ഹാഷിഷ് ഓയിലുമായി യുവാവ് പിടിയിൽ

കൊല്ലം: നിരവധി കേസുകളിൽ പ്രതിയായ യുവാവ് 208 ഗ്രാം ഹാഷിഷ് ഓയിലുമായി എക്സൈസിന്റെ പിടിയിലായി. പത്തനംതിട്ട ഏനാദിമംഗലം കുന്നിടമുറി ഉഷഭവനത്തിൽ ഉമേഷ്‌ കൃഷ്ണയാണ് (38) പിടിയിലായത്. ഇയാൾക്കൊപ്പമുണ്ടായിരുന്ന അടൂർ ഏഴംകുളം പാറവിള വീട്ടിൽ വിനീത് ഓടി രക്ഷപ്പെട്ടു. തേവലക്കരയി​ൽ വച്ചാണ് ഉമേഷ് കൃഷ്ണയെ പിടികൂടിയത്. ഓപ്പറേഷൻ റെഡ് സോണിന്റെ ഭാഗമായി പത്തനാപുരം എക്സൈസ് റേഞ്ച് ടീമും കൊല്ലം എക്സൈസ് ഇന്റലിജൻസ് വിഭാഗവും സംയുക്തമായാണ് പരിശോധന നടത്തിയത്. പത്തനാപുരം എക്‌സൈസ് ഇൻസ്‌പെക്ടർ എസ്. ഷിജിന, അസിസ്റ്റന്റ് എക്സൈസ് ഇൻസ്പെക്ടർമാരായ വി​. സുനിൽ കുമാർ, വൈ. അനിൽ, സന്തോഷ് വർഗീസ്, സിവിൽ എക്സൈസ് ഓഫീസർമാരായ ഗോപൻ മുരളി, സി​.എം. റോബി, അരുൺ ബാബു, കിരൺകുമാർ, വിനീഷ് വിശ്വനാഥ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.