ഫൈവ് സ്റ്റാർ സുരക്ഷ, 28 കിലോമീറ്റർ മൈലേജ്, വില 10 ലക്ഷം മാത്രം, പുറത്തിറങ്ങി ദിവസങ്ങൾ കൊണ്ട് കാറിനെ ഇരുകൈയും നീട്ടി സ്വീകരിച്ച് ഇന്ത്യക്കാർ

മിഡ് സൈസ് എസ്‌യുവികൾക്ക് ഇന്ത്യയിലിപ്പോൾ പ്രാധാന്യം ഏറി വരികയാണല്ലോ. സുരക്ഷയുടെ പേരിൽ പൊതുവെ ചീത്തപ്പേര് കേൾക്കാറുള്ള മാരുതി അടുത്തിടെ പുറത്തിറക്കിയ മിഡ് സൈസ് എസ്‌യുവിയായ വിക്‌ടോറിസ് ഒരു മാസം തികയുന്നതിനിടെ വിൽപനയിൽ വൻ കുതിപ്പ് നടത്തിയതായാണ് വിവരങ്ങൾ പുറത്തുവരുന്നത്. സെപ്‌തംബർ 22ന് ലോഞ്ച് ചെയ്‌ത വിക്‌ടോറിസിന് 25,000ലധികം ബുക്കിംഗുകളാണ് ലഭിച്ചത്. ഇതുവരെ 4261 യൂണിറ്റുകൾ മാരുതി വിറ്റഴിച്ചുകഴിഞ്ഞു. സെലെറിയോ, എസ്‌പ്രസോ, ഇഗ്നിസ്, എക്‌സ്‌എൽ6, ജിമിനി,ഇൻവിക്‌ടോ എന്നീ മറ്റ് മാരുതി മോഡലുകളെക്കാൾ വിക്‌ടോറിസ് വിൽപനയിൽ മുന്നിലെത്തി.

മാരുതി ഗ്രാൻഡ് വിറ്റാര, ഹ്യൂണ്ടായ് ക്രേറ്റ, കിയ സെൽറ്റോസ്, ഹോണ്ട എലിവേറ്റ്, ടൊയോട്ടയുടെ ഹൈറൈഡർ എന്നിവയാണ് മാർക്കറ്റിൽ വിക്‌ടോറിസിന്റെ എതിരാളികൾ. പ്രാരംഭവില 10.50 ലക്ഷം രൂപയാണ്. ഗ്‌ളോബൽ എൻസിഎപി ക്രാഷ് ടെസ്റ്റിൽ ഫൈവ് സ്റ്റാർ സുരക്ഷാ റേറ്റിംഗാണ് വിക്‌ടോറിസ് സ്വന്തമാക്കിയത്. ഭാരത് എൻസിഎപി ക്രാഷ് ടെസ്റ്റിംഗിലും ഫൈവ് സ്റ്റാർ സുരക്ഷാ റേറ്റിംഗ് വിക്‌ടോറിസ് നേടിയിരുന്നു. ഈ സെഗ്‌മെന്റിൽ ഒരു കാർ നോക്കുന്നവർക്ക് വിക്‌ടോറിസ് ഡബിൾ ഓക്കെയെന്ന് അർത്ഥം.

മുതിർന്നവരുടെ സുരക്ഷ നോക്കിയാൽ 34ൽ 33.72 പോയിന്റും, കുട്ടികളുടെ സുരക്ഷയിൽ 49 പോയിന്റിൽ 41ഉം വിക്‌ടോറിസ് നേടിക്കഴിഞ്ഞു. നേർക്കുനേർ സുരക്ഷ പരിശോധിക്കുന്ന ഫ്രണ്ടൽ ഓഫ്‌സെറ്റ് ഡിഫോർമബിൾ ബാരിയർ ടെസ്റ്റിൽ ഡ്രൈവർക്ക് മികച്ച സുരക്ഷ തന്നെ നൽകും. വശങ്ങളിൽ നിന്നുള്ള സുരക്ഷ നോക്കിയാൽ സൈഡ് പോൾ ഇംപാക്ട് ടെസ്റ്റിലും സൈഡ് മൂവബിൾ ഡിഫോർമബിൾ ബാരിയർ ടെസ്റ്റിലും ഡ്രൈവർക്ക് നല്ല സുരക്ഷ ഈ മിഡ് സൈസ് എസ്യുവി നൽകുന്നുണ്ട്.

ആറ് എയർബാഗുകളും ഇലക്‌ട്രോണിക് സ്‌റ്റെബിലിറ്റി കൺട്രോളും ഹിൽ ഹോൾഡ് അസിസ്റ്റും കടഛഎകത ചൈൽഡ് സീറ്റ് ആങ്കറുകളും മൂന്ന് പോയിന്റ് സീറ്റുബെൽറ്റുകൾ ഓർമ്മപ്പെടുത്തലും ഇബിഡിയുള്ള എബിഎസും അങ്ങനെ നിരവധി പ്രത്യേകതകളുണ്ട്. 27 വകഭേദങ്ങൾ വിക്‌ടോറിസിനുണ്ട്. 10 കളർ ഓപ്ഷനുമുണ്ട്. ഏഴെണ്ണം മോണോ ടോൺ കളർ ഓപ്ഷനും മൂന്നെണ്ണം ഡ്യുവൽ ടോൺ കളർ ഓപ്ഷനുമാണ്. മൂന്ന് എഞ്ചിൻ ഓപ്ഷനുകളാണുള്ളത്. ഫൈവ്സീറ്റർ എസ്യുവിയുടെ മാനുവൽ വേരിയന്റിന് കമ്പനി 21.18 കിലോമീറ്റർ മൈലേജ് അവകാശപ്പെടുന്നു. ഓട്ടോമാറ്റിക്കിന് 21.06 ആണ് മൈലേജ്. ഓൾ വീൽ ഡ്രൈവ് വേരിയന്റ് 19.07ആണ് മൈലേജ് നൽകുക. എന്നാൽ സിഎൻജി വേരിയന്റിന് കിലോഗ്രാമിന് 27.02 മൈലേജ് ലഭിക്കും. നിലവിൽ മാരുതിയുടെ ഗ്രാൻഡ് വിറ്റാരയ്ക്ക് 4345 മില്ലിമീറ്റർ നീളമുണ്ടെങ്കിൽ വിക്ടോറിസിന് അൽപം വലിപ്പം കൂടും 4360 ആണ് നീളം