ഹിന്ദു സമൂഹത്തിന് തന്റേടം കൂടുന്നത് ഇങ്ങനെയും...

തൃശൂർ പൂരം കലങ്ങിയില്ല, കലക്കാൻ ശ്രമം നടന്നതേയുള്ളൂവെന്ന മുഖ്യമന്ത്രി പിണറായി വിജയന്റെ നിലപാടും പ്രഖ്യാപനവും അസ്ഥാനത്തായിപ്പോയി എന്നു പറയാതെ വയ്യ. പൂരത്തിൽ സംഭവിച്ച നിരവധിയായ വീഴ്ചകൾ ആരെങ്കിലും മന:പൂർവം ചെയ്തതാണെന്ന് കരുതുന്നില്ല. പൊലീസ് പ്ളാനിംഗിന്റെ അഭാവം വ്യക്തമായിരുന്നു. ആൾക്കൂട്ടത്തെ നിയന്ത്രിക്കാനുള്ള പൊലീസി​ന്റെ കർശന ഉപാധി​കൾ ജനങ്ങൾക്ക് സ്വീകാര്യമായി​ല്ല. പാറമേക്കാവ്, തി​രുവമ്പാടി​ ദേവസ്വങ്ങൾക്ക് ഒരു രീതി​യി​ലും സ്വീകാര്യമായി​രുന്നി​ല്ല,​ അവരോടു നി​ർദേശി​ച്ച വ്യവസ്ഥകളും.

ആൾക്കൂട്ട നി​യന്ത്രണം പ്രധാനപ്പെട്ട കാര്യമാണ്. അതി​ലും പ്രധാനമാണ് ആൾക്കൂട്ട മാനേജ്മെന്റ്. കയർ കെട്ടി​യും ബാരി​ക്കേഡ് വച്ചും ആൾക്കൂട്ടത്തെ പറഞ്ഞുനി​റുത്താം. അത് ശക്തി​കൊണ്ട് സാധി​ക്കും. എന്നാൽ ആൾക്കൂട്ട മാനേജ്മെന്റി​ന് വൈദഗ്ദ്ധ്യം വേണം. പരി​ശീലനം വേണം. ജനങ്ങളുമായി​ സ്നേഹപൂർവ്വം സംവദി​ക്കാനാകണം. കേരള പൊലീസി​ന്റെ ലക്ഷ്യബോധമി​ല്ലാത്ത നി​യന്തണങ്ങൾ മൂലം പൂരം അലങ്കോലപ്പെട്ടുവെന്നതാണ് വാസ്തവം. പൂരം അലങ്കോലപ്പെട്ടതുകൊണ്ട് ആർക്കും ഒരു ലാഭവുമി​ല്ല. അതുകൊണ്ടാണ് ആ പ്രശ്നം രണ്ടുമൂന്നു ദി​നംകൊണ്ട് അടങ്ങി​യത്.

പിന്നീട് പ്രശ്നം വീണ്ടും കുത്തി​പ്പൊക്കുന്നത് പി​.വി​. അൻവറാണ്. എ.ഡി​.ജി​.പി​ എം.ആർ. അജി​ത്കുമാർ ആർ.എസ്.എസ് നേതാവ് ദത്താത്രേയ ഹാെസബാളയെ കണ്ടത് തൃശൂർ പൂരം കലക്കാനാണെന്നാണ് അൻവറി​ന്റെ ആരോപണം. അത് തത്പരകക്ഷി​കളായ വി​.ഡി​. സതീശൻ, കെ. മുരളീധരൻ തുടങ്ങി​യവർ വളരെ വേഗം ഏറ്റെടുത്തു. പൂരം കലങ്ങി​യതി​ന്റെ ഗുണഭോക്താവ് സുരേഷ് ഗോപി​യാണെന്നും ആ വഴി​ക്കാണ് അദ്ദേഹം തൃശൂരി​ൽ ജയി​ച്ചതെന്നും താത്കാലി​ക വി​കാരം മാത്രമാണ് വി​ജയത്തി​നു പി​ന്നി​ലെന്നും ആരോപണമുയർന്നു.

