ഇരിങ്ങാലക്കുട: കരുവന്നൂർ സർവീസ് സഹകരണ ബാങ്കിന്റെ പുനരുദ്ധാരണ പാക്കേജിന്റെ ഭാഗമായി സേവിംഗ്‌സ് ബാങ്ക് നിക്ഷേപം തിരിച്ചു നൽകുന്നത് ആരംഭിച്ചു. സേവിംഗ്‌സ് ബാങ്ക് അക്കൗണ്ടിൽ നിക്ഷേപമുള്ളവർക്ക് അമ്പതിനായിരം രൂപ വരെ പിൻവലിക്കാനാണ് അവസരം. ഇന്നലെ 389 നിക്ഷേപകർ 1.4 കോടിയാണ് പിൻവലിച്ചത്. പ്രധാനശാഖയിലും മാപ്രാണം, പൊറത്തിശ്ശേരി എന്നീ ശാഖകളിലും കൂടുതൽ തിരക്ക് അനുഭവപ്പെട്ടതിനെ തുടർന്ന് കൂടുതൽ പേർക്ക് ഇന്നത്തേയ്ക്ക് ടോക്കൺ നൽകി.

നവംബർ ഒന്ന് മുതൽ ആരംഭിച്ച ലക്ഷം രൂപയിൽ കുറവ് സ്ഥിരനിക്ഷേപമുള്ളവരുടെ നിക്ഷേപം പൂർണമായി തിരിച്ചു നൽകുന്നത് തുടരുകയാണ്. ഇതുവരെയായി 1156 പേർക്ക് 4.63 കോടി തിരിച്ചു നൽകി. ഈ കാലയളവിൽ 1106 പേർ 5.93 കോടിയുടെ സ്ഥിര നിക്ഷേപം കാലാവധി നീട്ടി പുതുക്കുകയും 45 പേർ 4.39 ലക്ഷം രൂപ പുതുതായി സ്ഥിര നിക്ഷേപം നടത്തുകയും ചെയ്തു. നവംബർ 2, 3 തിയതികളിൽ നടന്ന അദാലത്തിൽ 295 പേർ ഹാജരാകുകയും ഇവരിൽ 78 പേർ 51.97 ലക്ഷം രൂപ കുടിശ്ശിക ഇനത്തിൽ അടയ്ക്കുകയും ചെയ്തു.

പുതുതായി അനുമതി കിട്ടിയ ഒറ്റത്തവണ തീർപ്പാക്കൽ പദ്ധതിയിൽ ഇതുവരെ 3.42 കോടി കുടിശ്ശിക വായ്പ തിരിച്ചടച്ചു. പാക്കേജിന്റെ ഭാഗമായി കരുവന്നൂർ സർവീസ് സഹകരണ ബാങ്കിന്റെ ചീഫ് എക്‌സിക്യുട്ടീവ് ഓഫീസറായി കേരള ബാങ്കിൽ നിന്നുള്ള അസി.ജനറൽ മാനേജർ കെ.ആർ.രാജേഷ് ചുമതല ഏറ്റെടുത്തു.