ബംഗളൂരുവിൽ മലയാളി വിദ്യാർത്ഥിനി ഹോസ്റ്റലിൽ മരിച്ചനിലയിൽ

ബംഗളൂരു: നഴ്സിംഗ് വിദ്യാർത്ഥിനിയെ ഹോസ്റ്റൽ മുറിയിൽ മരിച്ചനിലയിൽ കണ്ടെത്തി. ഇടുക്കി കീരിത്തോട് കിഴക്കേപ്പാത്തിക്കൽ അനഘ ഹരിയെ (20) ആണ് ബംഗളൂരുവിലുള്ള ഹോസ്റ്റലിൽ തൂങ്ങി മരിച്ചനിലയിൽ കണ്ടെത്തിയത്. ഇവിടെയുള്ള സ്വകാര്യ നഴ്സിംഗ് കോളേജിൽ ബിഎസ്‌സി വിദ്യാർത്ഥിനിയായിരുന്നു.

താമസിച്ചിരുന്ന കോളേജ് ഹോസ്റ്റലിൽ വെള്ളിയാഴ്ച ഉച്ചകഴിഞ്ഞ് രണ്ടിന് ശേഷം തൂങ്ങിമരിച്ച നിലയിൽ കണ്ടെത്തിയെന്നാണ് ബന്ധുക്കളെ അധികൃതർ അറിയിച്ചത്. മൃതദേഹം ബംഗളൂരു വിക്‌ടോറിയ ഹോസ്പിറ്റലിലാണ്. വിവരമറിഞ്ഞ ബന്ധുക്കൾ അവിടേക്ക് തിരിച്ചിട്ടുണ്ട്. മാതാവ്: രാധ, സഹോദരൻ: അനന്തു, അതുൽ.