ആത്മീയ ചികിത്സയുടെ മറവിൽ കോടികളുടെ തട്ടിപ്പ്: 3 പേർ അറസ്റ്റിൽ

കുറ്റ്യാടി: ആത്മീയ ചികിത്സയുടെ മറവിൽ രണ്ടുകോടിയോളം തട്ടിയെടുത്ത മൂന്നുപേർ അറസ്റ്റിൽ. മലപ്പുറം കോട്ടക്കലിൽ കോഡൂർ ഒറ്റത്തറ പി.സി.എച്ച്. ശംസുദ്ദീൻ (43),പുലാമന്തോൾ വളപുരം മന്നേങ്കൽ കണ്ണന്തൊടി എം.കെ. മുഹമ്മദ് ബഷീർ (39),വളയം പടിഞ്ഞാറയിൽ റഫീഖ് (49) എന്നിവരാണ് തൊട്ടിൽപാലം പൊലീസിന്റെ പിടിയിലായത്. തളീക്കര മണിയലംകണ്ടി മുഹമ്മദ് ആദിലിന്റെ പരാതിയിലാണിത്.

വ്യാജചികിത്സ,ആത്മീയചൂഷണത്തിന്റെ മറവിലുള്ള സാമ്പത്തികത്തട്ടിപ്പ് എന്നിവ സംബന്ധിച്ച് ആദിൽ മുഖ്യമന്ത്രിക്ക് നൽകിയ പരാതിയെ തുടർന്നാണ് പൊലീസ് കേസെടുത്തത്. ബന്ധുവിന്റെ ചികിത്സയുമായി ബന്ധപ്പെട്ടാണ് ആദിൽ പ്രതികളെ സമീപിക്കുന്നത്. ശംസുദ്ദീൻ,ഉസ്താദും ശൈഖുമാണെന്ന് പറഞ്ഞ് പരിചയപ്പെടുത്തിയും മാരകരോഗങ്ങൾ സുഖപ്പെടുത്തിയിട്ടുണ്ടെന്ന് വിശ്വസിപ്പിച്ചുമാണ് പണം കൈക്കലാക്കിയെന്ന് പരാതിയിൽ പറയുന്നത്. രണ്ടു കോടി വാങ്ങിയതിൽ 26 ലക്ഷമാണ് തിരിച്ചുകിട്ടിയതെന്ന് ആദിൽ പറയുന്നു. കൂടാതെ പ്രതികൾ ആദിലിനെ ഭീഷണിപ്പെടുത്തിയെന്നും പരാതിയിലുണ്ട്. പ്രതികൾ നേരത്തേ കോഴിക്കോട് സെഷൻസ് കോടതിയിൽ മുൻകൂർ ജാമ്യാപേക്ഷ നൽകിയതിനാൽ ഉപാധികളോടെ ജാമ്യം ലഭിച്ചു. ഇതിനെതിരെ ഹൈക്കോടതിയെ സമീപിക്കുമെന്ന് ആദിൽ പറഞ്ഞു.