ഏഴാം ക്ലാസ് പാസായവർക്ക് സർക്കാർ ജോലി; പ്രായപരിധി 50, ഉടൻ അപേക്ഷിക്കൂ

ഏഴാം ക്ലാസ് പാസായവർക്ക് തൊഴിലവസരം. പ്ലാന്റേഷൻ കോർപ്പറേഷൻ ഓഫ് കേരള ലിമിറ്റഡിൽ വർക്കർ തസ്‌തികയിലാണ് ഒഴിവുള്ളത്. ഇത് സംബന്ധിച്ച വിജ്ഞാപനം പ്ലാന്റേഷൻ കോർപ്പറേഷൻ പുറത്തിറക്കി. സംസ്ഥാനത്തുടനീളം 460 ഒഴിവുകളാണ് റിപ്പോർട്ട് ചെയ്‌തിരിക്കുന്നത്. രാജപുരം - 75, ഓയിൽ പാം - 13, നിലമ്പൂർ -92, മണ്ണാർക്കാട് - 60, കൊടുമൺ - 55, ചന്ദനപ്പള്ളി - 90, തണ്ണിത്തോട് - 50, അതിരപ്പള്ളി -25 എന്നിങ്ങനെയാണ് ഒഴിവുകൾ.

ഓഗസ്റ്റ് 30 ആണ് അപേക്ഷകൾ അയക്കേണ്ട അവസാന തീയതി. തപാൽ വഴിയാണ് അപേക്ഷകൾ അയക്കേണ്ടത്. അപേക്ഷകരുടെ പ്രായം 18ൽ കുറയാനോ 50ൽ കൂടാനോ പാടില്ല. എസ്‌സി/ എസ്‌ടി/ഒബിസി വിഭാഗത്തിൽപ്പെട്ടവർക്ക് പ്രായപരിധിയിൽ നിയമാനുസൃത ഇളവ് ലഭിക്കും. റബ്ബർ തോട്ടം മേഖലയിൽ കുറഞ്ഞത് മൂന്ന് വർഷത്തെ പരിചയമുള്ളവർക്കും ഉയർന്ന പ്രായപരിധിയിൽ ഇളവ് ലഭിക്കും.

അപേക്ഷകർക്ക് ബിരുദം ഉണ്ടായിരിക്കാൻ പാടില്ല. ബിരുദം നേടിയിട്ടില്ല എന്ന് വ്യക്തമാക്കുന്ന ഒരു സമ്മതപത്രവും സമർപ്പിക്കണം. തോട്ടങ്ങളിൽ ജോലി ചെയ്യാൻ ശാരീരികമായി യോഗ്യതയുള്ളവരായിരിക്കണം. തിരഞ്ഞെടുക്കപ്പെടുന്നവർക്ക് മാനദണ്ഡപ്രകാരമുള്ള ശമ്പളം ലഭിക്കും. ഇവർക്ക് നേത്ര പരിശോധന, ബിഎംഐ ടെസ്റ്റ്, അഭിമുഖം എന്നിവ ഉണ്ടായിരിക്കും. അഭിമുഖത്തിന്റെ സമയത്ത് യോഗ്യത, പ്രായം, ജാതി എന്നിവ തെളിയിക്കുന്ന ഒറിജിനൽ സർട്ടിഫിക്കറ്റുകൾ ഹാജരാക്കണം.