സർക്കാർ അദ്ധ്യാപക നിയമനത്തിന് വഴി

സർക്കാർ സർവീസിലെ തസ്തികകളിലേക്ക് പി.എസ്.സി റാങ്ക് ലിസ്റ്റ് നിലവിലുള്ളപ്പോൾത്തന്നെ താത്കാലിക നിയമനം വഴി മുട്ടുശാന്തി 'ഏർപ്പാട്" നടത്തുന്നത് പുതുമയുള്ളതല്ലെന്നു മാത്രമല്ല,​ ഏറക്കുറെ എല്ലാ വകുപ്പുകളിലും ഈ കുറുക്കുവഴി തന്നെയാണ് നടക്കുന്നതെന്ന ആക്ഷേപം എക്കാലത്തുമുള്ളതാണ്. ഇത്തരം പരാതികൾക്കിടയിലാണ് സർക്കാർ കോളേജുകളിലെ അസിസ്റ്റന്റ് പ്രൊഫസർ തസ്തികയിൽ തൊണ്ണൂറ് ഒഴിവുകൾ പി.എസ്.സിക്ക് റിപ്പോർട്ട് ചെയ്യാനും,​ ആർട്സ് ആൻഡ് സയൻസ് കോളേജുകളിൽ 48 പുതിയ തസ്തികകൾ സൃഷ്ടിക്കാനുമുള്ള സർക്കാർ തീരുമാനം. മികച്ച ശമ്പള സ്കെയിലും ആനുകൂല്യങ്ങളുമുള്ള കോളേജ് അദ്ധ്യാപക ജോലിയിൽ നയാപൈസ ഡൊണേഷൻ ഇല്ലാതെ കയറിപ്പറ്റുകയെന്ന സ്വപ്നം മനസിൽ താലോലിക്കുന്ന ഉന്നത അദ്ധ്യാപന ബിരുദധാരികളും,​ പി.എസ്.സി പട്ടികയിൽ ഉൾപ്പെട്ടവരുമായ ഉദ്യോഗാർത്ഥികൾക്ക് ലോട്ടറി പോലെയാണ് ഈ സർക്കാർ തീരുമാനമെന്നുതന്നെ പറയണം. എയ്ഡഡ് കോളേജുകളിൽ ഒരു അദ്ധ്യാപക നിയമനത്തിന് ഒരുകോടി രൂപയ്ക്കു മേൽ 'സംഭാവനാമൂല്യം" ഉണ്ടെന്നിരിക്കെ,​ അതൊന്നും സ്വപ്നം കാണാൻ പോലുമാകാതെ പി.എസ്.സി നിയമനം കാത്തിരിക്കുന്നവർക്ക് വലിയ പ്രതീക്ഷ നല്കുന്നതാണ് സർക്കാർ തീരുമാനം.

സർക്കാർ കോളേജുകളിലെ അസി. പ്രൊഫസർ നിയമനത്തിന് വിവിധ വിഷയങ്ങളുടെ റാങ്ക് ലിസ്റ്റ് കാലാവധി ഈ ഫെബ്രുവരിക്കുള്ളിൽ തീരാനിരിക്കെ നിയമന നടപടിയില്ലാത്തത് ചൂണ്ടിക്കാട്ടി,​ ഞങ്ങളുടെ ലേഖകൻ സുജിലാൽ കെ.എസ്,​ 'നിയമനങ്ങൾ വഴിയാധാരം" എന്ന ശീർഷകത്തിൽ തയ്യാറാക്കിയ റിപ്പോർട്ട് ഇക്കഴിഞ്ഞ അഞ്ചിന് 'കേരളകൗമുദി" പ്രാധാന്യത്തോടെ പ്രസിദ്ധീകരിച്ചിരുന്നു. പല വിഷയങ്ങളിലും ഒഴിവുകളില്ലെന്ന് കോളേജ് വിദ്യാഭ്യാസ വകുപ്പ് ചൂണ്ടിക്കാട്ടുന്ന ന്യായത്തിന്റെ പൊള്ളത്തരം കൂടി വ്യക്തമാക്കിയ ആ റിപ്പോർട്ടിന്റെ പശ്ചാത്തലത്തിലാണ് 90 ഒഴിവുകൾ പി.എസ്.സിക്ക് റിപ്പോർട്ട് ചെയ്യാൻ സർക്കാർ തീരുമാനിച്ചത്. റാങ്ക് പട്ടികയിൽ നിന്ന് ഇതുവരെ ഒരാളെപ്പോലും നിയമിച്ചിട്ടില്ലാത്ത ഇസ്ളാമിക് ഹിസ്റ്ററി,​ ഉറുദു വിഷയങ്ങളിൽ ഒഴിവില്ലെന്ന് അധികൃതർ വാദിക്കുമ്പോൾ,​ 39 ഒഴിവുകളുണ്ടെന്ന് വിവരാവകാശ നിയമപ്രകാരം ഒരു ഉദ്യോഗാർത്ഥി കണ്ടെത്തിയ കാര്യവും ആ റിപ്പോർട്ടിൽ ചൂണ്ടിക്കാട്ടിയിരുന്നു. അസി. പ്രൊഫസർമാരുടെ അധിക തസ്തിക പുനർവിന്യസിച്ചതിനു ശേഷം ബാക്കിവരുന്ന 90 ഒഴിവുകൾ റിപ്പോർട്ട് ചെയ്യാനാണ് ഇപ്പോഴത്തെ തീരുമാനം.

