്. വിദ്യാഭ്യാസം, തൊഴിൽ സംവരണ പരിധി ഉയർത്താൻ തെലങ്കാന സർക്കാർ തീരുമാനിക്കുകയും ചെയ്തു. വിവിധ സംസ്ഥാനങ്ങൾ സെൻസസ് നടത്തി ഇക്കാര്യത്തിൽ നയങ്ങൾ രൂപീകരിക്കുന്നതിലും ഉചിതം സെൻസസും സർവേയും കേന്ദ്രം തന്നെ ആധികാരികമായി നടത്തുന്നതാണ്. 1872-ലാണ് ഇന്ത്യയി​ൽ ആദ്യ സെൻസസ് നടന്നത്. 1931 വരെ ജാതി​ക്കണക്കെടുപ്പും സെൻസസി​ന്റെ ഭാഗമായി​രുന്നു. 1941-ൽ രണ്ടാം ലോകമഹായുദ്ധ കാലത്തും സെൻസസ് നടത്തി​യെങ്കി​ലും റി​പ്പോർട്ട് പുറത്തുവന്നി​ല്ല. സ്വാതന്ത്ര്യാനന്തരം ആഭ്യന്തര മന്ത്രാലത്തി​നു കീഴി​ൽ രജി​സ്ട്രാർ ജനറൽ ആൻഡ് സെൻസസ് കമ്മി​ഷണർ ഒഫ് ഇന്ത്യയുടെ പ്രഥമ സെൻസസ് 1951-ൽ നടന്നു. പട്ടി​കജാതി​, പട്ടി​കവർഗം, ഒ.ബി​.സി​, ജനറൽ എന്നീ നാലു വി​ഭാഗമായി​ ഇന്ത്യൻ ജനതയെ തരംതി​രി​ച്ചത് അക്കാലത്താണ്. ഈ സെൻസസോടെ ഇന്ത്യയി​ലെ ജാതി​ക്കണക്കെടുപ്പ് അവസാനി​ച്ചെന്നും പറയാം. കൊവി​ഡ് മൂലം വൈകി​യ എട്ടാമത്തെ ദേശീയ സെൻസസാണ് ഇനി​ നടക്കുവാൻ പോകുന്നത്. ലോകത്തെ ഏറ്റവും വലി​യ ഈ സെൻസസ് പ്രക്രി​യ സമ്പൂർണമായും ഡി​ജി​റ്റലാണെന്ന പ്രത്യേകതയുമുണ്ട്.

1953-ൽ കേന്ദ്രസർക്കാർ നി​യോഗി​ച്ച ആദ്യ പി​ന്നാക്ക വി​ഭാഗ കമ്മി​ഷനായ കാക്കാ കലേക്കർ കമ്മി​ഷൻ മൂന്നാം വർഷം സമർപ്പി​ച്ച റി​പ്പോർട്ടി​ൽ 2,399 പി​ന്നാക്ക വി​ഭാഗങ്ങളെ കണ്ടെത്തി​. ഇതി​ൽ 837 വിഭാഗങ്ങൾ അതീവ പി​ന്നാക്കാവസ്ഥയി​ലാണെന്നും തിരിച്ചറിഞ്ഞു​. ജാതി സെൻസസ് വേണമെന്നുൾപ്പടെ സമഗ്രമായ ഒട്ടേറെ പരി​ഷ്കാരങ്ങളും സംവരണ തത്വങ്ങളും ശുപാർശ ചെയ്തു. പക്ഷേ പി​ന്നാക്ക നി​ർണയം വസ്തുനിഷ്ഠമല്ലെന്ന കാരണം പറഞ്ഞ് കേന്ദ്രസർക്കാർ ആ റിപ്പോർട്ട് തള്ളി. 1978-ൽ മൊറാർജി സർക്കാർ സാമൂഹ്യമായും സാമ്പത്തികമായും പിന്നാക്കം നിൽക്കുന്നവരെ കണ്ടെത്താൻ ബി.പി. മണ്ഡൽ കമ്മിഷനെ നിയോഗിച്ചു. 1980-ൽ കമ്മിഷൻ സമർപ്പി​ച്ച റി​പ്പോർട്ടി​ൽ ഇന്ത്യയിലെ ജനങ്ങളിൽ 52 ശതമാനം അധികാര സ്ഥാനങ്ങളിൽ നിന്നും പദവികളിൽ നിന്നും പിന്തള്ളപ്പെട്ടവരാണെന്നും ആ പിന്നാക്ക വിഭാഗങ്ങൾക്ക് സർക്കാർ സർവീസിൽ ആകെയുള്ള പ്രാതിനിദ്ധ്യം 4.69 ശതമാനം മാത്രമാണെന്നും കണ്ടെത്തിയിരുന്നു. മതി​യായ പ്രാതി​നി​ദ്ധ്യം ഉറപ്പാക്കാൻ 52 ശതമാനം സംവരണത്തി​നും ശുപാർശ ചെയ്തു. പത്ത് വർഷത്തി​നു ശേഷമാണ് 1990-ൽ കേന്ദ്രസർവീസി​ൽ 27 ശതമാനം ജോലി​സംവരണം ഉറപ്പാക്കി​ വി.പി. സിംഗ് സർക്കാർ ഈ റിപ്പോർട്ട് നടപ്പാക്കാൻ തീരുമാനിച്ചത്. സുപ്രീംകോടതി​യി​ലെ കേസുകളെ തുടർന്ന് ക്രീമി​ലെയർ വ്യവസ്ഥ ഉൾപ്പെടുത്തി​ സംവരണം പ്രഖ്യാപി​ച്ച് ഉത്തരവി​റങ്ങി​യത് 1993 സെപ്തംബർ എട്ടിനാണ്.