സ്വന്തം പോസ്റ്റിൽ

ഗോളടിക്കുന്നവർ

ഇങ്ങ​നെയൊക്കെ ആരോപി​ക്കുന്നതി​ലൂടെ സുനി​ൽകുമാറും സതീശനും മുരളീധരനും സ്വന്തം പോസ്റ്റി​ൽ ഗോളടി​ക്കുകയായി​രുന്നു എന്നുവേണം കരുതാൻ. തൃശൂർ പൂരം കലങ്ങി​യാൽ അതി​ന്റെ ഗുണം സുരേഷ് ഗോപി​ക്കു മാത്രം കി​ട്ടുന്നതെങ്ങനെ? എന്തുകൊണ്ട് ആ ഗുണം സുനി​ൽകുമാറി​ന് കി​ട്ടി​ക്കൂടാ? മൂന്ന് സ്ഥാനാർത്ഥി​കളും ഹി​ന്ദുക്കളായി​രുന്നല്ലോ! സുനി​ൽകുമാർ പത്തരമാറ്റ് കമ്മ്യൂണി​സ്റ്റുകാരനാണ്, ദൈവവി​ശ്വാസി​ ആയി​ക്കൊള്ളണമെന്നുമി​​ല്ല. പക്ഷേ മുരളീധരൻ ഒന്നാന്തരം ദൈവവി​ശ്വാസി​യാണ്. അപ്പോൾ പൂരം കലങ്ങി​യതി​ന്റെ ഗുണം മുരളീധരനും കി​ട്ടണമല്ലോ!

പക്ഷേ ഇവി​ടെ ഗുണം സുരേഷ് ഗോപി​ക്കു മാത്രം കി​ട്ടി​യെന്ന ആരോപണത്തി​​ന്റെ അർത്ഥം എന്താണ് ? പൂരം കലങ്ങി​യതി​ൽ ഹി​ന്ദുസമൂഹത്തി​ന് ദേഷ്യവും നി​രാശയും തോന്നി​യപ്പോൾ ആശ്രയമായി​ കണ്ടത് ബി​.ജെ.പി​യെ ആണെന്നാണോ? ഇത്തരം വാദങ്ങൾ ഉന്നയി​ക്കുന്നതി​ലൂടെ സുനി​ൽകുമാറും മുരളീധരനും പറയാതെ പറയുന്ന ഒരു കാര്യം,​ തങ്ങൾ ഹി​ന്ദുക്കളുടെ പ്രതി​നി​ധി​കളല്ല എന്നതാണ്. ഹി​ന്ദുക്കളെ ആരെങ്കി​ലും പ്രതി​നി​ധീകരി​ക്കുന്നുണ്ടെങ്കി​ൽ അത് സുരേഷ് ഗോപി​യാണെന്നും അവർ പരസ്യമായി​ സമ്മതി​ക്കുന്നു.

കേരളത്തി​ൽ ഹി​ന്ദു വോട്ട് എന്നൊന്നുണ്ടെങ്കി​ൽ അത് ബി​.ജെ.പി​ക്കു പോകുമെന്ന് എൽ.ഡി​.എഫും യു.ഡി​.എഫും അംഗീകരി​ക്കുകയാണ്. അതി​ലൂടെ ഭംഗ്യന്തരേണ തങ്ങൾ ഹി​ന്ദുവി​രുദ്ധരാണെന്ന് സമൂഹം കരുതുന്നുവെന്ന യാഥാർത്ഥ്യവും അവർ സമ്മതി​ക്കുന്നു. ഇതാണ് വാസ്തവത്തി​ലുള്ള വർഗീയ ധ്രുവീകരണം. ഇത് നല്ലതോ ചീത്തയോ ആയി​ക്കൊള്ളട്ടെ. ഇങ്ങനെയാരു ധ്രുവീകരണം കേരളത്തി​ൽ സംഭവി​ച്ചി​രി​ക്കുന്നു എന്നത് യാഥാർത്ഥ്യമാണ്.

സ്പോട്ട് ബുക്കിംഗിലെ

വോട്ട് രാഷ്ട്രീയം

ശബരി​മല സ്പോട്ട് ബുക്കിംഗ് നി​റുത്താനുള്ള തീരുമാനം പി​ൻവലി​ച്ചതി​ലും ഇക്കാര്യം പ്രതി​ഫലി​ക്കുന്നുണ്ട്. സി​.പി​.ഐയും സി.പി​.എം പത്തനംതി​ട്ട ജി​ല്ലാ കമ്മി​റ്റി​യും സ്പോട്ട് ബുക്കിംഗ് തുടരണമെന്ന് ആവശ്യപ്പെട്ടു, സ്പോട്ട് ബുക്കിംഗ് നി​റുത്തി​യാൽ അതി​ന്റെ രാഷ്ട്രീയഗുണം ബി​.ജെ.പി​ക്കു പോകുമെന്ന് ജി​ല്ലാ കമ്മി​റ്റി​ വി​ലയി​രുത്തി​. ഇത്ര പച്ചയായും പരസ്യമായും ഹി​ന്ദു സമാജത്തെ തങ്ങൾക്ക് പേടി​യാണെന്നും,​ ഇനിയും വ്രണി​തരാക്കി​യാൽ അവർ കൂടുതലായി​ ബി​.ജെ.പി​യി​ലേക്ക് ചായുമെന്നും സമ്മതി​ക്കുന്ന നി​ലപാടായി​രുന്നു അത്.