വിവിധ വിഷയങ്ങളിലേക്കുള്ള അദ്ധ്യാപകരുടെ റാങ്ക് പട്ടികയിൽ ഏറ്റവുമാദ്യം കാലാവധി പൂർത്തിയാകുന്നത് ഇക്കണോമിക്സിനാണ്. ഈ പട്ടികയുടെ കാലാവധി ഈ 27-ന് തീരും. അതല്ലെങ്കിൽ സർക്കാർ ഇടപെട്ട് ഇനി പട്ടികയുടെ കാലാവധി നീട്ടേണ്ടിവരും. കാലാവധി ഉടനെ തീരുന്ന വിഷയങ്ങളിലെ റാങ്ക് പട്ടികയിൽ നിന്ന് നിയമനത്തിനുള്ള നടപടിക്രമങ്ങൾ വേഗത്തിലായാൽ നിരവധി ഉദ്യോഗാർത്ഥികൾക്കാണ് അതിന്റെ പ്രയോജനം ലഭിക്കുക. എം.ഫിൽ കോഴ്സ് നിറുത്തലാക്കുകയും,​ പി.ജി കോഴ്സുകൾക്ക് നല്കിയിരുന്ന അധിക വെയിറ്രേജ് ഒഴിവാക്കുകയും ചെയ്തതു കാരണം ആർട്സ് ആൻഡ് സയൻസ് കോളേജുകളിൽ പല വിഷയങ്ങളിലും അദ്ധ്യാപർക്ക് വർക്ക് ലോഡ് കുറഞ്ഞിരുന്നു. ഇങ്ങനെ,​ വർക്ക് ലോഡ് ഇല്ലാത്ത 361 അധിക തസ്തികകൾ ഉണ്ടെന്നായിരുന്നു വകുപ്പിന്റെ കണ്ടെത്തൽ. പതിനെട്ട് വിഷയങ്ങളിലായി ഇതിൽ ഉൾപ്പെട്ട 151 അദ്ധ്യാപകരെ മറ്റു കോളേജുകളിലേക്ക് പുനർവിന്യസിക്കാനാണ് തീരുമാനം.

ഈ പുനർവിന്യാസത്തിനു ശേഷമുള്ള ഒഴിവുകളാണ് പി.എസ്.സിക്ക് റിപ്പോർട്ട് ചെയ്യുക. ഇതിനു പുറമേ,​ 2020- 21ൽ അനുവദിച്ച പുതിയ കോഴ്സുകൾക്കു വേണ്ടിയാണ് പുതുതായി സൃഷ്ടിച്ച 48 തസ്തികകൾ. പുതുതായി സൃഷ്ടിച്ച തസ്തികകളിൽ ഇംഗ്ളീഷ്,​ ജ്യോഗ്രഫി,​ ഫിസിക്കൽ എഡ്യുക്കേഷൻ എന്നിവയിലാണ് 10 തസ്തിക വീതമുള്ളത്. സൈക്കോളജി,​ കംപ്യൂട്ടർ സയൻസ്,​ പൊളിറ്റിക്കൽ സയൻസ്,​ ഇലക്ട്രോണിക്സ്,​ ബി.ബി.എ എന്നിവയിൽ മൂന്ന് തസ്തിക വീതമുണ്ട്. എന്തായാലും,​ നിയമനം നടത്താൻ നിശ്ചയിച്ചവയും,​ പുതുതായി സൃഷ്ടിച്ച തസ്തികയിലും ഉൾപ്പെടെ ആകെ 138 കോളേജ് അദ്ധ്യാപക തസ്തികകളിലേക്കാണ് ഇപ്പോൾ നിയമനത്തിന് വഴി തുറന്നിരിക്കുന്നത്. ഇനി വേണ്ടത്,​ ഒഴിവുകൾ പി.എസ്.സിക്ക് റിപ്പോർട്ട് ചെയ്യാനെടുത്ത തീരുമാനം ഏറ്റവും അടിയന്തര സ്വഭാവത്തോടെ നടപ്പാക്കുകയും,​ അർഹരായ ഉദ്യോഗാർത്ഥികൾക്ക് അഡ്വൈസ് മെമ്മോ അയയ്ക്കുന്നതിൽ പി.എസ്.സി അമാന്തം കാണിക്കാതിരിക്കുകയും ചെയ്യുക എന്നതാണ്. ഇക്കാലത്ത് സർക്കാർ മേഖലയിൽ മാന്യമായ ഉദ്യോഗമെന്നത് ഭാഗ്യക്കുറിക്കു സമംതന്നെയാണ്. ഇനി,​ മോഹിപ്പിച്ചിട്ട് അലംഭാവംകൊണ്ട് നിരാശരാക്കാതിരുന്നാൽ മതി.