അനീഷ് ബാബുവിന് ഇ.ഡി കേസിൽ ജാമ്യമില്ല

കൊച്ചി: കള്ളപ്പണക്കേസിൽ ഇ.ഡി അറസ്റ്റ് ചെയ്ത കശുഅണ്ടി വ്യവസായി കൊല്ലം സ്വദേശി അനീഷ് ബാബുവിന്റെ ജാമ്യഹർജി ഹൈക്കോടതി തള്ളി. അന്വേഷണം നിർണായക ഘട്ടത്തിലാണെന്നും തെളിവ് ശേഖരിക്കുന്നതിനടക്കം സമയം അനുവദിക്കേണ്ടതുണ്ടെന്നും വ്യക്തമാക്കിയാണ് ജസ്റ്റിസ് കൗസർ എടപ്പഗത്തിന്റെ നടപടി.

ടാൻസാനിയയിൽ നിന്ന് കുറഞ്ഞ വിലയ്ക്ക് കശുഅണ്ടി ഇറക്കുമതി ചെയ്ത് നൽകാമെന്ന് വാഗ്ദാനം ചെയ്ത് 25 കോടിയിലധികം രൂപയുടെ തട്ടിപ്പ് നടത്തിയെന്നും ഇതിലൂടെ ലഭിച്ച പണം കള്ളപ്പണം തടയൽ നിയമത്തിന്റെ പരിധിയിൽ വരുന്ന കുറ്റകൃത്യങ്ങൾക്കായി ഉപയോഗിച്ചെന്നുമാണ് ഇ.ഡി കേസ്.