കരുവന്നൂർ: പൊലീസ് നീക്കം അവഗണിക്കാൻ ഇ.ഡി

കൊച്ചി: കരുവന്നൂർ തട്ടിപ്പുകേസിൽ സാക്ഷിയായ സി.പി.എം നേതാവ് പി.ആർ. അരവിന്ദാക്ഷന്റെ പരാതിയിൽ പൊലീസ് ഇടപെടൽ അവഗണിച്ച് ഊർജ്ജിത അന്വേഷണവുമായി മുന്നോട്ടുപോകാൻ ഇ.ഡി നീക്കം. ഇത്തരം സമ്മർദ്ദങ്ങൾക്ക് വഴങ്ങേണ്ടെന്ന് ഡൽഹി ആസ്ഥാനത്തുനിന്ന് കൊച്ചി യൂണിറ്റിന് നിർദ്ദേശം കിട്ടിയതായി സൂചനയുണ്ട്.

ചോദ്യം ചെയ്യലിനിടെ ഇ.ഡി ഉദ്യോഗസ്ഥർ മർദ്ദിച്ചെന്ന് അരവിന്ദാക്ഷൻ പരാതി നൽകിയതിനെത്തുടർന്ന് പൊലീസ് കഴിഞ്ഞ ദിവസം കൊച്ചിയിലെ ഇ.ഡി ഓഫീസിലെത്തി വിവരങ്ങൾ ശേഖരിച്ചിരുന്നു. നിയമക്കുരുക്കിലാക്കി കരുവന്നൂർ അന്വേഷണത്തെ വഴിമുട്ടിക്കാനുള്ള നീക്കത്തിന്റെ ഭാഗമായാണ് പൊലീസ് നടപടിയെന്നാണ് ഇ.ഡി സംശയിക്കുന്നത്. ചില സി.പി.എം ഉന്നതരിലേക്ക് അന്വേഷണം നീണ്ടതിനെത്തുടർന്നാണ് പൊലീസ് ഇടപെടലെന്നും ആരോപണമുയർന്നിരുന്നു. എന്നാൽ അന്വേഷണത്തിൽ വിട്ടുവീഴ്ചയില്ലാതെ മുന്നോട്ടുപോകാനാണ് ഇ.ഡി തീരുമാനം.

കരുവന്നൂർ തട്ടിപ്പുമായി ബന്ധപ്പെട്ട ചോദ്യം ചെയ്യലിനിടെ ഇ.പി ജയരാജൻ, എ.സി. മൊയ്തീൻ തുടങ്ങിയവരുടെ പേരുകൾ പറയാൻ നിർബന്ധിച്ച ഇ.ഡി ഉദ്യോഗസ്ഥർ മർദ്ദിച്ചെന്നാണ് അരവിന്ദാക്ഷന്റെ പരാതി. കേസി​ൽ അരവി​ന്ദാക്ഷൻ സാക്ഷി​ മാത്രമായതി​നാൽ അന്വേഷണ നടപടി​ സാദ്ധ്യമാണെന്നാണ് പൊലീസി​ന്റെ വി​ലയി​രുത്തൽ. പ്രാഥമി​കാന്വേഷണം നടത്തി​ എഫ്.ഐ.ആർ രജി​സ്റ്റർ ചെയ്യാനാണ് നീക്കം. ഇതി​നായി​ വീണ്ടും നി​യമോപദേശം തേടി​.

അതേസമയം, പൊലീസ് കേസെടുത്താൽ ഇ.ഡി​ ഹൈക്കോടതി​യെ സമീപി​

ച്ചേക്കും. എറണാകുളം മുല്ലശേരി​ കനാൽ റോഡി​ലെ ഇ.ഡി​ ഓഫീസ് 24 ക്യാമറകളുടെ നി​രീക്ഷണത്തി​ലാണെന്നും മർദ്ദിച്ചുവെന്ന അരവി​ന്ദാക്ഷന്റെ പരാതി​ അടി​സ്ഥാനരഹി​തമാണെന്നുമാണ് ഇ.ഡി​ നിലപാട്. ചോദ്യം ചെയ്യൽ വീഡി​യോയി​ൽ പകർത്തിയിട്ടുമുണ്ട്.

കൊമ്പുകോർക്കൽ

സ്വർണക്കടത്തിന് സമാനം

സ്വർണക്കടത്തുകേസിന് സമാനമായി കരുവന്നൂർ കേസിലും പൊലീസും ഇ.ഡിയും കൊമ്പുകോർക്കുന്ന കാഴ്ചയാണിപ്പോൾ. കേരളവും കേന്ദ്രവുമായുള്ള ഏറ്റുമുട്ടലിനും ഇത് വഴിയൊരുക്കിയേക്കും. സ്വർണക്കടത്തു കേസിൽ അന്വേഷണ ഉദ്യോഗസ്ഥനായ ഇ.ഡി ഡെപ്യൂട്ടി ഡയറക്ടർക്കെതിരെയുള്ള പരാതിയിൽ ക്രൈംബ്രാഞ്ച് കേസെടുത്തിരുന്നു. എന്നാൽ ഇ.ഡി ഹൈക്കോടതിയെ സമീപിച്ചതോടെ അന്വേഷണം തടഞ്ഞു. ക്രൈംബ്രാഞ്ച് ശേഖരി​ച്ച തെളി​വുകൾ പ്രി​ൻസി​പ്പൽ സെഷൻസ് കോടതി​ക്ക് കൈമാറാനും നിർദ്ദേശിച്ചിരുന്നു.