ജീത്തു ജോസഫിന്റെ ചിത്രത്തിൽ മഞ്ജു വാര്യർ,​ നിർമ്മാണം മാജിക് ഫ്രെയിംസ്

ജീത്തു ജോസഫ് സംവിധാനം ചെയ്യുന്ന ചിത്രത്തിൽ മഞ്ജു വാര്യർ നായികയായി എത്തുന്നു. ഇതാദ്യമായാണ് മഞ്ജു വാര്യരും ജീത്തു ജോസഫും ഒരുമിക്കുന്നത്. ഇൗവർഷം അവസാനം ചിത്രീരണം ആരംഭിക്കും. മാജിക് ഫ്രെയിംസിന്റെ ബാനറിൽ ലിസ്തിൻ സ്റ്റീഫൻ ആണ് നിർമ്മാണം. മാജിക് ഫ്രെയിംസുമായി ജീത്തു ജോസഫ് കൈകോർക്കുന്നതും ആദ്യമാണ്. മോഹൻലാൽ പൃഥ്വിരാജ് ചിത്രം എമ്പുരാനിൽ അഭിനയിച്ചു വരികയാണ് മഞ്ജു വാര്യർ. ലൂസിഫറിന്റെ തുടർച്ചയായ എമ്പുരാനിൽ പ്രിയദർശിനി രാംദാസ് കൂടുതൽ ശക്തയാണ്. തമിഴിൽ രജനികാന്തിന്റെ വേട്ടയ്യൻ, വിജയ് സേതുപതി, സുരി ചിത്രം വിടുതലൈ 2 ആര്യ, ഗൗതം കാർത്തിക് എന്നിവരോടൊപ്പം മിസ്റ്റർ എക്സ് എന്നിവയാണ് മഞ്ജുവിന്റെ അന്യഭാഷാ ചിത്രങ്ങൾ. ചിത്രസംയോജകൻ സൈജു ശ്രീധരൻ ആദ്യമായി സംവിധാനം ചെയ്ത ഫൂട്ടേജ് ആണ് ചിത്രീകരണം പൂർത്തിയായ മഞ്ജുവാര്യർ ചിത്രം.

ഫൗണ്ട് ഫൂട്ടേജ് എന്ന മേക്കിംഗ് രീതിയിൽ മലയാളത്തിൽ ഒരുങ്ങുന്ന രണ്ടാമത്തെ ചിത്രമാണ് ഫൂട്ടേജ്. ഒ.ടി ടി റിലീസ് ആലോചിക്കുന്നുണ്ട്. എന്നാൽ ഇക്കാര്യത്തിൽ അന്തിമ തീരുമാനമായിട്ടില്ല. വിശാഖ് നായർ, ഗായത്രി അശോക്, നഞ്ചിയമ്മ തുടങ്ങിയവരാണ് മറ്റു താരങ്ങൾ. സുഷിൻ ശ്യാം ആണ് സംഗീതവും പശ്ചാത്തല സംഗീതവും.