'കണ്ണൂരിനെ അശാന്തമാക്കാന്‍ നേതൃത്വം കൊടുത്ത സ്വയം സേവകന്‍', വിമര്‍ശനവുമായി എം സ്വരാജ്

ബിജെപി സംസ്ഥാന വൈസ് പ്രസിഡന്റ് സി. സദാനന്ദനെ രാജ്യസംഭയിലേക്ക് നാമനിര്‍ദേശം ചെയ്തതിനെ വിമര്‍ശിച്ച് സിപിഎം സംസ്ഥാന സെക്രട്ടേറിയറ്റ് അംഗം എം സ്വരാജ്. രാഷ്ട്രപതിയുടെ നടപടി ഭരണഘടനാ വിരുദ്ധമാണെന്ന് ചൂണ്ടിക്കാണിക്കാനുള്ള ആര്‍ജവം മലയാള മാദ്ധ്യമങ്ങളില്‍ കാണുന്നില്ലെന്ന് അദ്ദേഹം ഫേസ്ബുക്ക് പോസ്റ്റില്‍ പറഞ്ഞു. ഒരു കാലത്ത് കണ്ണൂരിനെ അശാന്തമാക്കാന്‍ നേതൃത്വം കൊടുത്ത സ്വയംസേവകനും ഇപ്പോഴത്തെ ബിജെപി സംസ്ഥാന വൈസ് പ്രസിഡന്റുമായ സി. സദാനന്ദനെ രാജ്യസഭയിലേക്ക് രാഷ്ട്രപതി നാമനിര്‍ദേശം ചെയ്തതില്‍ മാദ്ധ്യമങ്ങള്‍ പൊതുവെ ആഹ്ലാദിക്കുന്നതായാണ് കാണുന്നതെന്നും അദ്ദേഹം കുറിപ്പില്‍ പറഞ്ഞു.

എം സ്വരാജിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം ചുവടെ

ഒരു കാലത്ത് കണ്ണൂരിനെ അശാന്തമാക്കാന്‍ നേതൃത്വം കൊടുത്ത സ്വയംസേവകനും ഇപ്പോഴത്തെ ബിജെപി സംസ്ഥാന വൈസ് പ്രസിഡന്റുമായ ശ്രീ. സദാനന്ദനെ രാജ്യസഭയിലേക്ക് രാഷ്ട്രപതി നാമനിര്‍ദേശം ചെയ്തതില്‍ മാധ്യമങ്ങള്‍ പൊതുവെ ആഹ്ലാദിക്കുന്നതായാണ് കാണുന്നത്.
രാഷ്ട്രപതിയുടെ നാമനിര്‍ദേശം ഭരണഘടനാ വിരുദ്ധമാണെന്ന് ചൂണ്ടിക്കാട്ടാനുള്ള ആര്‍ജവം മലയാള മാധ്യമങ്ങളില്‍ പൊതുവെ കാണുന്നില്ല.
എങ്ങനെയുള്ളവരെയാണ് രാജ്യസഭയിലേക്ക് നാമനിര്‍ദ്ദേശം ചെയ്യേണ്ടതെന്ന് ഭരണഘടന വ്യക്തമാക്കുന്നുണ്ട്.
' The members to be nominated by the President under sub - clause (a) of clause (1) shall consist of persons having special knowledge or practical experience in respect of such matters as the following, namely -
Literature, science, art, and social service '
സാഹിത്യ, ശാസ്ത്ര, കലാ, സാമൂഹ്യ പ്രവര്‍ത്തന രംഗങ്ങളിലെ അതികായരായി ദേശീയ പ്രശസ്തി നേടിയ പ്രതിഭകളെ മുന്‍കാലങ്ങളില്‍
നാമനിര്‍ദേശം ചെയ്തിട്ടുണ്ട്.
ലത മങ്കേഷ്‌കറും സച്ചിന്‍ ടെന്‍ഡുല്‍കറും ഒക്കെ പരിഗണിക്കപ്പെട്ട സ്ഥാനത്തേയ്ക്കാണ് ഇപ്പോള്‍
ബി ജെ പി സംസ്ഥാന വൈസ് പ്രസിഡന്റ് വരുന്നത് !
രാജ്യസഭാ നാമനിര്‍ദേശത്തില്‍ രാഷ്ട്രീയ താല്പര്യം കലരുന്നത് മുന്‍പും ചര്‍ച്ചയായിട്ടുണ്ട്. പക്ഷെ ഇതുപോലൊന്നു കേട്ടിട്ടില്ല.
ഏതു രംഗത്തെ പ്രതിഭയാണ് ഇദ്ദേഹം എന്ന് ചോദിക്കാന്‍ നാലാം തൂണുകള്‍ക്ക് നാവു പൊങ്ങുന്നുമില്ല.
'സാമൂഹിക സേവനത്തിനും വിദ്യാഭ്യാസ രംഗത്തെ മികവിനുമാണ് നാമനിര്‍ദേശം' എന്ന് മാതൃഭൂമിപത്രം പറയുന്നു. എന്നാല്‍
ആ വാര്‍ത്തയില്‍ തന്നെ പ്രധാനമന്ത്രി പറഞ്ഞ കാരണം അതല്ലതാനും.
കേരളത്തില്‍ അക്രമരാഷ്ട്രീയമാണെന്ന ആരോപണം ദേശീയതലത്തില്‍ ചര്‍ച്ചയാക്കാനാണു പരിപാടിയെന്നു മനോരമപത്രം പറയുന്നു. പക്ഷെ അവിടെ ഭരണഘടനാ ലംഘനം നടന്നുവെന്നു പറയാന്‍ മനോരമയ്ക്ക് വയ്യ.
ബി ജെ പിക്ക് അവരുടെ വൈസ് പ്രസിഡന്റിനെ രാജ്യസഭയിലേക്ക് അയക്കാം. ബിജെപി ക്ക് സ്വാധീനമുള്ള ഏതെങ്കിലും സംസ്ഥാനത്തു നിന്നും ആ പാര്‍ട്ടിയുടെ പ്രതിനിധിയായി അയക്കട്ടെ. അല്ലാതെ ഭരണഘടനയെയും പ്രതിഭകളെയും അപമാനിച്ചുകൊണ്ടാവരുത്.
- എം സ്വരാജ്