ഇന്ത്യൻ സമ്പദ്‌വ്യവസ്ഥ , പരിഷ്‌കാരങ്ങളുടെ കുതിരശക്തി!

സാമ്പത്തിക ലോകത്ത്, സംഖ്യകൾ പലപ്പോഴും സങ്കീർണമായി തോന്നും. എന്നാൽ തൊഴിലാളികൾ, കടയുടമകൾ, ചെറുകിട ബിസിനസുകാർ,​ കർഷകർ, വിദ്യാർത്ഥികൾ, കുടുംബങ്ങൾ എന്നിവർ ഉൾപ്പെടെ ദശലക്ഷക്കണക്കിന് സാധാരണ ഇന്ത്യക്കാരെ സംബന്ധിച്ചിടത്തോളം ഏറ്റവും പുതിയ സാമ്പത്തിക വാർത്തകൾ പ്രതീക്ഷയുടെയും പുരോഗതിയുടെയും അവസരത്തിന്റെയും സത്യം വെളിപ്പെടുത്തുന്നതാണ്.

2025- 26 സാമ്പത്തിക വർഷത്തിന്റെ രണ്ടാം പാദത്തിൽ ഇന്ത്യയുടെ മൊത്ത ആഭ്യന്തര ഉത്പാദനം (ജി.ഡി.പി)​

8.2 ശതമാനം വളർച്ച രേഖപ്പെടുത്തിയതാണ് ഈ പ്രതീക്ഷകളുടെ കാരണമായി വർത്തിക്കുന്നത്. ആറ് പാദങ്ങളിലെ ഏറ്റവും വേഗതയേറിയ വളർച്ചാ നിരക്കാണ് ഇത്. ആഗോള തലത്തിലുള്ള തിരിച്ചടികളും യു.എസ് താരിഫുകളും ഇന്ത്യയിൽ വ്യാപാര മേഖലയേയും സാമ്പത്തിക വളർച്ചയേയും തടസപ്പെടുത്തുമെന്ന സാമ്പത്തിക വിദഗ്ദ്ധരുടെ എല്ലാ പ്രവചനങ്ങളെയും അപ്രസക്തമാക്കിക്കൊണ്ടാണ് ഇന്ത്യ ഇപ്പോൾ,​ നമ്മുടെ സ മ്പദ്‌വ്യവസ്ഥ സ്ഥിരതയുള്ളതും ശക്തവുമാണെന്ന് തെളിയിച്ചിരിക്കുന്നത്.

തൊട്ടറിയാവുന്ന

നേട്ടങ്ങൾ

രാജ്യം ഉത്പാദിപ്പിക്കുന്ന ചരക്കുകളുടെയും സേവനങ്ങളുടെയും ആകെ മൂല്യമാണ് ജി.ഡി.പിയിൽ അടിസ്ഥാനപരമായി അളക്കുന്നത്. 8.2 ശതമാനം വളർച്ച ഇന്ത്യ കൈവരിച്ചതിന്,​ ആകെ ഉത്പന്ന- സേവന മൂല്യം എന്നതിനപ്പുറം മറ്റൊരു അർത്ഥമുണ്ട്. ഫാക്ടറികൾ കൂടുതൽ സാധനങ്ങൾ ഉത്പാദിപ്പിക്കുന്നു,​ വ്യാപാര മേഖലയിൽ കൂടുതൽ കടകൾ തുറന്നിരിക്കുന്നു,​ കൂടുതൽ സേവനങ്ങൾ വാഗ്ദാനം ചെയ്യപ്പെടുന്നു. വിപണിയിൽ കൂടുതൽ പണം വിനിമയം ചെയ്യപ്പെടുന്നു എന്നൊക്കെക്കൂടിയാണ് ആ അർത്ഥം! കൂടുതൽ ജോലികൾ, മികച്ച വേതനം,​ ആവശ്യമുള്ളതും ആഗ്രഹിക്കുന്നതുമായ സാധനങ്ങൾ വാങ്ങാനുള്ള അധിക ശേഷി എന്നിവയാണ് സാധാരണക്കാരെ സംബന്ധിച്ച് ഈ വളർച്ച അനുഭവവേദ്യമാകുന്ന ഘടകങ്ങൾ.

