'അത് ഞാനല്ല, അവരെ സൂക്ഷിക്കണം'; മുന്നറിയിപ്പുമായി അദിതി റാവു ഹൈദരി

'സൂഫിയും സുജാതയും' എന്ന ചിത്രത്തിലൂടെ മലയാളി പ്രേക്ഷകർ നെഞ്ചിലേറ്റിയ നടിയാണ് അദിതി റാവു ഹൈദരി. ഹിന്ദി, തമിഴ് ഭാഷകളിലെ ചിത്രങ്ങളിലാണ് താരം കൂടുതലും അഭിനയിക്കുന്നത്. മികച്ച ഗായിക കൂടിയായ താരം സോഷ്യൽ മീഡിയയിലും സജീവമാണ്.

ഇപ്പോഴിതാ, തന്റെ പേരിൽ മറ്റാരോ വാട്‌സാപ്പിലൂടെ തട്ടിപ്പ് നടത്തുന്നുണ്ടെന്ന് ആരാധകർക്ക് മുന്നറിയിപ്പ് നൽകുകയാണ് അദിതി. ഇൻസ്റ്റഗ്രാം അക്കൗണ്ടിൽ പോസ്‌റ്റ് ചെയ്ത കുറിപ്പിലൂടെയാണ് താരം വിവരം പങ്കുവച്ചത്. തന്റെ ചിത്രങ്ങൾ ഉപയോഗിച്ച് താനാണെന്ന് തെറ്റിധരിപ്പിച്ച് ആരോ ഫോട്ടോഗ്രാഫർമാരോട് ഫോട്ടോഷൂട്ടിന് താൽപ്പര്യമുണ്ടെന്ന് സന്ദേശം അയയ്‌ക്കുന്നുണ്ടെന്നാണ് അദിതി റാവു വെളിപ്പെടുത്തിയത്.

' ഇന്ന് കുറച്ച് പേർ എന്റെ ശ്രദ്ധയിൽപ്പെടുത്തിയ കാര്യത്തെക്കുറിച്ച് നിങ്ങളോട് സംസാരിക്കാൻ ഞാൻ ആഗ്രഹിക്കുന്നു. ആരോ വാട്സാപ്പിൽ ഞാനാണെന്ന് കാണിച്ച് ഫോട്ടോഷൂട്ടുകളെക്കുറിച്ച് പറഞ്ഞ് ഫോട്ടോഗ്രാഫർമാർക്ക് സന്ദേശം അയ‌യ്ക്കുന്നുണ്ട്. ജോലിക്കായി ഞാൻ സ്വകാര്യ നമ്പർ ഉപയോഗിക്കാറില്ല. എല്ലാം എന്റെ ടീമിലൂടെയാണ് നടക്കുന്നത്'- അദിതി റാവു ഇൻസ്റ്റഗ്രാമിൽ കുറിച്ചു. ദയവായി ആ നമ്പരുമായി ആശയവിനിമയം നടത്തരുതെന്നും അസ്വഭാവികമായി എന്തെങ്കിലും ശ്രദ്ധയിൽപ്പെട്ടാലുടൻ തന്റെ ടീമിനെ അറിയിക്കണമെന്നും താരം മുന്നറിയിപ്പ് നൽകി.

തമിഴ് നടൻ സിദ്ധാർത്ഥാണ് അദിതിയുടെ ജീവിത പങ്കാളി. ഏറെ നാളത്തെ പ്രണയത്തിനൊടുവിൽ കഴിഞ്ഞ വർഷം സെപ്‌തംബറിലാണ് ഇരുവരും വിവാഹിതരായത്. ഇരുവരും സോഷ്യൽ മീഡിയയിൽ പങ്കു വയ്‌ക്കുന്ന ഒന്നിച്ചുള്ള ചിത്രങ്ങളും വീഡിയോകളും പലപ്പോഴും വലിയ രീതിയിൽ ആരാധകരുടെ ഇഷ്ടം പിടിച്ചുപറ്റാറുണ്ട്.