കിണറ്റിൽ വീണ ആനക്കുട്ടി​യെ അമ്മയാന രക്ഷി​ച്ചു

കാലടി: മലയാറ്റൂർ ഇല്ലിത്തോട്ടിൽ കിണറ്റിൽ വീണ കുട്ടിയാനയെ ആനക്കൂട്ടം തന്നെ രക്ഷി​ച്ചു. പണ്ടാല വീട്ടിൽ സാജുവിന്റെ വീടി​ന് സമീപത്തെ ഉപയോഗശൂന്യമായ കിണറ്റിലാണ് ഇന്നലെ പുലർച്ചെ മൂന്നിന് കുട്ടിയാന വീണത്. കരയ്ക്കു കയറ്റാൻ പുലരും വരെ അമ്മയാനയും കൂട്ടാനകളും ശ്രമിച്ചെങ്കിലും വിജയിച്ചില്ല. ചി​ന്നംവി​ളി​ കേട്ടാണ് സമീപവാസി​കൾ സംഭവം അറി​ഞ്ഞത്. രാവിലെ വനപാലകരും നാട്ടുകാരും ചേർന്ന് കിണറിന്റെ വശം ഇടിക്കാൻ ശ്രമി​ച്ചെങ്കി​ലും വി​ജയി​ച്ചി​ല്ല. എട്ടു മണിയോടെ അമ്മയാനയുടെ സഹായത്തോടെ കുട്ടിയാന കരയ്ക്കെത്തി. തുടർന്ന് അമ്മയ്‌ക്കൊപ്പം കാട്ടിലേക്ക് കയറി.

അതേസമയം,​ കാട്ടാനശല്യം പരിഹരിക്കാത്തതിൽ പ്രതിഷേധിച്ച് പ്രദേശവാസികൾ മലയാറ്റൂർ - കോടനാട് റോഡ് ഉപരോധിച്ചു. വിവിധ വകുപ്പുകളെ സംയോജിപ്പിച്ച് പരിഹാരം കാണാമെന്ന് സബ് കളക്ടർ കെ.മീര ഉറപ്പുനൽകിയതോടെ ഉപരോധം അവസാനിപ്പിച്ചു.