ഈ വളർച്ചയുടെ പ്രധാന ചാലകശക്തികളിലൊന്ന്,​ നിർമ്മാണ മേഖലയുടെ ശക്തമായ പ്രകടനമായിരുന്നു. ഈ മേഖല കൈവരിച്ച വളർച്ചാനിരക്ക് 9.1 ശതമാനമാണ്. അതായത്,​ ഫാക്ടറികൾ ഉത്പാദനം വർദ്ധിപ്പിക്കുന്നു,​ വിദഗ്ദ്ധ- അവിദഗ്ദ്ധ തൊഴിലാളികൾക്ക് ഈ ഫാക്ടറികൾ ഒരുപോലെ ജോലി നൽകുന്നു. പുതിയ വീടുകൾ, മികച്ച റോഡുകൾ, മെച്ചപ്പെട്ട അടിസ്ഥാന സൗകര്യങ്ങൾ എന്നിവയെല്ലാം വളർച്ചയുടെ ദൃശ്യമായ അടയാളങ്ങളാണ്. കുതിച്ചുയരുന്ന സേവന മേഖല 9.2 ശതമാനം വളർച്ച നേടിയെന്നത് അർത്ഥമാക്കുന്നത്,​ ധനകാര്യം, റിയൽ എസ്റ്റേറ്റ്, പ്രൊഫഷണൽ ജോലികൾ എന്നിവയിൽ കൂടുതൽ അവസരങ്ങൾ സംജാതമായി എന്നാണ്. നഗര തൊഴിലാളികൾക്കും പ്രൊഫഷണലുകൾക്കും ഇത് മെച്ചപ്പെട്ട ഉപജീവനമാർഗം സമ്മാനിക്കുന്നു.

സ്വകാര്യ ചെലവ്

പ്രധാനം

സാധനങ്ങൾക്കും സേവനങ്ങൾക്കുമായി ആളുകൾ ചെലവഴിക്കുന്ന തുകയാണ് 'പ്രൈവറ്റ് ഫൈനൽ കൺസ്യൂം എക്സ്പെൻഡിച്ചർ" (PFCE). ഇത് നമ്മുടെ സമ്പദ്‌വ്യവസ്ഥയുടെ ഏകദേശം 62 ശതമാനമാണ്. ഈ പാദത്തിൽ ഇത് 7.9 ശതമാനം വളർച്ച കൈവരിച്ചതായാണ് കണക്ക്. ഇതിന് അർത്ഥം രാജ്യത്തുടനീളമുള്ള ആളുകൾ കൂടുതൽ സമ്പാദിക്കുകയും കൂടുതൽ ചെലവഴിക്കുകയും ചെയ്യുന്നു എന്നാണ്.

ഗ്രാമീണ ഇന്ത്യയിൽ കാർഷിക മേഖലയിലെ വളർച്ച 3.5 ശതമാനം മാത്രമായിരുന്നു. ഇൻപുട്ട് ചെലവുകൾ, കാലാവസ്ഥ തുടങ്ങി വ്യത്യസ്ത ഘടകങ്ങൾ മൂലമാണ് ഇത് സംഭവിച്ചത്. എങ്കിലും,​ കർഷകർക്ക് സബ്‌സിഡികൾ, ഇൻഷുറൻസ്, മിനിമം താങ്ങുവില എന്നിവ നൽകുക വഴി സർക്കാർ കർഷകരെ പിന്തുണച്ചു. ഇത് അവരുടെ വരുമാനം സ്ഥിരപ്പെടുത്താനും ഗ്രാമീണ മേഖലയിൽ വാങ്ങൽ ശേഷി നിലനിറുത്താനും സഹായിച്ചു.

ഇന്ത്യൻ ഉത്പന്നങ്ങൾക്ക് യു.എസ് കനത്ത തീരുവ ചുമത്തിയില്ലേ എന്നും,​ അത് നമ്മുടെ കയറ്റുമതിയെ മന്ദഗതിയിലാക്കുകയും ഇന്ത്യൻ ബിസിനസുകളെ ദോഷകരമായി ബാധിക്കുകയും ചെയ്യില്ലേ എന്നുമാണ് ചിലരുടെ ചോദ്യം. താരിഫ് വർദ്ധിച്ചു എന്നത് സത്യമാണെങ്കിലും, ഇതിനിടയിലും ഇന്ത്യയുടെ കയറ്റുമതി

5.6 ശതമാനം വർദ്ധിച്ചിട്ടുണ്ട്. അതിലും പ്രധാനം, ആഭ്യന്തര സമ്പദ്‌വ്യവസ്ഥ ശക്തമായി ഉയർന്നു എന്നതാണ്. സർക്കാർ പരിഷ്കാരങ്ങളുടെയും സംരംഭങ്ങളുടെയും ഫലമായാണ് പ്രധാനമായും ഇത് സംഭവിച്ചത്.

