പിരിഞ്ഞുപോയ പാൽ കളയല്ലേ, ദീപാവലിക്ക് ഉഗ്രൻ രുചിയിൽ മധുരപലഹാരം വീട്ടിൽതന്നെ തയ്യാറാക്കാം

ദീപാവലി ആഘോഷിക്കാനുള്ള ഒരുക്കത്തിലാണ് ലോകമെമ്പാടുമുള്ള ഇന്ത്യക്കാർ. ദീപാവലി ദിനത്തിൽ പരസ്‌പരം മധുരം കൈമാറുന്നത് പതിവാണ്. ഇന്നത്തെക്കാലത്ത് മിക്കവാറും പേരും കടകളിൽ നിന്ന് മധുരപലഹാരങ്ങൾ വാങ്ങുകയാണ് പതിവ്. എന്നാൽ ഇക്കൊല്ലത്തെ ദീപാവലിക്ക് വീട്ടിൽതന്നെ ഉഗ്രൻ രുചിയിൽ ദീപാവലി പലഹാരം തയ്യാറാക്കാം, അതും അധികമാരും പരീക്ഷിക്കാത്ത ചേരുവകൾകൊണ്ട്.

പിരിഞ്ഞുപോയ പാലുകൊണ്ടാണ് ഈ മധുരപലഹാരം തയ്യാറാക്കുന്നത്. വീട്ടിൽ പാൽ വാങ്ങുമ്പോൾ ചിലപ്പോഴൊക്കെ നമ്മളീ പ്രശ്‌നം നേരിടാറുണ്ട്. പഴയ പാലാണെങ്കിൽ അവ ചൂടാക്കുമ്പോൾ പിരിഞ്ഞുപോകും. പലരും ഇങ്ങനെ പിരിഞ്ഞുപോകുന്ന പാൽ കളയുകയായിരിക്കും ചെയ്യാറുള്ളത്. മറ്റുചിലർ അത് തൈരാക്കി മാറ്റുകയോ പനീർ തയ്യാറാക്കുകയോ ചെയ്യും. എന്നാൽ പിരിഞ്ഞുപോയ പാലുപയോഗിച്ച് നാവിൽ വെള്ളമൂറുന്ന തരത്തിൽ രുചിയേറിയ മധുരപലഹാരം ഉണ്ടാക്കാമെന്ന് പലർക്കും അറിവുണ്ടായിരിക്കുകയില്ല.

ആവശ്യമായ ചേരുവകൾ

• പാൽ
• നാരങ്ങാനീര്
• റവ
• പഞ്ചസാര
• വെള്ളം
• ഏലയ്ക്ക

തയ്യാറാക്കുന്ന വിധം

• പിരിഞ്ഞുവന്ന പാലിന്റെ വെള്ളം അരിച്ചു കളഞ്ഞതിനുശേഷം നന്നായി പൊടിച്ചുവയ്ക്കാം.
• ഇതിലേയ്ക്ക് രണ്ട് ടേബിൾ സ്‌പൂൺ റവ ചേർത്ത് കുഴച്ച് ചെറിയ ഉരുളകളാക്കി മാറ്റി വയ്ക്കാം.
• അടുത്തതായി അടി കട്ടിയുള്ള പാത്രം അടുപ്പിൽവച്ച് ഒരു കപ്പ് പഞ്ചസാര ചൂടാക്കണം. ഇതിൽ രണ്ടുകപ്പ് വെള്ളം ചേർത്തിളക്കി പഞ്ചസാര ലായനി തയ്യാറാക്കണം. പഞ്ചസാര അലിഞ്ഞുവരുമ്പോൾ നാല് ഏലയ്ക്ക പൊടിച്ചത് ചേർക്കാം.
• തിളച്ചുകൊണ്ടിരിക്കുന്ന പഞ്ചസാര ലായനിയിലേയ്ക്ക് നേരത്തെ തയ്യാറാക്കി വച്ചിരിക്കുന്ന ഉരുളകൾ ചേർത്ത് പത്തുമിനിട്ട് ചെറുതീയിൽ വേവിക്കാം. നല്ല രുചിയേറിയ മധുരപലഹാരം റെഡി.