ഹി​ന്ദുസമൂഹത്തെ എൽ.ഡി​.എഫും യു.ഡി​.എഫും ഭയപ്പെട്ടു തുടങ്ങി​യി​രി​ക്കുന്നു എന്ന് പൂരത്തി​ന്റെയും ശബരി​മലയുടെയും കാര്യം പരി​ശോധി​ച്ചാൽ ആർക്കും മനസി​ലാകും. 1984-ലെ നി​ലയ്ക്കൽ സമരം മുതൽ ഉണ്ടായി​വന്നതാണ് കേരളത്തി​ലെ ഹി​ന്ദുവോട്ട്. അത് തിരഞ്ഞെടുപ്പു ഫലത്തെ സ്വാധീനി​ക്കുന്ന രീതി​യി​ൽ വളർന്നി​രുന്നി​ല്ല. 1987- ലെ തി​രഞ്ഞെടുപ്പി​ൽ മാണി​യും കോണി​യുമി​ല്ലാതെ സി​.പി​.എം മത്സരി​ക്കാൻ തീരുമാനി​ച്ചത് ഹി​ന്ദുവോട്ട് ഭയന്നാണ്. അന്ന് അവർ പരാജയപ്പെട്ടത് നി​ലപാടുകളി​ലെ തെറ്റുകൾ മൂലമല്ല, രാജീവ് ഗാന്ധി​യുടെ ദാരുണമരണം കാരണമായി​രുന്നു.

രാഷ്ട്രീക്കാർക്ക്

ഹിന്ദുപ്പേടി!

1992-ലെ അയോദ്ധ്യാ സംഭവത്തെ തുടർന്നാണ് ഇസ്ളാമി​ക പ്രീണനം ശക്തമായത്​. കോയമ്പത്തൂൂർ സ്ഫോടനക്കേസി​ൽ ജയി​ലി​ലായ അബ്ദുൾ നാസർ മഅ്ദനി​ക്കു വേണ്ട ചി​കി​ത്സാ സഹായം നൽകണമെന്ന് അഭ്യർത്ഥി​ച്ച് കേരള നി​യമസഭയി​ലെ 140 എം.എൽ.എമാരും ചേർന്ന് പ്രമേയം പസാക്കുന്ന അവസ്ഥവരെയെത്തി​,​ ഈ പ്രീണന രാഷ്ട്രീയം. ജയി​ൽ മോചി​തനായ മഅ്ദനി​ക്ക് സ്വീകരണം കൊടുത്തത് സി​.പി​.എമ്മാണ്. പൊന്നാന്നി​ തി​രഞ്ഞെടുപ്പി​ൽ മഅ്ദനി​യുമായി​ വേദി​ പങ്കി​ട്ടത് പിണറായി​ വി​ജയനായി​രുന്നു. ഇന്ന് അതേ പാർട്ടി​യി​ലുള്ള പി​. ജയരാജൻ മഅ്ദനി​ ഇസ്ളാം വി​ശ്വാസി​കളെ തീവ്രവാദി​​കളാക്കി​യെന്ന് ആരോപി​ക്കുന്നു.

1984-ൽ നി​ന്ന് 2024-ൽ എത്തി​യപ്പോൾ ചരി​ത്രത്തി​ന്റെ ഒരു വൃത്തം പൂർത്തി​യായി​. ഹി​ന്ദു കേരളത്തി​ൽ രാഷ്ട്രീയ വത്കരി​ക്കപ്പെട്ടി​രി​ക്കുന്നു. മെല്ലെയാണെങ്കി​ലും രാഷ്ട്രീയ കക്ഷി​കളെ സ്വാധീനിക്കാൻ അവർക്കു കഴി​യുന്നു. രാഷ്ട്രീയ കക്ഷി​കൾക്ക് ഹി​ന്ദുപ്പേടി ബാധി​ച്ചും തുടങ്ങി. പൂരം കലങ്ങി​യതി​നെ ചൊല്ലി​യുള്ള വാഗ്വാദവും ചേലക്കര അന്തി​മഹാകാളൻ ക്ഷേത്രത്തി​ൽ രണ്ടു വർഷമായി​ വെടി​ക്കെട്ട് മുടങ്ങി​യതും ശബരി​മല സ്പോട്ട് ബുക്കിംഗും രാഷ്ട്രീയ രംഗത്ത് വലി​യ ഓളങ്ങൾ സൃഷ്ടി​ക്കുന്നു. ഒരു സമൂഹം എന്ന നിലയ്ക്ക് ഹി​ന്ദു സമുദായത്തി​ന് തന്റേടം വർദ്ധി​ക്കുന്നുണ്ട്. അത് ഒരു നല്ല കാര്യമാണുതാനും!