'മേക്ക് ഇൻ ഇന്ത്യ" കാമ്പയ്‌ൻ, നികുതി ലളിതവത്കരണങ്ങൾ, ഏകീകൃത പേമെന്റ് ഇന്റർഫേസ് (UPI) പോലുള്ള ഡിജിറ്റൽ അടിസ്ഥാന സൗകര്യങ്ങൾ,​ എളുപ്പത്തിലും വേഗത്തിലും വായ്പകൾ ലഭ്യമാകൽ എന്നിവ വലുതും ചെറുതുമായ ബിസിനസുകളെ ശാക്തീകരിച്ചു. ബാങ്ക് വായ്പകൾ 10 ശതമാനത്തിലധികം വർദ്ധിച്ചു. ഇത് സ്റ്റാർട്ടപ്പുകളെയും സൂക്ഷ്മ, ചെറുകിട, ഇടത്തരം സംരംഭങ്ങളെയും (MSME) പിന്തുണച്ചു. വ്യാപാര നിയന്ത്രണങ്ങളുടെ ആഘാതം കുറയ്ക്കാൻ ഈ നയങ്ങൾ സഹായിച്ചതിനൊപ്പം അവ ഇന്ത്യയുടെ 'സാമ്പത്തിക എൻജി"നെ മുഴക്കിക്കൊണ്ടേയിരുന്നു.

സാമ്പത്തിക അച്ചടക്കം നിലനിറുത്തിക്കൊണ്ട് വളർച്ചയെ പ്രോത്സാഹിപ്പിക്കുന്നതിനുള്ള സർക്കാരിന്റെ സന്തുലിത പ്രവർത്തനം ഈ ഫലങ്ങളിൽ തിളങ്ങുന്നുണ്ട്. സർക്കാരിന്റെ അന്തിമ ഉപഭോഗ ചെലവിൽ നേരിയ കുറവുണ്ടായെങ്കിലും, നികുതി വരുമാനം 9.5 ശതമാനം വർദ്ധിച്ചു. ഇത് അധിക സാമ്പത്തിക ഭാരം അടിച്ചേല്പിക്കാതെ തന്നെ അടിസ്ഥാന സൗകര്യങ്ങളിലും ക്ഷേമത്തിലും നിക്ഷേപം തുടരാൻ അനുവദിച്ചു.

റോഡുകൾ, തുറമുഖങ്ങൾ, വൈദ്യുതി ഉത്പാദനം, ഡിജിറ്റൽ പൊതു വസ്തുക്കൾ എന്നിവയിലെ തന്ത്രപരമായ നിക്ഷേപങ്ങൾ ലോജിസ്റ്റിക്സ് ചെലവുകൾ കുറച്ചു. അവ ബിസിനസ് ചെയ്യുക എന്നത് എളുപ്പത്തിലാക്കി. ഈ ഘടകങ്ങൾ ആഭ്യന്തര, വിദേശ നിക്ഷേപകരെ ആകർഷിക്കുകയും,​ വളർച്ച, തൊഴിൽ, നവീകരണം എന്നിവയുടെ ഒരു ഗുണപരമായ സമ്പൂർണചക്രം സൃഷ്ടിക്കുകയും ചെയ്യുന്നു.

യഥാർത്ഥ

നേട്ടങ്ങൾ

 കൂടുതൽ തൊഴിലവസരം: ഉത്പാദനം,​ നിർമ്മാണം, സേവനങ്ങൾ എന്നിവയിലെ വളർച്ച പുതിയ തൊഴിലവസരങ്ങൾ സൃഷ്ടിക്കുന്നു. മെട്രോ നഗരങ്ങളിൽ മാത്രമല്ല, ചെറിയ പട്ടണങ്ങളിലും ഗ്രാമപ്രദേശങ്ങളിലും ഇത് പ്രകടമാണ്.

