കിലോയ്ക്ക് 1,500 രൂപ മുതൽ; കേരളത്തിൽ സുലഭമായി വളരുന്ന ഈ മരത്തിൽ നിന്ന് ലക്ഷങ്ങൾ സമ്പാദിക്കാം

കേരളത്തിൽ പൊതുവെ കാണുന്ന ഒന്നാണ് കറുവ. പലരും ഇത് വീട്ടിൽ വളർത്താരുണ്ടെങ്കിലും ഇതിന്റെ മാർക്കറ്റ് ഡിമാൻഡ് മിക്കവർക്കും അറിയില്ല. ഏക്കറിൽ ഏകദേശം 440 മരങ്ങൾ (3x3 മീറ്റർ അകലത്തിൽ) വളർത്തിയാൽ മൂന്നാം വർഷം മുതൽ ഒരേക്കറിൽ നിന്ന് 50 കിലോ മുതൽ 100 കിലോ വരെ പട്ട ലഭിക്കും.

കിലോയ്ക്ക് ശരാശരി 1,500 രൂപ നിരക്കിൽ 75,000 രൂപ മുതൽ 1,50,000 രൂപ വരെ പ്രതീക്ഷിക്കാം. ഒരിക്കൽ പട്ട വെട്ടിയെടുത്താൽ അതേ മരങ്ങൾ വീണ്ടും വളർന്ന് മൂന്ന്, നാല് വർഷത്തിന് ശേഷം വിളവെടുപ്പിന് പാകമാകും. നിത്യശ്രീ, നവശ്രീ എന്നീ രണ്ടിനം കറുവ ഭാരതീയ സുഗന്ധവിള ഗവേഷണകേന്ദ്രം പുറത്തിറക്കിയിട്ടുണ്ട്. പട്ടയ്ക്ക് മാത്രമല്ല കറുവയുടെ കായയ്ക്കും വിപണിമൂല്യമുണ്ട്. കായയ്ക്ക് കിലോ 1,600 രൂപ വരെ വിലയുണ്ട്. സിനമൺ എന്നറിയപ്പെടുന്ന കറുവപ്പട്ട ശ്രീലങ്കയിലാണ് വ്യാപകമായി കൃഷി ചെയ്യുന്നത്. കേരളത്തിൽ പലയിടത്തും ഈ ചെടി നന്നായി വളരും.

കറികൾക്ക് സ്വാദും മണവും കൂട്ടാനായി ഉപയോഗിക്കുന്ന മസാലക്കൂട്ടുകളിലെ ചേരുവകളിൽ ഒഴിച്ചുകൂടാനാകാത്ത ഒന്നാണ് കറുവപ്പട്ട. ഇതിന്റെ ഉൽപാദനം വിപണിയിൽ കുറവായതിനാൽ അപരനായ 'കാസിയ' ആണ് കൂടുതലും ലഭിക്കുന്നത്. വിദേശരാജ്യങ്ങളിൽ നിന്ന് കുറഞ്ഞ വിലയിൽ ഇറക്കുമതി ചെയ്യുന്ന കാസിയ അധികമായാൽ ആരോഗ്യപ്രശ്നങ്ങളുണ്ടാക്കുമെന്നാണ് കണ്ടെത്തൽ. വ്യാപാരികൾക്ക് വലിയ ലാഭം ലഭിക്കുമെന്നതിനാൽ കറുവപ്പട്ടയോട് സാമ്യമുള്ള കാസിയ സാധാരണക്കാർക്ക് തിരിച്ചറിയാൻ കഴിയാതെ പോകും.