4 വയസുകാരിയെ കൊലപ്പെടുത്താൻ ശ്രമിച്ച മാതാവിന്റെ സുഹൃത്ത് അറസ്റ്റിൽ

വെമ്പായം: നാലു വയസുകാരിയെ കൊലപ്പെടുത്താൻ ശ്രമിച്ച കേസിൽ മാതാവിന്റെ സുഹൃത്ത് അറസ്റ്റിൽ. കന്യാകുമാരി അരുമന കുരുർ ചാലക്കുടി വിളയിൽ വീട്ടിൽ വിൻസ് രാജിനെ (44)യാണ് വട്ടപ്പാറ പൊലീസ് അറസ്റ്റ് ചെയ്തത്. ഇയാൾ കഴിഞ്ഞ രണ്ടു വർഷമായി കുട്ടിയുടെ മാതാവുമായി ചീരാണിക്കരയിലാണ് താമസം. ഇക്കഴിഞ്ഞ ശനിയാഴ്ചയാണ് കേസിനാസ്പദമായ സംഭവം. മദ്യപിച്ചെത്തിയ പ്രതി കുട്ടിയെ ദേഹോപദ്രവം ഏൽപ്പിക്കുകയും കഴുത്തിന് കുത്തിപ്പിടിച്ച് കൊലപ്പെടുത്താൻ ശ്രമിക്കുകയുമായിരുന്നു. നിലവിളി കേട്ടെത്തിയ നാട്ടുകാർ പൊലീസിനെ വിവരമറിയിച്ചതിനെ തുടർന്ന് സി.ഐ ശ്രീജിത്ത്,എസ്.ഐ ബിനി മോൾ എന്നിവരുടെ നേതൃത്വത്തിലുള്ള സംഘമെത്തി പ്രതിയെ കസ്റ്റഡിയിലെടുത്തു. പ്രതിയെ കോടതി റിമാൻഡ് ചെയ്തു. പെൺകുട്ടിയെ ചൈൽഡ് വെൽഫെയർ കമ്മിഷൻ മുൻപാകെ ഹാജരാക്കി.