 മെച്ചപ്പെട്ട വേതനം: ആവശ്യകത വർദ്ധിക്കുന്നതിന് അനുസരിച്ച്, പ്രത്യേകിച്ച് സംഘടിത മേഖലകളിലെ വേതനത്തിൽ വർദ്ധനവുണ്ടാകാനുള്ള സാഹചര്യം.

 വായ്പാ ലഭ്യത: ബിസിനസിനും വ്യക്തിഗത ആവശ്യങ്ങൾക്കും എളുപ്പത്തിൽ വായ്പ ലഭ്യമാകുന്നത് സംരംഭകത്വത്തെ പിന്തുണയ്ക്കുന്നു. ഇത് കുടുംബങ്ങൾക്ക് വീടുകൾ, വാഹനങ്ങൾ, വിദ്യാഭ്യാസം എന്നീവയിൽ നിക്ഷേപിക്കാൻ സാഹചര്യം സൃഷ്ടിക്കുന്നു.

 അടിസ്ഥാന സൗകര്യം: പുതിയ റോഡുകൾ, മെച്ചപ്പെട്ട പൊതുഗതാഗതം, തടസരഹിത വൈദ്യുതി, ഡിജിറ്റൽ കണക്റ്റിവിറ്റി എന്നിവ ദൈനംദിന ജീവിതത്തെയും സാമ്പത്തിക ഉത്പാദനക്ഷമതയെയും മെച്ചപ്പെടുത്തുന്നു.

 വില സ്ഥിരത: കുറഞ്ഞ പണപ്പെരുപ്പ നിരക്ക് അവശ്യവസ്തുക്കളെ താങ്ങാനാവുന്ന വിലയിൽ നിലനിറുത്തുന്നു. ഇത് കുടുംബ ബഡ്ജറ്റിനെ സംരക്ഷിക്കുന്നു.

ശേഷിക്കുന്ന

വെല്ലുവിളി

ശക്തമായ 8.2 ശതമാനം വളർച്ചാ പാദം ശ്രദ്ധേയമാണെങ്കിലും, അത് വലിയ സാമ്പത്തിക പ്രഹേളികയുടെ ഒരു ഭാഗം മാത്രമാണെന്ന് തിരിച്ചറിയേണ്ടതുണ്ട്. കാരണം,​ വെല്ലുവിളികൾ അവശേഷിക്കുന്നുണ്ട്. പണപ്പെരുപ്പ നിയന്ത്രണം, യുവജനങ്ങൾക്കുള്ള തൊഴിൽ, സുസ്ഥിര കാർഷിക വളർച്ച, ആഗോള അനിശ്ചിതത്വങ്ങൾ എന്നിവ ഈ വെല്ലുവിളികളിൽ ഉൾപ്പെടുന്നു. അതേസമയം,​ സർക്കാരിന്റെ തുടർച്ചയായ സാമ്പത്തിക- നികുതി പരിഷ്കാരങ്ങളും,​നമ്മുടെ സമ്പദ്‌വ്യവസ്ഥയിൽ അന്തർലീനമായ ചലനാത്മകതയും ശുഭാപ്തിവിശ്വാസത്തിന് കാരണമാവുകയും ചെയ്യുന്നു.

ആഗോളതലത്തിൽ ഏറ്റവും വേഗത്തിൽ വളരുന്ന പ്രധാന സമ്പദ്‌വ്യവസ്ഥകളിൽ ഒന്നായി ഇന്ത്യ ഉയർന്നുവന്നിരിക്കുന്നു. അന്താരാഷ്ട്ര നിക്ഷേപകരിൽ നിന്ന് ഇത് വ്യാപകമായ ആത്മവിശ്വാസം വളർത്തുന്നു. നവീകരണം, അടിസ്ഥാന സൗകര്യങ്ങൾ, സാമ്പത്തിക ഉൾപ്പെടുത്തൽ, കയറ്റുമതി വൈവിദ്ധ്യവത്കരണം എന്നിവയ്ക്ക് തുടർച്ചയായ ഊന്നൽ നൽകുന്നതിനാൽ ഈ കുതിപ്പ് മന്ദിഭവിക്കുമെന്ന ഭീതിക്ക് തീരെ സാദ്ധ്യതയില്ലാതായിരിക്കുന്നു.