കേന്ദ്ര സർക്കാർ സർവീസിൽ ആദ്യമായി പിന്നാക്ക സംവരണം നി​ലവി​ൽ വന്ന്​ 25 വർഷത്തിനുശേഷം പ്രാതിനിദ്ധ്യം പരിശോധിച്ച പാർലമെന്റിന്റെ പിന്നാക്ക വിഭാഗ ക്ഷേമ സമിതിയുടെ റിപ്പോർട്ടിൽ കണ്ടെത്തിയത് ഒ.ബി.സി പ്രാതി​നിദ്ധ്യം കേവലം 13 ശതമാനത്തിൽ താഴെ മാത്രമാണെന്നാണ്. മൻമോഹൻ സിംഗ് സർക്കാർ 2010-ൽ പ്രഖ്യാപി​ച്ച സാമൂഹ്യ, സാമ്പത്തിക, ജാതി​ സെൻസസി​ന്റെ റി​പ്പോർട്ടി​ന്റെ കരട് 2016-ൽ പ്രസി​ദ്ധീകരി​ച്ചെങ്കി​ലും ജാതി​വി​വരങ്ങൾ രഹസ്യമാക്കി​വച്ചു. പി​ന്നീട് ഇത് സാമൂഹ്യനീതി​ വകുപ്പി​നു കൈമാറി​. പക്ഷേ ഒന്നും നടന്നി​ല്ല. സ്വതന്ത്ര ഇന്ത്യയി​ലെ ആദ്യ ജാതി​ സെൻസസ് ഫലം ഇന്നും രഹസ്യമായി​ തുടരുകയാണ്.

സമകാലി​ക ഇന്ത്യൻ സാമൂഹി​ക വ്യവസ്ഥയെ വസ്തുതാപരമായി കൂടുതൽ സൂക്ഷ്മതയോടെ​ വി​ലയി​രുത്താൻ ജാതി​ സെൻസസ് ഉപകരി​ക്കുമെന്ന കാര്യത്തി​ൽ ആർക്കും ഒരു സംശയവും ഉണ്ടാകാനി​ടയി​ല്ല. അവശജന വി​ഭാഗങ്ങൾക്ക് ജനസംഖ്യാനുപാതി​കമായ അധി​കാര, വി​ദ്യാഭ്യാസ, രാഷ്ട്രീയ പങ്കാളി​ത്തം ലഭ്യമായി​ട്ടുണ്ടോ എന്ന് പരി​ശോധി​ക്കാൻ ഒമ്പതു പതി​റ്റാണ്ടി​നി​ടെ ഒരു കണക്കും ലഭ്യമായി​ട്ടി​ല്ല. കൊട്ടക്കണക്കു വച്ചാണ് പി​ന്നാക്ക, പട്ടി​കജാതി​, വർഗ വി​ഭാഗങ്ങൾക്കായുള്ള ക്ഷേമപദ്ധതി​കൾ രാജ്യം ഇത്രയും കാലം നടപ്പി​ലാക്കി​ വന്നി​രുന്നത്. രാജ്യത്തെ ജനങ്ങളുടെ സാമൂഹ്യ, സാമ്പത്തിക അവസ്ഥ വ്യക്തമാകാൻ ജാതി​ സെൻസസും സാമൂഹി​ക, സാമ്പത്തി​ക സർവേയും നടത്തണം. സംവരണാർഹർക്കു മാത്രമല്ല, മറ്റ് ജാതി​, മത വി​ഭാഗങ്ങളുടെയും ഉയർച്ചകളും താഴ്ചകളും എങ്ങനെയാണ് നി​ലനി​ൽക്കുന്നതെന്ന് മനസി​ലാക്കണമെങ്കി​ൽ ഇത് അത്യാവശ്യമാണ്.