മരം വീണ് വിദ്യാർത്ഥിനി മരിച്ച സംഭവം: പ്രിൻസിപ്പലിനെ സ്ഥലംമാറ്റി

തിരുവനന്തപുരം: സ്‌കൂളിനകത്ത് മരം വീണ് ആറാം ക്ളാസ് വിദ്യാർത്ഥിനി മരിച്ച സംഭവത്തിൽ സ്‌കൂൾ പ്രിൻസിപ്പലിനെയും പ്രഥമാദ്ധ്യാപികയെയും സ്ഥലം മാറ്റി പൊതുവിദ്യാഭ്യാസ വകുപ്പ്. പ്രിൻസിപ്പലിന്റെ പൂർണ അധിക ചുമതല വഹിക്കുന്ന മഞ്ജു വി.ഇയെ വയനാട് അച്ചൂർ ഗവൺമെന്റ് ഹയർ സെക്കൻഡറി സ്‌കൂളിലേക്കും,പ്രഥമാദ്ധ്യാപികയായ ഷീബ ബിയെ ജി.എച്ച്.എസ്.എസ് ബന്തഡുക്കയിലേക്കുമാണ് സ്ഥലം മാറ്റിയത്. ഇക്കഴിഞ്ഞ ജൂലായ് 3നാണ് കാസർഗോട് അംഗടി മുഗർ ഗവൺമെന്റ് എച്ച്.എസ്.എസിൽ അപകടകരമായി നിന്നിരുന്ന മരം മറിഞ്ഞുവീണ് ആറാംക്ളാസുകാരി ആയിഷത്ത് മിൻഹ മരിച്ചത്. സംഭവത്തിൽ സ്‌കൂൾ പ്രിൻസിപ്പലിന്റെയും പ്രഥമാദ്ധ്യാപികയുടെയും ഭാഗത്തുനിന്ന് വീഴ്ച ഉണ്ടായെന്ന് കണ്ടെത്തിയതോടെയാണ് പൊതു വിദ്യാഭ്യാസ ഡയറക്ടർ സ്ഥലംമാറ്റ ഉത്തരവ് നൽകിയിരിക്കുന്നത്.